ق ر عىلىم جانە جوعارى ءبىلىم ءمينيسترىنىڭ بۇيرىعىمەن قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما ءتوراعاسى – رەكتورى لاۋازىمىنا كارىموۆا بەيبىتكۇل سارسەمحان قىزى تاعايىندالدى، - دەپ حابارلايدى Aqshamnews.kz.
بەيبىتكۇل سارسەمحان قىزى 1972 جىلى 2 تامىزدا الماتى وبلىسى، كەگەن اۋدانى، شىرعاناق اۋىلىندا دۇنيەگە كەلگەن. ءبىلىمى مەن كاسىبي جولىن قازاق قىزدار پەداگوگيكالىق ينستيتۋتىندا باستاپ، 1994 جىلى «قازاق مەكتەبىندەگى ورىس ءتىلى مەن ادەبيەتى» ماماندىعىن ءتامامداپ، كەيىن اسپيرانتۋرادا ءبىلىم الدى. فيلولوگيا فاكۋلتەتىندە دەكاننىڭ وقۋ ءىسى جونىندەگى ورىنباسارى جانە ورىس فيلولوگياسى كافەدراسىنىڭ وقىتۋشىسى بولىپ جۇمىس ىستەگەن.
30 جىلدىق قىزمەتىندە ءبىلىم سالاسىندا باسشىلىق قىزمەتتەردى ابىرويمەن اتقارعان. ءال-فارابي اتىنداعى قازاق ۇلتتىق ۋنيۆەرسيتەتى كوللەدجىنىڭ ديرەكتورى، «وقۋلىق» رەسپۋبليكالىق عىلىمي-پراكتيكالىق ورتالىعىنىڭ ديرەكتورى قىزمەتتەرىن اتقارعان.
2020 جىلدىڭ قاڭتارىنان وسى ۋاقىتقا دەيىن قورقىت اتا اتىنداعى قىزىلوردا مەملەكەتتىك ۋنيۆەرسيتەتىن باسقارما ءتوراعاسى – رەكتور رەتىندە باسقاردى. 2021 جىلدان قىزىلوردا قالالىق ءماسليحاتىنىڭ VII، VIII شاقىرىلىم دەپۋتاتى. ونىڭ باسشىلىعىمەن ۋنيۆەرسيتەت ستۋدەنتتىك كونتينگەنتىن ەكى ەسەدەن استام ارتتىردى، حالىقارالىق رەيتينگتەردە جوعارى كورسەتكىشتەرگە جەتتى، شەتەلدىك ۋنيۆەرسيتەتتەرمەن 12 بىرلەسكەن جانە 4 قوسديپلومدىق ءبىلىم بەرۋ باعدارلامالارى ەنگىزىلدى.
بەيبىتكۇل سارسەمحان قىزى كاسىبي شەبەرلىگىن ۇزدىكسىز ارتتىرا وتىرىپ، ۆاشينگتون (اقش)، فرانسيا، فينليانديا، وڭتۇستىك كورەيا، انگليا، ۇلىبريتانيا جانە گرەكيادا بىلىكتىلىكتى ارتتىرۋ باعدارلامالارىنان وتكەن. ول ءتىل ءبىلىمى، سالىستىرمالى گرامماتيكا، قازاقستاندىق ساياساتكەردىڭ تىلدىك تۇلعاسى، جوعارى ءبىلىم بەرۋدەگى ينتەرناسيونالداندىرۋ، مەكتەپ وقۋلىقتارىنىڭ ساپاسىنا ارنالعان 90-نان اسا عىلىمي عىلىمي ەڭبەكتىڭ اۆتورى.
ق ر عىلىم جانە جوعارى ءبىلىم مينيسترلىگىنىڭ «احمەت بايتۇرسىن ۇلى» توسبەلگىسىمەن، قازاقستان رەسپۋبليكاسى پرەزيدەنتىنىڭ العىس حاتىمەن، سونداي-اق «ەرەن ەڭبەگى ءۇشىن» مەدالىمەن ماراپاتتالعان.