وتانداستارىمىز ءۇشىن شەتەلدىك اۋە رەيستەرىنىڭ دە باعاسى قولجەتىمدى بولماق.
قازاقستان مەن وڭتۇستىك كورەيا اراسىندا العاش رەت لوۋكوستەر ياعني بيۋدجەتتىك اۋە كومپانياسىنىڭ ۇشاقتارى ۇشا باستادى. العاشقى رەيس وڭتۇستىك كورەياداعى باستى اۋەجاي ينچحوننان شىعىپ الماتىعا ءساتتى قوندى، دەپ حابارلايدى aqshamnews.kz 24.kz-كە سىلتەمە جاساپ.
وڭتۇستىك كورەيالىق لوۋكوستەردىڭ ۇشاقتارى ينچحون مەن الماتى اراسىندا دۇيسەنبى جانە جۇما كۇندەرى قاتىنايدى. العاشقى جولاۋشىلاردى اۋەجايدان شىعارىپ سالۋعا اۋە كومپانياسىنىڭ پرەزيدەنتى مەن قازاقستاننىڭ وڭتۇستىك كورەياداعى ەلشىسى كەلدى.
نۇرعالي ارىستانوۆ، ق ر كورەيا رەسپۋبليكاسىنداعى توتەنشە جانە وكىلەتتى ەلشىسى:
- ءقازىر ەكى ەلگە اپتاسىنا ورتا ەسەپپەن 15 رەيس جۇزەگە اسىرىلادى. سىزدەر الماتىعا تاعى بىرنەشە رەيس قوستىڭىزدار. بۇل ەكىجاقتى ىنتىماقتاستىقتىڭ قارقىندى دامىپ جاتقانىن كورسەتەدى جانە تۋريزم سالاسىنداعى الماسۋدى ارتتىرۋعا سەپتىگىن تيگىزەدى. ساياحاتشىلار قاراسى جىل سايىن 12 پايىزعا ءوسىپ وتىر. بۇل وتە جاقسى كورسەتكىش.
لوۋكوستەر رەيسىنىڭ ەرەكشەلىگى - بورتتا بيزنەس-كلاسس ورىندارىنىڭ بولماۋى جانە تاماقتىڭ بولەك اقىمەن بەرىلۋى. دەگەنمەن، بۇل العاشقى جولاۋشىلارعا كەدەرگى بولا قويعان جوق. ۇشاق ساپارلاۋشىلارعا تولى بولدى.
الەكساندرا حۆان، الماتى قالاسىنىڭ تۇرعىنى:
- ءقازىر وسى كومپانيامەن ۇشۋ ەكى ەسە ارزان. اسىرەسە جۇكسىز بارىپ-قايتۋ ءۇشىن وتە ءتيىمدى. باستىسى تەز ءارى ارزان.
ەۆگەنيا سحاي، كاسىپكەر:
- سوڭعى ۋاقىتتا جانارماي باعاسى قاتتى ءوستى. وسىعان بايلانىستى اۋە بيلەتتەرى دە قىمباتتادى. ال ۇنەمدەگىسى كەلەتىندەر ءۇشىن جاڭا رەيس وتە ءتيىمدى. بيلەتتەردىڭ الدىن الا ساتىلىپ كەتۋى، ۇشاقتا بوس ورىننىڭ بولماۋى وعان سۇرانىستىڭ جوعارى ەكەنىن كورسەتەدى.
ينچحون - الماتى باعىتىمەن العاش ۇشقان جولاۋشىلار اراسىندا وڭتۇستىككورەيالىقتار كوپ بولدى. بۇل كومپانيانىڭ ءوز سايتىندا الماتىنىڭ كورىكتى جەرلەرىن كەڭىنەن جارنامالاۋىنىڭ ناتيجەسى بولۋى مۇمكىن.
چوي دو يۋن، سەۋل قالاسىنىڭ تۇرعىنى:
- پاريج نەمەسە نيۋ-يورك سياقتى تانىمال باعىتتاردىڭ ورنىنا ءقازىر ترەندكە اينالعان ەلگە بارۋدى ءجون كوردىم. قازاقستاندى ورتالىق ازيانىڭ «شۆەيسارياسى» دەپ اتايدى. سوندىقتان الماتىنى تاڭدادىم. العاشقى كۇندەرى تابيعاتپەن تانىسقىم كەلەدى. كولساي كولدەرى مەن شارىن شاتقالىنا بارۋ جوسپاردا بار. سودان كەيىن شاھاردىڭ وزىندەگى ورتالىق مۇراجاي سياقتى نىسانداردى ارالاماقپىن.
وسى جازدا ەكى ەل اراسىنداعى اۋە رەيستەرىنىڭ سانى اپتاسىنا 20-دان اسۋى مۇمكىن. لوۋكوستەر وڭتۇستىك كورەيانىڭ كۇنگەيىندەگى ەڭ ءىرى قالاسى - پۋساندى الماتىمەن تىكەلەي بايلانىستىراتىن بولادى.