بيىل بارشا قازاق ەلى ءۇشىن ايرىقشا تاريحي جىل – قازاقستان رەسپۋبليكاسى كونستيتۋسياسىنىڭ قابىلدانعانىنا 30 جىل تولدى. بۇل – تەك ۋاقىتتىڭ ولشەمى عانا ەمەس، تاۋەلسىز مەملەكەتىمىزدىڭ قالىپتاسۋ جولىنداعى ەڭ قاسيەتتى بەلەستەردىڭ ءبىرى.
ءار حالىقتىڭ تاريحىندا ەلدىڭ تاعدىرىن شەشەتىن، بولاشاق باعىتىن ايقىنداعان كەزەڭدەر بولادى. ول – وتكەن عاسىردىڭ توقسانىنشى جىلدارى ەدى. كەڭەس وداعى ىدىراپ، سان عاسىر بويى ارمانداعان تاۋەلسىزدىككە قول جەتكىزگەن شاقتا حالقىمىزدىڭ الدىندا جاڭا سۇراق تۇردى: «ءبىز مەملەكەتىمىزدى قانداي زاڭمەن، قانداي تارتىپپەن، قانداي نەگىزبەن باسقارامىز؟» مىنە، وسى ساۋالعا بەرىلگەن ايقىن ءارى شەشۋشى جاۋاپ – 1995 جىلى قابىلدانعان اتا زاڭىمىز بولدى.
كونستيتۋسيا – جاي عانا قۇقىقتىق قۇجات ەمەس، ول – حالىق جۇرەگىنىڭ ءۇنى، ەلدىڭ تاعدىرىن تۇگەندەگەن تەگەۋرىندى زاڭ. حالقىمىز ونى بەكەردەن-بەكەر «اتا زاڭ» دەپ اتاماعان. ويتكەنى ونىڭ ءاربىر بابى – حالىقتىڭ قۇقىعىن قورعاپ، بولاشاققا جول سىلتەيتىن شامشىراق. وتىز جىل بويى كونستيتۋسيامىز قازاقستاندى تاتۋلىقتىڭ تۋى، تۇراقتىلىقتىڭ تىرەگى، ادىلەتتىڭ ايناسى ەتىپ كەلەدى. «ءادىل زاڭ – ەلدىڭ ايبىنى» دەپ اتا-بابامىز ايتقانداي، اتا زاڭىمىز ەل ىشىندەگى تىنىشتىقتى، ءار ازاماتتىڭ تەڭدىگىن قامتاماسىز ەتتى. بۇگىندە قازاقستاندى الەم بەيبىتشىلىكتىڭ بەسىگى، تۇراقتىلىقتىڭ مەكەنى رەتىندە تانيدى. بۇل – كونستيتۋسيادا بەكىگەن دەموكراتيالىق قۇندىلىقتاردىڭ جەمىسى.
حالقىمىز ەجەلدەن-اق ادىلدىك پەن زاڭعا سۇيەنىپ، «قاسىم حاننىڭ قاسقا جولى»، «ەسىم حاننىڭ ەسكى جولى»، تاۋكە حاننىڭ «جەتى جارعىسى» – بارلىعى دا حالقىمىزدىڭ ءومىرىن تارتىپكە كەلتىرگەن دالا زاڭدارى بولدى.
بۇگىنگى كونستيتۋسيا – سول ءداستۇردىڭ زاڭدى جالعاسى، جاڭا داۋىردەگى جالعامى. بابالارىمىز: «حان ءادىل بولسا – حالىق ىرىستى، زاڭ ءادىل بولسا – ەل تىنىشتى» – دەپ تەگىن ايتپاعان. اتا زاڭىمىزدىڭ ادىلدىگى مەن كەمەلدىگى ارقاسىندا ءاربىر قازاقستاندىق ءوزىنىڭ قۇقىعىن قورعاپ، ارمان-ماقساتىن جۇزەگە اسىرا الادى. ەڭ باستىسى – بەيبىت اسپان استىندا ءومىر سۇرەدى.
وتىز جىل – تاريح ولشەمىمەن قىسقا عانا ۋاقىت، ءبىراق ءبىز ءۇشىن بۇل جىلداردا عاسىرعا تاتيتىن ىستەر اتقارىلدى. مەملەكەتىمىزدىڭ ءاربىر جەتىستىگىنىڭ ارتىندا كونستيتۋسيانىڭ قاعيدالارى تۇر. ءار ازاماتتىڭ ەركىن ءبىلىم الۋىنا، ەڭبەك ەتۋىنە، ءوز پىكىرىن اشىق ايتۋىنا قۇقىق بەرىلدى. بۇل – دامىعان ەلدەرگە ءتان قۇندىلىقتار.
كونستيتۋسيا – قۇتتى قازىق، ماڭگىلىك باعىت، ار-نامىسىمىزدىڭ ايناسى. الەمدە ءتۇرلى قاقتىعىستار، داۋ-جانجالدار ورىن الىپ جاتقاندا، ءبىزدىڭ ەلدە تاتۋلىق پەن بىرلىكتىڭ سالتانات قۇرۋى – اتا زاڭىمىزدىڭ ارتىقشىلىعى. وتىز جىلدىق مەرەيتوي – وتكەنگە تاعزىم ەتىپ، بولاشاققا سەنىممەن قاراۋدىڭ ءساتى. ەندىگى مىندەت – وسى اسىل مۇرانى قاستەرلەپ، ءاربىر بابىن قۇرمەتتەپ، ۇرپاقتان-ۇرپاققا جالعاۋ.
ەلىمىزدىڭ ۇرانى ايقىن: اتا زاڭ – بارشاعا ورتاق اسىل مۇرا. ونىڭ ءقادىرىن ءبىلىپ ارداقتاۋ – بىزگە پارىز!
كونستيتۋسيامىز – ەلدىكتىڭ ەڭسەسى، بىرلىكتىڭ بايراعى، تاۋەلسىزدىكتىڭ تىرەگى بولىپ جاساي بەرسىن، حالقىمىزدىڭ مەرەيى ءارقاشان ۇستەم بولسىن!