باكۋدە تۇركى مەملەكەتتەرى ۇيىمىنىڭ (تمۇ) وتباسى جانە الەۋمەتتىك ساياسات ماسەلەلەرىنە جاۋاپتى مينيسترلەرى مەن مەكەمە باسشىلارىنىڭ ەكىنشى وتىرىسى اياقتالدى.
جيىنعا قازاقستان، ازەربايجان، ماجارستان، قىرعىزستان، تاجىكستان، تۇرىكمەنستان جانە تۇركيا وكىلدەرى قاتىستى، دەپ حابارلايدى aqshamnews.kz.
بيىلعى جيىننىڭ تاقىرىبى – «قازىرگى قوعامداعى ايەلدەردىڭ ءرولى: تۇراقتى دامۋ جانە ءداستۇرلى قۇندىلىقتار».
حالىقارالىق كەزدەسۋدىڭ ماقساتى – تۇركى حالىقتارى اراسىندا ايەلدەر مەن وتباسىنا قاتىستى ساياسات سالاسىندا ورتاق قۇندىلىقتار بويىنشا ىنتىماقتاستىقتى نىعايتۋ جانە تەرەڭدەتۋ.
ق ر مادەنيەت جانە اقپارات مينيسترلىگىنىڭ جاستار جانە وتباسى ىستەرى كوميتەتىنىڭ ءتوراعاسى قايرات قامباروۆ قازاقستاننىڭ گەندەرلىك جانە وتباسىلىق ساياساتىنىڭ نەگىزگى باعىتتارىمەن تانىستىردى. ول مەملەكەت باسشىسى قاسىم-جومارت توقايەۆ بۇل ماسەلەلەرگە ايرىقشا كوڭىل بولەتىنىن اتاپ ءوتىپ، ەلدە گەندەرلىك تەڭدىك ورناتىپ، وتباسى ينستيتۋتىن نىعايتۋ ءۇشىن قاجەتتى زاڭنامالىق جانە ينستيتۋسيونالدىق نەگىزدەر جاسالعانىن ايتتى.
وتىرىس بارىسىندا باسقا ەلدەردىڭ وكىلدەرى دە ءوز تاجىريبەلەرىمەن ءبولىستى. سونىمەن قاتار، دەلەگاتتار العاشقى وتىرىس دەكلاراسياسىنىڭ ورىندالۋ بارىسىن، بىرلەسكەن جوبالار مەن وقىتۋ باعدارلامالارىن تالقىلادى. سونداي-اق، ايەلدەردىڭ الەۋمەتتىك-ەكونوميكالىق ءرولىن ارتتىرۋ، ءداستۇرلى قۇندىلىقتاردى ساقتاۋ، وتباسىلاردى سيفرلاندىرۋمەن بايلانىستى جاھاندىق قاۋىپ-قاتەرلەردەن قورعاۋ ماسەلەلەرى دە كۇن تارتىبىندە بولدى.
كەزدەسۋ قورىتىندىسى بويىنشا، تمۇ اياسىنداعى وتباسى جانە الەۋمەتتىك ساياسات ماسەلەلەرىنە جاۋاپتى مينيسترلەر مەن مەكەمە باسشىلارىنىڭ ءۇشىنشى وتىرىسىن 2026 جىلى قازاقستاندا وتكىزۋ تۋرالى شەشىم قابىلداندى.