قازاقستان رەسپۋبليكاسىنىڭ باس پروكۋراتۋراسى مەن ىشكى ىستەر مينيسترلىگىنىڭ قىزمەتكەرلەرى، ارمەنيا رەسپۋبليكاسىنداعى قازاقستان ەلشىلىگىنىڭ كومەگىمەن، اۋىر قىلمىس جاساعان كۇدىكتىنى ەريەۆاننان ەكستراديسيالادى، دەپ حابارلايدى aqshamnews.kz.
2024 جىلعى قىركۇيەكتە پەتروپاۆل قالاسىندا بۇرىن بىرنەشە رەت ءىستى بولعان ازامات ماس كۇيىندە بۇزاقىلىق نيەتپەن ادامعا بىرنەشە رەت پىشاق سۇعىپ، ونىڭ ومىرىنە ءقاۋىپ توندىرگەن. جابىرلەنۋشى شۇعىل مەديسينالىق كومەكتىڭ ارقاسىندا امان قالعان.
قىلمىستان كەيىن كۇدىكتى قۇقىق قورعاۋ ورگاندارىنان جاسىرىنعان، سونىڭ سالدارىنان وعان حالىقارالىق ىزدەۋ جاريالانعان. 2024 جىلدىڭ قازان ايىندا ول ارمەنيا اۋماعىندا ۇستالىپ، قازاقستان باس پروكۋراتۋراسىنىڭ سۇراۋى بويىنشا ەلگە ەكستراديسيالاندى.
قازىرگى ۋاقىتتا كۇدىكتى ۋاقىتشا تەرگەۋ يزولياتورىنا قامالدى. وعان قاتىستى قىلمىستىق كودەكستىڭ 24-بابى 3-بولىگى جانە 99-بابى 2-بولىگىنىڭ 9-تارماعى بويىنشا (ادام ولتىرۋگە وقتالۋ) ءىس قوزعالعان. بۇل باپ بويىنشا مۇلكىن تاركىلەۋمەن بىرگە 15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ جازاسى قاراستىرىلعان.