نەمەسە بيىك-بيىك عيماراتتار سالىپ جۇرگەن قۇرىلىسشى ومىرىنەن بىرەر ءسوز
كەز كەلگەن ەلدiڭ الەۋمەتتiك الەۋەتى ونىڭ قۇرىلىس سالاسىنىڭ دامۋىنا تiكەلەي بايلانىستى. ءبىزدىڭ وتاندىق قۇرىلىس يندۋسترياسىندا جىلجىمايتىن مۇلىك نارىعىنىڭ كوشباسشىسى بولىپ تانىلعان BI Group – ءىرى يننوۆاسيالىق قۇرىلىس حولدينگى. اتالعان ىرگەلى حولدينگتە جوعارى بىلىكتى 5000-عا جۋىق قىزمەتكەر جۇمىس ىستەيدى. ولاردىڭ ساپىندا ءبىزدىڭ بۇگىنگى كەيىپكەرىمىز، ينجەنەر- قۇرىلىسشى، «قازاقستاننىڭ قۇرمەتتى قۇرىلىسشىسى» توسبەلگىسىنىڭ يەگەرى بولات تۇڭعىشبەكوۆ تە بار.
وسىناۋ مارتەبەلى ماماندىقتىڭ جۇگىن 38 جىلدان بەرى كوتەرىپ كەلە جاتقان بولات قوساق ۇلى ءاۋ باستا قۇرىلىسشى بولۋدى ەمەس، زاڭگەرلىك جولعا ءتۇسۋدى ارمانداعان بولاتىن. تۋمىسىنان شىنشىل، ءادىل، ادالدىقتى سۇيەتىن، ورنىقتى مىنەزدى، ءبىر ءسوزدى، وتىرىككە جانى قاس ازاماتتىڭ ءبىتىم-بولمىسى دا بۇل سالاعا جات ەمەس-تىن.
قازاق ۇلتتىق ۋنيۆەرسيتەتىنىڭ زاڭ فاكۋلتەتىندە وقۋدى قاتتى ارماندايتىن. ءبىراق ءۇيدىڭ كەنجەسى بولعاسىن، اتا-اناسى ونى الىسقا، الماتىعا جىبەرگىسى كەلمەدى. سوندىقتان تۋعان ەلدە قالىپ، سول تۇستا شىمكەنتتە ەڭ ىقپالدى وقۋ ورنى سانالعان قازاق حيميا-تەحنولوگيالىق ينستيتۋتىنا وقۋعا ءتۇسىپ، «ونەركاسىپتىك جانە ازاماتتىق قۇرىلىس» ماماندىعىن ۇزدىك بەلگىمەن ءتامامداپ شىقتى. العاشقى ەڭبەك جولىن تۋعان جەرىندە باستادى. ەكى جىل جۇمىسشى بولدى. ودان ىسكەرلىگىن، شەبەرلىگىن باعالاعان باسشىلىق ماستەر، سوسىن پروراب قىزمەتىنە كوتەردى.
بىردە قالاداعى تۇرعىن ءۇيلەردىڭ ءبىرىنىڭ جانىنان ءوتىپ بارا جاتىر ەدى، اۋلاداعى قۇمنىڭ ءۇستىندە سۇيكىمدى بالدىرعاندار ءبىر-بىرىنە بىلدىرلاي سويلەپ، ويىنشىقتارىمەن شات-شادىمان كۇيدە ءماز بولىپ ويناپ وتىر ەكەن. سونادايدا بالالارىنا قارايلاپ، بىر-بىرىمەن شۇيىركەلەسىپ انالارى، اجەلەرى وتىر. سول ساتتە جاس قۇرىلىسشىنىڭ كەۋدەسىن ماقتانىش كەرنەگەنى بار. «بۇل ءبىز سالعان، ءبىزدىڭ قولىمىزدىڭ تابى قالعان ءۇي عوي، ۇلكەنگە دە، كىشىگە دە جايلى بولعانىن كورگەن قانداي عانيبەت!» دەپ كۇبىرلەگەن ىشتەي سوندا. شىنى كەرەك، ءوز ماماندىعىنىڭ عاجاپتىعىن دا سول كەزدە مويىنداعان. ءبىزدىڭ كەيىپكەرىمىز سول ءبىر اسەرلى ساتتەن باستاپ ءوزىن باسقا سالادا ەلەستەتكەن ەمەس.
مارتەبەلى ماماندىق
ودان كەيىنگى ءىرى جوبالاردى قولعا العان ءساتى 2005 جىلى الماتىعا قونىس اۋدارعاندا، «ايسەل قازاقستان كورپوراسياسى» جشس- دە ۋچاسكە باسشىسىنان باستالدى. قازىرگى كۇنى «الماتى قالاسىنىڭ الاتاۋ اۋدانىنداعى يننوۆاسيالىق شىعارماشىلىق ورتالىعى» جوباسىنىڭ (BI GLOBAL ج ش س) ۋچاسكە باسشىسى. اتالعان جوبا، ياعني زاماناۋي وقۋشىلار سارايى جاقىن ارادا بالالار يگىلىگىنە بەرىلەدى. جاڭا عيماراتتىڭ تۇساۋكەسەر تويى تاياۋ دەگەن ءسوز. بۇعان دەيىن ينجەنەر-قۇرىلىسشى بولات تۇڭعىشبەكوۆتىڭ تىكەلەي اتسالىسۋىمەن مەگاپوليستەگى «الاتاۋ» ەمدەۋ-ساۋىقتىرۋ كەشەنى، «قايتا جاڭارتىلعان تەلەورتالىق»، «قالقامان» ىقشاماۋدانىنداعى 1800 ورىندى مەكتەپ پايدالانۋعا بەرىلگەن بولاتىن.
– ماماندىق تاڭداۋ – وقۋ، ديپلوم الۋ عانا ەمەس، ول – ءومىر جولىڭدى دۇرىس تاڭداۋ دەگەن ءسوز. سوندىقتان ماماندىقتى تاڭداۋدا قاتەلەسپەگەن دۇرىس. ماماندىعىڭدى رياسىز ءسۇيۋ كەرەك، سوندا جەتىستىككە جەتەسىڭ. قازىرگى جاستارعا ءجيى ايتىپ وتىراتىن ءسوزىم وسى. ياعني دۇرىس تاڭدالعان ماماندىق يەسى قاشاندا ءوز ءىسىنىڭ شەبەرى، ءارى بىلگىرى بولىپ، سۇرانىسقا يە بولىپ جاتادى. ول ءوز تاڭداعان باعىتىن جاقسى كورىپ، سول سالانىڭ ماقتانىشىنا اينالا الادى. ءبىزدىڭ حولدينگ جاس ماماندارعا جاعداي جاساپ وتىرادى. ءبىز جاقسى كادرلاردى ءوز ىشىمىزدە تاربيەلەپ، كاسىپتىك باعدار بەرىپ، جەتىلدىرىپ، بيىككە شىعارىپ وتىرامىز. ال جاقسى مامان – جاقسى جۇمىستىڭ كەپىلى، – دەيدى بولات قوساق ۇلى.
قۇرىلىسشى ماماندىعىنىڭ قيىندىعى سول، ولار نۇسقاۋ بەرىپ جىلى كابينەتتە وتىرمايدى، جىلدىڭ ءتورت مەزگىلىندە دە سىرتتا، دالادا، شىلىڭگىر شىلدەنىڭ اپتاپ ىستىعىندا، توپەلەي قۇيعان جاڭبىردىڭ استىندا، جەلدىڭ ءوتىندە، اق قار، كوك مۇزدا اياقتان سۋىق ءوتىپ نەمەسە شاڭ-توزاڭ جۇتىپ، جۇمىستىڭ ءمىنسىز، ساپالى بولۋى ءۇشىن قاس قارايعانشا قۇرىلىس باسىندا جۇرەدى. ال ءبىراق نەشە كۇن، نەشە ءتۇن، قانشاما ايلار ۇيىقتاماي جاسالعان جۇمىس اياقتالىپ، كوز الدارىندا اپپاق، ەڭسەلى عيمارات جارقىراپ شىعا كەلگەندە، قينالعان كۇندەرىنىڭ ءبارى دە ۇمىتىلىپ قالاتىنى بار. بۇل – ءبىزدىڭ كەيىپكەرىمىزدىڭ رياسىز ءسوزى. ءيا، ولار ءاردايىم ادامداردىڭ يگىلىگى ءۇشىن قىزمەت ەتىپ جاتقانىن ماقتان ەتەدى. قۇرىلىس الاڭىندا تەر توككەن قۇرىلىسشىلار – نەگىزگى ەڭبەك كۇشى. ولار الماتىنى تۇرلەندىرىپ، ونىڭ جاڭا كەلبەتىن قالىپتاستىرۋدا ەرەن ەڭبەك ءسىڭىرىپ ءجۇر.
«ات تۇياعىن تاي باسار»
«ات تۇياعىن تاي باسار» دەمەكشى، بولات قوساق ۇلىنىڭ ۇلى دياس تا مايتالمان قۇرىلىسشى بۇگىندە. اكە وكشەسىن باسىپ، ءىزىن جالعاپ كەلە جاتقان ۇرپاعىنىڭ بولاشاعىنان كوپ ءۇمىت كۇتەدى. كەزىندە ءوزى باپتاپ، ءوزى جول كورسەتىپ، تاربيەلەگەن، وسى ماماندىققا باۋلىعان ۇلىنىڭ لاۋازىمى ءقازىر اكەدەن جوعارى. ياعني قۇرىلىس جوباسى جەتەكشىسىنىڭ ورىنباسارى. «اكەدەن ۇل تۋسا يگى، اكەنىڭ جولىن قۋسا يگى» دەيدى قازاق ناقىلى. سوندىقتان ارينە، اكە بيىككە سامعاعان ۇلىنىڭ جەتىستىگىن اسقان ماقتانىشپەن ايتادى.
ءوزى دە اكەسىنەن كوپ جاقسىنى سىڭىرە ءبىلدى. اكەسى قوساقتان ەڭبەكقورلىقتى، قولعا العان ىسكە ءاردايىم جاۋاپكەرشىلىكپەن قاراۋدى، وتباسىنا ادال بولۋ سىندى قاسيەتتەردى دارىتتى. ال اياۋلى اناسى ۇلدانايدىڭ كۇندە داستارحان باسىندا ايتاتىن «ب ا ق، قايدا باراسىڭ؟» دەسە، «ىنتىماعى جاراسقان ۇيگە بارامىن» دەيدى ەكەن. قۇلىندارىم، ءاردايىم باۋىرمال، ءبىر- بىرىڭمەن ىنتىماقتا بولىڭدار» دەگەن ءسوزى جۇرەگىندە ماڭگىگە جازىلىپ قالعان. مەيىرىمگە تولى ءۇنى دە كۇنى بۇگىنگىدەي قۇلاعىندا. بۇگىندە سول سوزدەردى ءوز بالالارىنىڭ دا جۇرەگىنە قوندىردى. ۇل-قىزى، ءتىپتى نەمەرەلەرى دە بىر-بىرىنە باۋىرمال. بولات قوساق ۇلى بۇل ساتتەردى الەمنىڭ ەشبىر عالاماتىنا ايىرباستاماق ەمەس.
اۋىلعا، ەلگە بارعاندا اتپال ازامات ەكەنىن ءبىر ساتكە ۇمىتىپ، اناسىنىڭ الدىنا ءدال بالا كۇندەگىدەي ەركەلەي جاتا قالاتىن ساتتەر دە بۇگىندە ساعىنىشقا اينالعان. ەلگە بارىپ كەلگەن سايىن شەشەسىنىڭ باسىنان سيپاعان الاقانىنان كەرەمەت جىلۋ الىپ قايتۋشى ەدى. سوندىقتان بولار، بۇگىندە ءوزىنىڭ جاسى پايعامبار جاسىنا جەتىپ قالسا دا، ءالى كۇنگە اياۋلى اناسى ەسكە تۇسكەندە، كەۋدەسىن ساعىنىش كەرنەپ، كوزى بالاشا جاساۋراپ قالاتىنى بار.
باقىت ءۇيى
بايلىق دەگەن ول ءۇشىن اقشا ەمە س، دەنساۋلىق، وتباسىنىڭ بۇتىندىگى، اعايىن-تۋىستىڭ اماندىعى، قاجەت شاقتا جانىڭنان تابىلاتىن جاقسى دوس، مىنە، بولات قوساق ۇلى ءۇشىن باعا جەتپەس بايلىق وسى قۇندىلىقتار.
ول ءاردايىم وز-وزىنە سۇيەنىپ ۇيرەنگەن جان. «جاقسى بولسا – وزىمنەن، جامان بولسا دا – وزىمنەن» دەگەن ۇستانىممەن ءومىر ءسۇرىپ كەلە جاتقان ازامات. الدەبىر ماسەلەلەردە وزگەلەردىڭ دە وي-پىكىرىن تىڭدايدى، زەردەلەيدى، تارازىلايدى، ءبىراق جەمە-جەمگە كەلگەندە ءوز ۇستانىمىندا قالادى. وسى ورايدا ابايدىڭ «وزىڭە سەن، ءوزىڭدى الىپ شىعار، ەڭبەگىڭ مەن اقىلىڭ ەكى جاقتاپ» دەگەن ءسوزى بەينە وزىنە ايتىلعانداي.
ءبىزدىڭ كەيىپكەرىمىز جار تاڭداۋدا دا قاتەلەسپەگەنىن ايتادى. جارى سارا ۇسەن قىزى – فارماسيەۆت. ەكەۋى ۇلكەن سۇيىسپەنشىلىكپەن وتاۋ قۇرعان. جاس وتباسىنىڭ الدىندا ەكى تاڭداۋ تۇردى: دايىن پاتەردى ساتىپ الۋ نەمەسە جەر الىپ، ءۇي سالۋ. جاستار سوڭعىسىن تاڭدادى. ياعني ولار «باقىت ءۇيىن» ءوز قولدارىمەن تۇرعىزعىسى كەلدى. جانە تۇرعىزدى. كومەككە، ارينە، ءبىر قۇرساقتان شىققان باۋىرلارى دا كەلدى. سول «باقىت ءۇيى» تۋعان جەردە ءالى تۇر، الماتىعا كوشەردە ساتۋعا دا قيعان جوق، باقىتتىڭ ماڭگى بولعانى جاقسى عوي. ءقازىر باقىت، شاتتىق، قۋانىش شاقىرىپ تۇراتىن، ءبارىنىڭ باسىن قوساتىن سول ۇيدە ىنىلەرى تۇرىپ جاتىر.
تەلەفون
بۇگىنگى ومىرىنە ەش وكپەسى جوق. ەگەر عايىپتان بارلىق ءومىرىن باسىنان قايتادان ءسۇرۋ مۇمكىندىگى بەرىلىپ جاتسا، ءبىر ءساتىن دە، ءبىر پاراعىن دا وزگەرتپەستەن، ءدال وسى ءومىرىن قايتا سۇرۋگە پەيىلدى. ءيا، كەي-كەيدە جۇرەگىن سىزداتىپ وتەتىن ءبىر جاعداي بار. كەنجە ۇلى ءومىردەن ەرتە، نەبارى 24 جاسىندا ءوتىپ كەتتى. ونداي ساتتەرى كەۋدەسىن مۇڭ كەرنەيتىنى بار. ءبىراق «تۇياعى ءبۇتىن تۇلپار، قاناتى ءبۇتىن سۇڭقار جوق» دەپ ءوز-وزىن جۇباتىپ، بويىن تىكتەپ الا قويادى.
بۇگىندە ۇيالى تەلەفون ءومىرىمىزدىڭ اينىماس بولشەگىنە اينالعان. بارلىق جۇمىستى دا سول الاقانداي قۇرىلعىمەن-اق تىندىرا بەرەتىن بولعانبىز. ءتىپتى، كەيدە جۇمىسباستىلىعىمىزدى سىلتاۋراتىپ كوپ نارسەگە ۋاقىت تاپپاي جاتامىز. ءبىراق ءبىزدىڭ كەيىپكەرىمىز بالالارى ءۇشىن ءاردايىم ۋاقىت تابادى. وزىمەن ءبىر ساپتا، يىق ءتۇيىستىرىپ قاتار ءجۇرگەن ۇلى دياسپەن تەلەفونمەن كۇنىگە بىرنەشە مارتە سويلەسەدى. ىستەپ ءجۇرگەن جۇمىسى، سالاسى ءبىر بولعاندىقتان شىعار، وي-پىكىرلەرى دە كوبىنە ءبىر ارنادا توعىسىپ جاتادى. بۇگىندە تۇركيادا تۇرىپ جاتقان قىزى گۇلداناسىنا «اكە» دەگەن داۋىسىن ەستۋ، ساعىنىشىن باسۋ ءۇشىن ءجيى قوڭىراۋ سوعادى. ارينە، وسىنداي التىن اسىقتاي ۇل مەن كۇمىس قاسىقتاي قىز سىيلاعان، 36 جىلدان بەرى ىستىق- سۋىققا بىرگە ءتوزىپ كەلە جاتقان جارىنا دەگەن سۇيىسپەنشىلىگى جوعارى. جۇما باستالعان ساتتەن كەلىنشەگى ءتاتتى، دامدىلەرىن قامداي باستادى. سوسىن «ءبىز شىقتىق» دەپ تەلەفون سوعادى. ءيا، سەنبى، جەكسەنبىدە نەمەرەلەرى كەلىپ، اتا-اجەنىڭ ءۇيىن شۋاققا تولتىرىپ كەتەدى.
ال وسىنداي باقىت قۇشاعىندا ءومىر ءسۇرىپ جاتقان قۇرىلىسشىنىڭ ەڭبەكتەگى ءار ءساتى، ءار جۇمىسى ءساتتى بولماۋى ءتىپتى مۇمكىن ەمەس.
شىققان بيىگىڭىز الاسارماسىن، مارتەبەلى قۇرىلىسشى!
BI GROUP – قازاقستاننىڭ جىلجىمايتىن مۇلىك نارىعىنىڭ كوشباسشىسى
ءبىزدىڭ كەيىپكەرىمىز بولات تۇڭعىشبەكوۆ ەڭبەك ەتەتىن BI Group قازاقستاننىڭ جىلجىمايتىن مۇلىك نارىعىندا 1995 جىلدان بەرى جۇمىس ىستەيدى جانە وسى ۋاقىت ىشىندە كاسىبي جانە سەنىمدى سەرىكتەس دەگەن اتقا لايىقتى بولدى.
BI Group – بۇگىندە قۇرىلىس، ديەۆەلوپمەنت جانە ينجينيرينگ سياقتى ءارتۇرلى سالالاردا بولىمشەلەر مەن ديرەكسيالاردان قۇرالعان، قۇرىلىمى ءارتاراپتاندىرىلعان حولدينگ.
حولدينگ جىلدان-جىلعا دامىپ، قازاقستاندىقتاردى جۇمىس ورىندارىمەن قامتاماسىز ەتىپ، قازاقستان ەكونوميكاسىنىڭ دامۋىنا سۇبەلى ۇلەسىن قوسىپ كەلەدى.
BI Group بارلىق دەڭگەيلەردە تۇرعىن ءۇي سالادى. قازاقستان اۋماعىنان تىس جەرلەردە دە قۇرىلىس سالاسىن دامىتۋدا. حالىقارالىق مۇناي-گاز كومپانيالارى ءۇشىن اسا كۇردەلى جوبالاردى جۇزەگە اسىرادى جانە تاياۋ شەتەل نارىقتارىن يگەرۋدە.
قۇرىلىس سالاسىنداعى اۋقىمدى مەملەكەتتىك باعدارلامالارعا قاتىسادى. ءوز قىزمەتكەرلەرىنىڭ كاسىبي تۇرعىدا وسۋىنە جانە ولاردىڭ تۇراقتى وقۋىنا قولايلى جاعداي جاسايدى. قايىرىمدىلىق جوبالارىمەن دە العى شەپتە جۇرگەن كومپانيا.
حولدينگ حالىقارالىق قارجىلىق اشىقتىق ستاندارتتارىن، بيزنەستى جۇرگىزۋدىڭ ەتيكالىق قاعيداتتارىن، كوماندالىق رۋحتى ۇستانا وتىرىپ، كورپوراتيۆتىك باسقارۋدىڭ ۇزدىك الەمدىك ءتاجىريبەلەرىنە سۇيەنەدى.
حولدينگ «ەڭ ۇزدىگىن تاڭدا»: جوبا، كوماندا، تەحنولوگيا، مەنەدجمەنت» قاعيداتى بويىنشا جۇمىس ىستەيدى. BI Group-تىڭ 100-دەن استام باسشىسى MBA دارەجەسىن يەلەنگەن.