الماتى اكىمدىگىندە مانەرلەپ سىرعاناۋشى ميحايل شايدوروۆتى الەم چەمپيوناتىندا كۇمىس مەدال جەڭىپ الۋىمەن قۇتتىقتادى
ميحايل شايدوروۆ – جەكە سىرعاناۋدا ونەر كورسەتەتىن مانەرلەپ سىرعاناۋشى. بوستوندا وتكەن الەم چەمپيوناتىندا ول كۇمىس مەدالعا يە بولدى. الماتى اكىمىنىڭ ورىنباسارى بەيبىت شاحانوۆ سپورتشىنى قۇتتىقتاپ، بۇل جەتىستىكتىڭ تاباندىلىق پەن ماقساتكەرلىكتىڭ جارقىن ۇلگىسى ەكەنىن اتاپ ءوتتى، دەپ حابارلايدى aqshamnews.kz
كەزدەسۋ بارىسىندا بەيبىت شاحانوۆ الماتى اكىمدىگىنىڭ اتىنان ميحايل شايدوروۆقا 2،5 ميلليون تەڭگە كولەمىندە قارجىلاي سەرتيفيكات تابىستاپ، ونىڭ وتاندىق سپورتتى دامىتۋعا جانە قالانى حالىقارالىق دەڭگەيدە تانىتۋعا قوسقان زور ۇلەسىن ەرەكشە ايتتى.
«ءسىز قازاقستاندىق مانەرلەپ سىرعاناۋدىڭ ابىرويىن ارتتىرىپ قانا قويماي، جۇزدەگەن جاس سپورتشىنى وزىنە سەنۋگە جانە العا ۇمتىلۋعا شابىت بەردىڭىز. ەرەكشە العىستى جاتتىقتىرۋشىڭىز اسەم روبەرت قىزى قاسانوۆاعا ايتقىم كەلەدى. ول ءوز ىسىنە دەگەن جوعارى كاسىبيلىگىمەن، دانالىعى جانە شىنايى ادالدىعىمەن ەرەكشەلەنەدى. قازاقستان رەسپۋبليكاسىنىڭ مانەرلەپ سىرعاناۋ بويىنشا باس باپكەرى رەتىندە ول سپورتتىڭ دامۋىنا جانە مۇز ايدىنىندا جاڭا جۇلدىزداردىڭ قالىپتاسۋىنا ۇلكەن ۇلەس قوستى»، – دەدى بەيبىت شاحانوۆ.
ءوز كەزەگىندە ميحايل شايدوروۆ قولداۋ كورسەتكەنى ءۇشىن اكىمدىككە العىس ءبىلدىردى.
«مەن قالا اكىمدىگىنە، الماتىلىقتارعا قولداۋ كورسەتكەنى ءۇشىن وتە ريزامىن. بۇل مەنى شابىتتاندىرىپ، ءارى قاراي جەتىستىككە جەتۋگە كۇش بەرەدى. بۇل مەنىڭ عانا ەمەس، بۇكىل ەلدىڭ جەڭىسى، ماعان سەنىپ، وسى جولدا كومەكتەسكەن كوپشىلىكتىڭ ەڭبەگىنىڭ ناتيجەسى»، – دەدى ميحايل شايدوروۆ.