5 قازان كۇنى نيۋ-يوركتە الەمگە ايگىلى Madison Square Garden ارەناسىندا العاش رەت قازاقستاننىڭ ءانۇرانى شىرقالدى.
بۇل تاريحي ءسات ديماش قۇدايبەرگەننىڭ «Stranger» اتتى جەكە كونسەرتى اياسىندا ورىندالدى. مىڭداعان كورەرمەن العاش رەت تمد ەلدەرىنەن كەلگەن ءارتىستى ءدال وسى ايگىلى ساحنادا قارسى الدى، - دەپ حابارلايدى Aqshamnews.kz.
ارماندار ورىندالادى: Madison Square Garden – جاڭا بەلەس
«مەن بالا كۇنىمنەن وسى جەردە ونەر كورسەتۋدى ارماندايتىنمىن. سەبەبى موحاممەد ءالي مەن مايك تايسوننىڭ جەكپە-جەكتەرى، تريو تەنورلاردىڭ اندەرى، مايكل دجەكسون، ۋيتني حيۋستون، سەلين ديون، اندرەا بوچەللي سىندى اڭىزداردىڭ ونەرى مەنى شابىتتاندىراتىن»، – دەدى ديماش كونسەرت قارساڭىندا.
بۇل ارمان ورىندالدى. ديماش باستاعان قازاقستاندىق كوماندا ايگىلى ساحنادا ەرەكشە باعدارلاما ۇسىندى.
«Stranger» شوۋى – ستيل مەن مادەنيەت توعىسى
كونسەرت ديماشتىڭ «Golden» انىمەن باستالىپ، كوپتىلدى رەپەرتۋارىمەن جالعاستى: «Smoke» (اعىلشىنشا)، «وليمپيكو» (يتاليانشا)، «Battle of Memory» (قىتايشا)، ال العاش رەت ورىندالعان «Love’s not over yet» كومپوزيسياسىن ەكى مارتە «گرەممي» يەگەرى ۋولتەر افاناسيەۆ فورتەپيانومەن سۇيەمەلدەدى.
«ونىڭ ونەرى شەكارالاردى جويىپ، ءار ادامعا اسەر ەتەدى. مۇنداي ەنەرگەتيكا سيرەك كەزدەسەدى»، – دەپ اتاپ ءوتتى ۋولتەر افاناسيەۆ.
ديماش بۇۇ-نىڭ كوشى-قون جونىندەگى اگەنتتىگىنىڭ ايماقتىق ىزگى نيەت ەلشىسى رەتىندە ساحنادان ادامزاتقا ۇندەۋ تاستادى. ول گۋمانيتارلىق كومەكتى قولداۋعا شاقىرىپ، كونسەرتتىڭ ءبىر بولىگى قايىرىمدىلىققا ارنالدى.
كونسەرتتىڭ ەرەكشە بولىگىندە دومبىرا، سىبىزعى، قوبىز سەكىلدى ۇلتتىق اسپاپتار تانىستىرىلىپ، «اداي» كۇيى ورىندالدى. سونداي-اق، جاڭا اۆتورلىق ءان - تۋعان جەرگە ارنالعان «سامعاۋ» كومپوزيسياسىنىڭ پرەمەراسى ءوتتى.
«بۇل كونسەرت – قازاق ونەرىنىڭ جاڭا دەڭگەيگە كوتەرىلگەن ءساتى»، – دەپ پىكىر ءبىلدىردى دومبراشىلار تەمىرلان ولجاباي مەن ەرنات ناۋرىز.
كەش بارىسىندا «ۇمىتىلماس كۇن»، «Give Me Your Love»، «Be With Me»، «ماحاببات بەر ماعان»، «Fire»، «The Story Of One Sky» سياقتى تانىمال تۋىندىلار ورىندالىپ، تىڭدارمانمەن بىرگە ايتىلدى. كەش سوڭىندا «دۋرداراي» ءانى ورىندالىپ، ديماش ساحنادان كورەرمەندى 8 قازان كۇنى مەكسيكادا وتەتىن كەلەسى كونسەرتىنە شاقىردى.