الەمدەگى جەتەكشى فەرروقورىتپا وندىرۋشىلەردىڭ ءبىرى سانالاتىن «قازحروم»تۇك» اق ىرگەسى قالانعالى بەرى فەرروقورىتپا وندىرىسىندەگى مەرەيلى مەجە – 40 ميلليونىنشى توننا ءونىم شىعاردى.
بۇل ايتۋلى ءونىم كومپانيا فيليالدارىنىڭ ءبىرى اقسۋ فەرروقورىتپا زاۋىتىنىڭ تۇڭعىشى – 21-پەشتە بالقىتىلدى، دەپ حابارلايدى aqshamnews.kz.
1995 جىلى قازحروم اقسۋ جانە اقتوبە فەرروقورىتپا زاۋىتتارىن بىرىكتىرگەندە، ولاردىڭ جىلدىق ءوندىرىسى – 650 مىڭ توننادان ءسال عانا اساتىن. بۇگىنگى كۇنى ءوندىرىستى اۋقىمدى مودەرنيزاسيالاۋ جانە زاماناۋي تەحنولوگيالاردى ەنگىزۋ ارقاسىندا قازحروم زاۋىتتارى ءۇش ەسە كوپ ءونىم شىعارادى جانە وسى سالادا جەتەكشى پوزيسيالاردى ۇستاپ كەلەدى.
«40 ميلليونىنشى توننا فەرروقورىتپاعا قول جەتكىزۋ – بۇل جاي عانا سان ەمەس، تۇراقتى دامۋدىڭ جانە كومپانيا تۇراقتىلىعىنىڭ بەلگىسى. كومپانيا ءوز جۇمىسىن جۇرگىزىپ جاتقان وڭىرلەردىڭ جانە جالپى ەلدىڭ ەكونوميكاسىنا ۇلكەن ۇلەس قوسۋدى جالعاستىرىپ جاتىر. ءبىز ۇنەمى تيىمدىلىكتى ىلگەرىلەتىپ، قىزمەتكەرلەردىڭ بىلىكتىلىگىن ارتتىرۋ جانە ۇنەمدى ءوندىرىستى ەنگىزۋ باعىتىندا ۇزدىكسىز جۇمىس ىستەيمىز»، – اتاپ ءوتتى «قازحروم» تۇك» اق باس ديرەكتورى سەرگەي پروكوپيەۆ.
2024 جىلى قازحرومدا فەرروقورىتپالاردىڭ جىلدىق وندىرىسىندە جاڭا تاريحي رەكورد تىركەلدى. بۇل بۇگىنگى جەتىستىككە جەتۋ جولىنداعى ماڭىزدى كەزەڭ بولدى. وتكەن جىلدىڭ قورىتىندىسى بويىنشا تاۋ-كەن مەتاللۋرگيا كومپانياسى فەرروقورىتپالار شىعارۋ بويىنشا بۇرىنعى ەڭ جوعارى كورسەتكىشتەن اسىپ ءتۇستى. جىلدىق ەسەپتە كولەم 14%-عا ءوسىپ، 1،8 ميلليون تونناعا جەتتى.
«قازحروم» تۇك» اق – قازاقستاننىڭ تاۋ-كەن مەتاللۋرگيا ونەركاسىبىندەگى ءىرى جۇمىس بەرۋشىلەردىڭ ءبىرى. كومپانيانىڭ جالپى قىزمەتكەرلەر سانى – 18 مىڭ ادامنان استى. كومپانيا ءوندىرىستى سيفرلاندىرۋدى، رەسۋرس بازاسىن كەڭەيتۋدى جانە ەكولوگيالىق كورسەتكىشتەردى جاقسارتۋ باعىتارىندا ستراتەگيالىق جوبالاردى بەلسەندى تۇردە دامىتىپ كەلەدى.
2024 جىلدىڭ قورىتىندىسى بويىنشا كومپانيا ورتالىق ازيا ەلدەرى كاسىپوداقتار كەڭەسىنىڭ (واەكك) باستاۋىش ۇيىمدارى اراسىندا «ۇزدىك الەۋمەتتىك سەرىكتەس» حالىقارالىق بايقاۋىنىڭ جەڭىمپازى اتاندى. بۇل قازحرومنىڭ الەۋمەتتىك سەرىكتەستىك جانە قىزمەتكەرلەردىڭ مۇددەلەرىن قورعاۋ سالاسىنداعى جوعارى دەڭگەيىن راستايدى.