2024–2025 جىلداردىڭ قىركۇيەك–ءساۋىر ايلارى ارالىعىندا استىق پەن ۇننىڭ استىق بالاماسىنداعى ەكسپورتى شامامەن 10 ملن تونناعا جەتىپ، وتكەن ماۋسىممەن سالىستىرعاندا 37،4%-عا ءوستى.
جىل سايىنعى جونەلتىلىم كولەمى ورتا ەسەپپەن 7–8 ملن توننانى قۇرايدى، دەپ حابارلايدى aqshamnews.kz.
وتكەن جىلى ديقاندار رەكوردتىق ءونىم جيناپ، بۇل ەكسپورت مۇمكىندىكتەرىن ايتارلىقتاي ارتتىردى: قازاقستان جىل سوڭىنا دەيىن شەتەلگە 12 ملن تونناعا دەيىن استىق جونەلتە الادى.
اۋىل شارۋاشىلىعى ۆيسە-مينيسترى ازات سۇلتانوۆتىڭ ايتۋىنشا، وسى ماۋسىمداعى باستى جەتىستىك – ءداستۇرلى ەمەس نارىقتارعا شىعۋ ارقىلى ەكسپورت گەوگرافياسىنىڭ كەڭەيۋى.
«استىقتىڭ مول ونىمدىلىگى، اوك سالاسىنا مەملەكەتتىك قولداۋدىڭ كەشەندى شارالارى مەن اۋىل شارۋاشىلىعى ءونىمىن وندىرۋشىلەردىڭ بەلسەندىلىگى جاڭا ەكسپورتتىق باعىتتاردىڭ اشىلۋىنا سەرپىن بەردى. بەس جىلدىق ۇزىلىستەن كەيىن قازاقستان ازەربايجان، گرۋزيا جانە تۇركياعا استىق جونەلتۋدى قايتا باستادى. قاتتى بيدايدى يتالياعا جونەلتۋ كولەمى ارتىپ كەلەدى. بۇگىندە قازاقستان بەلگيا، پولشا، پورتۋگاليا، نورۆەگيا، ۇلىبريتانيا سياقتى ءبىز ءۇشىن بۇرىن-سوڭدى بولماعان ەۋروپالىق نارىقتارعا ەكسپورتتى جولعا قويىپ جاتىر. ماروككو مەن ءباا ەلدەرى دە ءبىزدىڭ استىعىمىزعا قىزىعۋشىلىق تانىتۋدا»، – دەدى ازات سۇلتانوۆ.
مامىر ايىنىڭ سوڭىنا دەيىن ازىق-تۇلىك كەلىسىمشارت كورپوراسياسى ماروككوعا العاشقى 60 مىڭ توننا بيداي جونەلتۋدى اياقتايدى. سونىمەن قاتار، ۆەتنامعا 15 مىڭ توننا كولەمىندە سىنامالىق پارتيا جەتكىزۋگە كەلىسىمشارت جاسالدى.
ال ءداستۇرلى نارىقتارعا كەلەر بولساق، بۇل باعىتتا دا ەكسپورت ايتارلىقتاي جانداندى. 2024–2025 جىلدىڭ قىركۇيەك–ءساۋىر ايلارىندا ورتالىق ازيا ەلدەرى، اۋعانستان، تۇركيا جانە جۇڭگو استىق پەن ۇندى (استىق بالاماسىندا) يمپورتتاۋدى وتكەن جىلعى وسى كەزەڭمەن سالىستىرعاندا ەداۋىر ارتتىردى: وزبەكستان – 2،6 ملن توننادان 3،3 ملن تونناعا دەيىن (+28%)، تاجىكستان – 807،4 مىڭ توننادان 1،2 ملن تونناعا دەيىن (+44%)، قىرعىزستان – 116،6 مىڭ توننادان 278،1 مىڭ تونناعا دەيىن (2،4 ەسە وسكەن)، يران – 54 مىڭ توننادان 889 مىڭ تونناعا دەيىن (16 ەسە وسكەن)، ازەربايجان – 5 مىڭ توننادان 569 مىڭ تونناعا دەيىن (113 ەسە وسكەن)، اۋعانستان – 202 مىڭ توننادان 270 مىڭ تونناعا دەيىن (+34%).
سوڭعى بەس جىلدا العاش رەت قازاقستان يران مەن ازەربايجانعا استىق جونەلتۋدى قايتا جانداندىرىپ، جەتكىزۋ كولەمىن بىرنەشە ەسەگە ارتتىردى.
جۇڭگو تاراپىنان وسىمدىك شارۋاشىلىعى ونىمدەرىنە ەرەكشە قىزىعۋشىلىق بايقالۋدا. ءوز ءوندىرىسىنىڭ وسۋىنە قاراماستان، كورشىلەس ەلدە قازاقستاندىق جەمدىك ۇنعا دەگەن تۇراقتى سۇرانىس ساقتالىپ وتىر. بۇل استىق وندىرۋشىلەر ءۇشىن قوسىمشا مۇمكىندىك بەرەدى.
2024–2025 جىلدىڭ قىركۇيەك–ءساۋىر ايلارىندا قىتايعا 1،8 ملن توننا استىق پەن ۇن (استىق بالاماسىندا) ەكسپورتتالدى، بۇل وتكەن ماۋسىمنىڭ وسى كەزەڭىمەن سالىستىرعاندا 27%-عا ارتىق.
استىق ەكسپورتىنىڭ ارتۋى مەملەكەتتىك قولداۋ شارالارىنىڭ تيىمدىلىگىن عانا ەمەس، سونىمەن قاتار حالىقارالىق سەرىكتەستەردىڭ قازاقستاندىق ءونىم ساپاسىنا دەگەن سەنىمىن دە كورسەتەدى.
قازىرگى جاعدايلاردا جاڭا نارىقتارعا شىعۋ يكەمدىلىكتى، بالاما لوگيستيكا قۇرۋدى جانە وتاندىق اوك-تىڭ باسەكەگە قابىلەتتىلىگىن تۇراقتى ارتتىرۋدى تالاپ ەتەدى.