بۋرابايدا ءوتىپ جاتقان ۇلتتىق قۇرىلتاي بارىسىندا مەملەكەت باسشىسى قاسىم-جومارت توقايەۆ ءبىرىڭعاي ۋاقىت بەلدەۋىنە كوشۋگە قاتىستى پىكىرتالاسقا توقتالدى، دەپ حابارلايدى aqshamnews.kz.
«ۇكىمەت پەن پارلامەنت بۇل ماسەلەنى تالقىلادى. ارنايى زەرتتەۋلەر جۇرگىزىلدى، شەشىمگە كۇمان كەلتىرگەن قوعام بەلسەندىلەرىنىڭ ءقاۋپى مەن كۇمان-كۇدىگى راستالعان جوق. ۇكىمەتتىڭ جانە دەپۋتاتتاردىڭ باسىم كوپشىلىگىنىڭ، سونداي-اق مامانداردىڭ ۋاجىمەن كەلىسەمىن: ءبىزدىڭ كەڭ-بايتاق جەرىمىز بار، حالقىمىزدىڭ سانى دا سالىستىرمالى تۇردە العاندا كوپ ەمەس. سوندىقتان ەلىمىزدە ءبىرىڭعاي ۋاقىت بەلدەۋى بولۋعا ءتيىس. بۇل ءتاسىل مەملەكەتتى باسقارۋ ءىسىن جەڭىلدەتەدى، لوگيستيكا مەن كوپتەگەن بيزنەس-ۇدەرىستى وڭتايلاندىرۋعا سەپتىگىن تيگىزەدى. وسىمەن پىكىرتالاستى دوعارۋ قاجەت دەپ ويلايمىن، ونىڭ ۇستىنە بۇل ماسەلەنى ساياسيلاندىرۋدىڭ قاجەتى جوق»، - دەدى پرەزيدەنت.