قۇتقارۋ شەڭبەرى قازاقستان-قىتاي مەملەكەتتىك شەكاراسى مەن ىرگەلەس اۋماقتار بويىمەن بەلگىلەنەدى.
ق ر سەناتىنىڭ جالپى وتىرىسىندا پالاتا دەپۋتاتتارى ق ر «ق ر ۇكىمەتى مەن جۇڭگو حالىق رەسپۋبليكاسىنىڭ ۇكىمەتى اراسىندا ازاماتتىق اۋە كەمەلەرىن اۆياسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىمدى راتيفيكاسيالاۋ تۋرالى» زاڭىن ماقۇلدادى، دەپ حابارلايدى Almaty-akshamy.kz.
سەناتتىڭ ەكونوميكالىق ساياسات، يننوۆاسيالىق دامۋ جانە كاسىپكەرلىك كوميتەتىنىڭ مۇشەسى سۇيىندىك الداشيەۆ كەلىسىمنىڭ باستى ماقساتى – حالىقارالىق ازاماتتىق اۆياسيا ۇيىمىنىڭ ستاندارتتارى مەن ۇسىنىلاتىن تاجىريبەسىنە سايكەس، اپاتقا ۇشىراعان جولاۋشىلاردى، ەكيپاجداردى، ۇشاقتاردى ىزدەۋ جانە قۇتقارۋ بويىنشا مەملەكەتتەر اراسىندا تىعىز ىنتىماقتاستىقتى قۇرۋ.
«قۇتقارۋدى ۇيىمداستىرۋ جانە جۇزەگە اسىرۋ ناقتى ءىس-قيمىلداردىڭ ناقتى الگوريتمىن قاراستىرادى. بۇل قۇتقارۋ شەكاراسى قازاقستان-قىتاي مەملەكەتتىك شەكاراسى جانە وعان ىرگەلەس جاتقان اۋماقتار اراسىنداعى شەكارا بويىمەن بەلگىلەنەدى. بۇدان ءارى بارلىق ىزدەۋ-قۇتقارۋ جۇمىستارى رەسپۋبليكا اۋماعىندا، قازاقستان مەن جۇڭگو، سونىمەن بىرگە ىرگەلەس جاتقان ايماقتاردا ءار مەملەكەتتىڭ زاڭناماسىنا سايكەس جۇزەگە اسىرىلادى»، - دەدى سۇيىندىك الداشيەۆ.
ءار تاراپ ءوز ايماعىندا ازاماتتىق اۋە كەمەلەرىن ىزدەستىرۋ-قۇتقارۋ جونىندەگى جاۋاپتى قىزمەت بولۋىن جانە ولاردىڭ تاۋلىك بويى كەزەكشىلىگىن قامتاماسىز ەتەتىنىن قوسا كەتتى.
«تاعى ءبىر كەلىسىمدە تاراپتاردىڭ اۆياسيالىق وقيعا تۋرالى ءوزارا حاباردار ەتۋ جانە ەكىنشى تاراپتان كومەك سۇراۋ مىندەتتەمەسى قاراستىرىلعان. تاراپتار وزدەرىنىڭ جاۋاپكەرشىلىك ايماعىندا ىزدەستىرۋ-قۇتقارۋ جۇرگىزۋدەن تۋىندايتىن شىعىنداردى دەربەس كوتەرەدى»، - دەدى سۇيىندىك الداشيەۆ.
ونىڭ ايتۋىنشا، كەلىسىم ەكى مەملەكەتتىڭ قۇزىرلى ورگاندارى مەن ىزدەۋ-قۇتقارۋ قىزمەتتەرى اراسىنداعى ىنتىماقتاستىقتى نىعايتۋدى كوزدەيدى.
مۇنداي ىنتىماقتاستىق بىرلەسكەن ىزدەستىرۋ-قۇتقارۋ جاتتىعۋلارىن، مەملەكەتارالىق بايلانىس ارنالارىن تۇراقتى تەكسەرۋدى، ىزدەستىرۋ-قۇتقارۋ ماماندارىنىڭ ءوزارا ساپارلارىن، ىزدەستىرۋ-قۇتقارۋ اقپاراتىمەن جانە تاجىريبە الماسۋدى قامتيدى.
30 قاراشادا ءماجىلىس قازاقستان مەن جۇڭگو ۇكىمەتتەرى اراسىنداعى ازاماتتىق اۋە كەمەلەرىن اۆياسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىمدى راتيفيكاسيالاۋدى ماقۇلدادى.