4–14 ءساۋىر ارالىعىندا سەربيانىڭ زلاتيبور قالاسىندا وتكەن ISF U-15 جازعى مەكتەپ گيمنازياداسىندا قازاقستان قۇراماسى تاريحي جەتىستىككە قول جەتكىزدى – جاس سپورتشىلارىمىز 11 مەدال جەڭىپ الدى، دەپ حابارلايدى aqshamnews.kz.
ISF U-15 — 13 پەن 15 جاس ارالىعىنداعى مەكتەپ وقۋشىلارىنا ارنالعان الەمدەگى ەڭ ءىرى حالىقارالىق سپورتتىق دودا. بيىلعى جارىسقا 65-تەن استام ەلدەن 3000-عا جۋىق قاتىسۋشى جينالدى.
وقۋ-اعارتۋ مينيسترلىگى مالىمەتىنشە، قازاقستان قۇراماسىنىڭ ساپىندا ەل نامىسىن 23 وقۋشى قورعادى. ولار رەسپۋبليكالىق ىرىكتەۋدەن ءوتىپ، دزيۋدو، ەركىن كۇرەس، بوكس جانە شاحمات سەكىلدى ءتورت سپورت تۇرىنەن سىنعا ءتۇستى.
بوكس جارىسىندا ايبەك سادىق، شىڭعىسحان ماكاروۆ، نۇرتاس اليمباي، سايلاۋقازى سىمبات جانە نۇربولات ءامىر التىن جۇلدەنى جەڭىپ الدى. ال اليحان سماعۇل قولا مەدال يەگەرى اتاندى.
دزيۋدو بويىنشا باقداۋلەت سەرىكالى التىن جۇلدەنى قانجىعالاسا، ەراسىل قالماحانبەت قولا مەدال الدى.
ەركىن كۇرەستە دە وتانداستارىمىز تاباندىلىق تانىتتى: ۆيسحان اراشوۆ كۇمىس، مانسۇر اقىلباي مەن نۇرقوجا قالىبەك قولا جۇلدە جەڭىپ الدى.
شاحمات جارىسىندا ولتيناي العاپپاروۆا مەن جانات نۇرىم جوعارى دەڭگەيدەگى سپورتتىق مادەنيەتتى كورسەتىپ، ءادىل ويىن قاعيدالارىن ۇستانعانى ءۇشىن حالىقارالىق ادال ويىن كوميتەتىنىڭ ارنايى ماراپاتىنا يە بولدى.
ايتا كەتەيىك، قازاقستان بۇل بەدەلدى جارىسقا 2022 جىلدان باستاپ قاتىسىپ كەلەدى. از عانا ۋاقىت ىشىندە ەلىمىزدىڭ جاسوسپىرىمدەر قۇراماسى حالىقارالىق ارەنادا بولاشاعىنان زور ءۇمىت كۇتتىرەتىن كوماندا رەتىندە مويىندالدى.