ءۇش اۋىسىمدى مەكتەپتەر ازايدى

ءبىلىم بەرۋ ينفراقۇرىلىمىن قولداۋ قورى ارقىلى 61 مەكتەپتىڭ قۇرىلىسى قارجىلاندىرىلدى.

​​قازاقستاندا ەكى جىلدا ءۇش اۋىسىمدى مەكتەپ سانى 3 ەسەگە ازايدى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.

ەلىمىزدە 2019 جىلدان باستاپ 1 ملن-نان استام وقۋشى ورنىنا ارنالعان 1200 جاڭا مەكتەپ قولدانىسقا بەرىلدى. اسىرەسە، 2023، 2024 جىلدارى قۇرىلىس ەرەكشە قارقىندى بولدى. بۇل كەزەڭدە 510 مىڭ ورىنعا ارنالعان 422 مەكتەپ سالىنعان.
بۇل قۇرىلىس جۇمىستارى ەلىمىزدە 100-گە جۋىق ءۇش اۋىسىمدى مەكتەپتى عانا ەمەس، 200-دەن استام مەكتەپتە ورىن تاپشىلىعىن جويۋعا مۇمكىندىك بەردى.

"جايلى مەكتەپ" ۇلتتىق جوباسى اياسىندا جاڭا فورماتتاعى مەكتەپتەر سالۋعا باسىمدىق بەرىلۋدە. 2024 جىلدىڭ قورىتىندىسى بويىنشا 105 جايلى مەكتەپ بەرىلدى، 2025 جىلدىڭ سوڭىنا دەيىن تاعى 112 مەكتەپتىڭ قۇرىلىسىن اياقتاۋ جوسپارلانۋدا"، - دەپ جازىلعان حابارلامادا.

سونىمەن قاتار ءبىلىم بەرۋ ينفراقۇرىلىمىن قولداۋ قورى ارقىلى 61 مەكتەپتىڭ قۇرىلىسى قارجىلاندىرىلدى، ونىڭ اياسىندا تاعى 28 ءبىلىم ورداسىن سالۋ جوسپارلانۋدا.

ءبىلىم بەرۋ ۇيىمدارىنىڭ ينفراقۇرىلىمىن جاقسارتۋ اياسىندا جىل سايىن 1000 اۋىلدىق مەكتەپتى جاڭعىرتۋ، سونداي-اق قولدانىستاعى مەكتەپتەردى كۇردەلى جوندەۋ، زاماناۋي پاندىك كابينەتتەرمەن جابدىقتاۋ جۇرگىزىلۋدە. مەكتەپتەردىڭ ينفراقۇرىلىمىن ءبىرىڭعاي زاماناۋي فورماتقا كوشىرۋ بويىنشا الداعى ءۇش جىل ىشىندە ەلىمىزدىڭ بارلىق وڭىرىندە 1300-گە جۋىق مەكتەپتى رەنوۆاسيالاۋ جوسپارلانۋدا.