دەنساۋلىق ساقتاۋ ءمينيسترى اقمارال ءالنازاروۆا بالالارعا ءبىر ۋاقىتتا كوپ ءتىستى جالپى ۇيقى (ناركوز) جاعدايىندا ەمدەۋ بويىنشا سۇرانىستىڭ ارتىپ كەلە جاتقانىن اتاپ ءوتتى. بۇل اسىرەسە جەكە ستوماتولوگيالىق كلينيكالاردا ءجيى بايقالادى، دەپ حابارلايدى Aqshamnews.kz.
مينيستر بالالاردى جالپى ۇيقى استىندا ەمدەۋگە قاتىستى ءوز ۇستانىمىن ءتۇسىندىرۋدى ماڭىزدى دەپ سانادى.
بالالاردى جالپى انەستەزيامەن ەمدەۋ – قاتاڭ مەديسينالىق كورسەتىلىمدەر بويىنشا عانا جۇرگىزىلۋى ءتيىس كۇردەلى مەديسينالىق ەمشارا.
كلينيكا جەكەمەنشىك بولسىن نەمەسە مەملەكەتتىك بولسىن مۇنداي مانيپۋلياسيالار ءۇشىن بىلىكتى انەستەزيولوگتىڭ قاتىسۋى، ءتيىستى جابدىقتاردىڭ بولۋى، انەستەزيولوگيالىق جانە رەانيماتولوگيالىق كومەك ستاندارتتارىن ساقتاۋ تالاپ ەتىلەدى.
باس پروكۋراتۋرانىڭ تالابى بويىنشا، ەل بويىنشا ستوماتولوگيالىق ۇيىمدارعا – بارلىعى 622 نىسانعا قاتىستى جوسپاردان تىس تەكسەرۋلەر جۇرگىزىلۋدە.
«جالپى انەستەزيا – بۇل «ىڭعايلى وپسيا» ەمەس، ەرەكشە ساقتىقتى تالاپ ەتەتىن كۇردەلى ارالاسۋ. ۇزاق ناركوز جانە اۋقىمدى بىرمەزگىلدە ەمدەۋ بالانىڭ جۇرەك-قانتامىر، تىنىس الۋ جانە جۇيكە جۇيەسى تاراپىنان اسقىنۋ ءقاۋپىن ارتتىرۋى مۇمكىن»، - دەپ جازدى اقمارال ءالنازاروۆا.
وكىنىشكە قاراي، جەكەلەگەن كلينيكالار اتا-انالارعا كوممەرسيالىق تۇرعىدان قولايلى نۇسقانى ۇسىنادى – «بارلىق ءتىستى ءبىر رەتتە ەمدەپ بەرەمىز». الايدا مۇنداي ءتاسىل تەك ناقتى مەديسينالىق كورسەتكىشتەر بولعان جاعدايدا، تەكسەرۋمەن راستالعان كەزدە عانا ورىندى.
«اتا-انالاردى ەرەكشە مۇقيات بولۋعا شاقىرامىن. وسىنداي پروسەدۋرالارعا كەلىسىم بەرمەس بۇرىن، تاۋەكەلدەر، كورسەتكىشتەر جانە جۇرگىزۋ شارتتارى تۋرالى تولىق ءارى اشىق اقپاراتپەن تانىسۋ قاجەت. بالانىڭ قاۋىپسىزدىگى ءارقاشان ءبىرىنشى ورىندا تۇرۋى ءتيىس – جانە دەنساۋلىق ساقتاۋ مينيسترلىگى وسى قاعيداتتى قاتاڭ تۇردە ۇستاناتىن بولادى»، - دەدى مينيستر.
اقمارال ءالنازاروۆانىڭ ايتۋىنشا، بۇگىنگى جاعداي بويىنشا:
290 تەكسەرۋ تىركەلدى، 135 اياقتالدى، 103 – جۇمىس بارىسىندا، 52 – تىركەۋدەن الىنعان (كلينيكالار ءىس جۇزىندە جۇمىس ىستەمەيدى)، 26 – تىركەۋ ساتىسىندا.
وڭىرلەردىڭ پروكۋراتۋراسى جىبەرگەن 316 نىساننىڭ ىشىندە:
34 كلينيكا ءمامس/تمككك شەڭبەرىندە قىزمەت كورسەتەدى، 282 – تەك اقىلى نەگىزدە جۇمىس ىستەيدى.