قازاقستان قارۋلى كۇشتەرىنىڭ كومانداسى اريزونا شتاتىنداعى كەمپ ناۆاحو اسكەري بازاسىندا جىل سايىن وتەتىن Best warrior بايقاۋىندا باعىن سىناۋدا، دەپ حابارلايدى aqshamnews.kz.
قورعانىس مينيسترلىگىنىڭ مالىمەتىنشە، قازاقستاننىڭ نامىسىن وتكەن جىلى كاسىبي سايىستا جۇلدەلى ورىندارعا يە بولعان 54835-ا اسكەري ءبولىمى باتالونىنىڭ سەرجانتى 3-سىنىپتى سەرجانت اسلان دارحان مەن 18404 اسكەري ءبولىمى روتاسىنىڭ 3-سىنىپتى گۆارديا سەرجانتى راۋان توقتاربەكوۆ قورعاۋدا.
18 مامىرعا دەيىن سوزىلاتىن بايقاۋعا اقش-تىڭ 7 شتاتىنان، فيدجي، گۋام، تونگا جانە فيليپپيننەن كەلگەن اسكەري قىزمەتشىلەر سايىسىپ جاتىر. اريزونا ۇلتتىق گۆاردياسى جىل سايىن Best warrior بايقاۋىن وتكىزىپ، وندا اسكەري قولدانبالى پاندەردەن ۇزدىك دەپ تانىلعان سەرجانتتاردى انىقتايدى.
سايىس ارميالىق جاۋىنگەرلىك فيتنەس تەستى، جاۋىنگەرلىك دايارلىقتى وقىتۋ پاندەرىنەن نورماتيۆتەردى ورىنداۋ، تۇنگى كۇزەت، كارتامەن جۇمىس، ايماقتى باعالاۋ جانە ازيمۋت بويىنشا قوزعالىس، جەرگىلىكتى جەردى پاترۋلدەۋ، تاكتيكالىق مەديسينا، م-240ۆ پۋلەمەتىنەن، م-4 اۆتوماتىنان، م-17 تاپانشاسىنان اتۋ، ارنايى اسكەري ساۋىتپەن جانە 12 كەلى جۇكپەن 22 شاقىرىمعا مارش جۇگىرۋ سىندى 10 نەگىزگى جارىستان تۇرادى.
ءدۇبىرلى دودادا اقش ارمياسىنىڭ قارۋ-جاراعىمەن جانە قۇرالدارىندا جاتتىعۋلار مەن نورماتيۆتەردى ورىنداسا دا ءبىزدىڭ اسكەري قىزمەتشىلەر تاماشا ناتيجەلەر كورسەتىپ جاتىر. ناقتىراق ايتساق، 3-سىنىپتى سەرجانت دارحان اسلان 800 مەترگە جۇگىرۋدە قاشىقتىقتى 2 مينۋت 5 سەكۋندتا ەڭسەرىپ، ۇزدىك ناتيجە كورسەتتى. ونىڭ كورسەتكەن ناتيجەسى اريزونا شتاتىنىڭ ۇلتتىق گۆارديا بايقاۋىنىڭ بۇكىل تاريحىنداعى رەكورد رەتىندە تىركەلدى.