قازاقستان جازۋشىلار كىتاپحاناسىندا كورنەكتى عالىم، ابايتانۋشى، قوعام قايراتكەرى قايىم مۇحامەدحانوۆتىڭ تۋعانىنا 110 جىل تولۋىنا وراي "ۇلت رۋحانياتىنىڭ شامشىراعى – قايىم مۇحامەدحانوۆ" اتتى دوڭگەلەك ۇستەل ءوتتى.
جيىنعا "قايىم مۇحامەدحانوۆ اتىنداعى ءبىلىم جانە مادەنيەت ورتالىعى" ديرەكتورى، عالىمنىڭ قىزى دينا مۇحامەدحان، ادەبيەتتانۋشىلار مەن عالىمدار، ۋنيۆەرسيتەت پروفەسسورلارى مەن ستۋدەنتتەر قاتىستى. ءىس-شارا بارىسىندا تاريح عىلىمدارىنىڭ كانديداتى نايليا تاجيكبايەۆا دارا تۇلعانىڭ ءومىرى مەن ەڭبەكتەرىنە توقتالىپ، ونى دارىپتەۋدىڭ ماڭىزى وراسان زور ەكەنىن اتاپ ءوتتى. سونىمەن قاتار قازاقستان جازۋشىلار كىتاپحاناسىنا قايىم مۇحامەدحانوۆ تۋرالى كىتابىن تارتۋ ەتتى. ال حالىقارالىق تۇركسوي ساراپشىسى، ادەبيەتتانۋشى-عالىم سەرىكقازى قوراباي حالقىنىڭ رۋحاني مادەنيەتىنە قوسقان ۇلەسىنە توقتالدى.
"بيىل 5ء-شى قاڭتاردا الاش رۋحىن ارقالاپ، اباي اماناتىن قورعاپ، ۇلت مۇددەسى جولىندا، ءبىزدىڭ بولاشاعىمىز جولىندا جانقيارلىقپەن كۇرەسكەن ءىرى تۇلعالارىنىڭ ءبىرى دە بىرەگەيى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى، ابايتانۋ عىلىمىنىڭ نەگىزىن قالاۋشىلاردىڭ ءبىرى، شاكارىمتانۋ نەگىزىن قالاعان پروفەسسور قايىم مۇحامەدحانوۆتىڭ تۋعانىنا 110 جىل تولدى. ول – قازاق ادەبيەتىنە، ۇلتىمىزدىڭ كوركەمدىك-ەستەتيكالىق الەمىنە تەڭدەسسىز ۇلەس قوسىپ، ءوز حالقىنىڭ رۋحاني مادەنيەتى مەن ويىنا جاڭا كەڭىستىك اشقان عالىم. باسقاسىن ايتپاعاندا، ۇلى اباي مۇراسى مەن ابايدىڭ اقىندىق مەكتەبىن زەرتتەپ، ناسيحاتتاۋى قايىم مۇحامەدحانوۆتىڭ عىلىمي ۇلكەن ەرلىگى دەپ ءبىلۋ كەرەك. عالىم ءوزىنىڭ مۇراتتارىنا ادال بولدى. 1951 جىلى "ابايدىڭ ادەبي مەكتەبىن" زەرتتەپ جازعان ەڭبەگى ءۇشىن 25 جىل جازىقسىز سوتتالىپ، زارداپ شەكسە دە، مۇقالمادى"، – دەدى پروفەسسور.
جازۋشى-جۋرناليست، قايىم مۇحامەدحانوۆ تۋرالى "ەر قازاق" كىتابىنىڭ اۆتورى داۋلەت سەيسەن ۇلى ءومىرىن ەلىنە قىزمەت ەتۋگە ارناعان تۇلعانىڭ بويىنداعى اسىل قاسيەتتەر مەن قايسار مىنەز قالاي قالىپتاسقانىن ءتۇسىندىردى.
"قايىمنىڭ اكەسى مۇحامەدحاننىڭ ءۇيى – اباي، شاكارىم، كەيىن مۇحتار اۋەزوۆ، الاش ارىستارى – ءاليحان، احمەت، ءمىرجاقىپ قونا جاتىپ، اڭگىمە-دۇكەن قۇراتىن قاسيەتتى قۇتحاناسىنا اينالعان. شاكارىم قاجىلىقتان ورالعان سوڭ، وسى ۇيدە ايالداپتى. سوندا مۇحامەدحان بوي تۇزەپ وسە باستاعان قايىمعا "الاش ارىستارىنىڭ تىزەسىندە وتىرىپ وسكەن سەنىڭ جامان بولۋعا حاقىڭ جوق" دەيتىن كورىنەدى. ايتقانداي-اق، قايىم جاسىنان اتالى سوزگە، جاقسى ورتاعا ءۇيىر بولىپ ءوستى. سولايشا اراداعى 25 جاس ايىرماشىلىعىنا قاراماستان، جاس مۇحتار اۋەزوۆتىڭ ءىنى-دوسىنا اينالدى"، – دەدى داۋلەت سەيسەن ۇلى.
