بۋرابايدا ءوتىپ جاتقان ۇلتتىق قۇرىلتايدا مەملەكەت باسشىسى قاسىم-جومارت توقايەۆ سالىق رەفورماسى مەن الەۋمەتتىك سالانى قارجىلاندىرۋ ماسەلەلەرىنە قاتىستى پىكىر ءبىلدىردى، دەپ حابارلايدى aqshamnews.kz
«ۇكىمەت سالىق رەفورماسىنا قاتىستى جاڭا تاسىلدەردى ۇسىندى. بۇل شارالار، جالپى العاندا، دۇرىس. وندا نەگىزگى ەكونوميكالىق جانە الەۋمەتتىك فاكتورلار ەسكەرىلگەن»، – دەدى پرەزيدەنت.
قاسىم-جومارت توقايەۆ سونداي-اق قوسىمشا قۇن سالىعىنىڭ مولشەرلەمەسىن كوتەرۋ قاجەتتىگىنە قوعامدا تۇسىنىستىك بارىن اتاپ ءوتتى.
«كاسىبي ماماندار دا، جالپى جۇرتشىلىق تا قوسىمشا قۇن سالىعىنىڭ مولشەرلەمەسىن كوتەرۋ قاجەتتىگىنە تۇسىنىستىكپەن قارايدى. دەگەنمەن ۇسىنىلعان شارالارعا، سونىڭ ىشىندە، قوسىمشا قۇن سالىعىنا قاتىستى سىن-پىكىرلەر دە ەستىلىپ قالادى. ءبىراق مۇنداي پايىم شىنايى احۋالعا نەگىزدەلمەگەن»، – دەپ ءتۇسىندىردى پرەزيدەنت.
مەملەكەت باسشىسى قازاقستاننىڭ الەۋمەتتىك مەملەكەت ەكەنىن جانە بيۋدجەت قارجىسىنىڭ جارتىسىنان كوبى الەۋمەتتىك سالانىڭ ەنشىسىندە ەكەنىن اتاپ ءوتتى.
«ءبىزدىڭ ەلىمىز – الەۋمەتتىك مەملەكەت. سوندىقتان ءبىلىم بەرۋ، دەنساۋلىق ساقتاۋ سالالارىنا ينۆەستيسيا سالۋدى جالعاستىرامىز. بۇل – ءبىزدىڭ كونستيتۋسيالىق مىندەتىمىز»، – دەدى ول.
الايدا، پرەزيدەنت شىن مۇقتاج ازاماتتارعا عانا كومەك كورسەتىلۋى كەرەك ەكەنىن اتاپ ءوتتى.
«قىزمەتىن اسىرا پايدالانۋعا، الاياقتىققا جول بەرىلمەيدى. سوندىقتان باسىمدىق بەرىلمەگەن جوبالارعا بولىنەتىن قارجى ازايادى. بۇل قاجەت شارا ەكەنى ايدان انىق»، – دەپ قوستى قاسىم-جومارت توقايەۆ.
پرەزيدەنت ۇكىمەتكە وسى جىلدىڭ سوڭىنا دەيىن الەۋمەتتىك سالانى قارجىلاندىرۋدى وڭتايلاندىرۋ جولدارىن ناقتى انىقتاۋدى تاپسىردى.