«جاستار» عىلىمي-زەرتتەۋ ورتالىعىندا «قازاقستان جاستارى – 2025» ۇلتتىق بايانداماسىنىڭ قۇرىلىمى تالقىلاندى.
ءىس-شاراعا مەملەكەتتىك ورگاندار، ساياسي پارتيالار، عىلىمي جانە ۇكىمەتتىك ەمەس ۇيىمدار مەن جاستار بىرلەستىكتەرىنىڭ وكىلدەرى قاتىستى، دەپ حابارلايدى aqshamnews.kz.
كەزدەسۋ بارىسىندا بايانداما قۇرىلىمىنىڭ جاڭا جوباسى تانىستىرىلدى. ۇسىنىلعان وزگەرتۋلەر مەن تۇزەتۋلەر زەرتتەۋدى كۇشەيتىپ، جاستار جوبالارىنىڭ عىلىمي-تالدامالىق جۇمىسىن ارتتىرۋعا باعىتتالعان.
وتىرىس بارىسىندا قاتىسۋشىلار كوشى-قون ماسەلەلەرىنە، جاستاردىڭ الەۋمەتتىك-ەكونوميكالىق قاۋىپسىزدىگىنە جانە NEET ساناتىنداعى جاستاردىڭ قاجەتتىلىكتەرىن زەرتتەۋگە نازار اۋداردى.
ەسكە سالا كەتەيىك، «قازاقستان جاستارى» ۇلتتىق بايانداماسىن «جاستار» عىلىمي-زەرتتەۋ ورتالىعى 2013 جىلدان باستاپ جىل سايىن دايىندايدى. وسى ۋاقىت ارالىعىندا باياندامانىڭ 12 شىعارىلىمى جارىق كوردى. بۇل ورتالىق – قازاقستان جاستارىنىڭ الەۋمەتتىك جاعدايى مەن حال-احۋالىن جۇيەلى تۇردە زەرتتەيتىن بىردەن ءبىر ينستيتۋت.