قاراعاندى قالاسىندا جەكە تۇرعىن ۇيدەن ءىرى كولەمدە ۇرلىق جاساعان ەر ادام بەينەباقىلاۋ كامەرالارىنا ءتۇسىپ قالدى، دەپ حابارلايدى Aqshamnews.kz ءتىلشىسى.
بەينەجازبادا كۇدىكتىنىڭ تۇنگى ۋاقىتتا ءزاۋلىم ۇيدەن اقشا مەن قۇندى زاتتار سالىنعان اۋىر سەيفتى الىپ شىققانى كورىنەدى. ەر ادام سەيفتى قار ۇستىمەن دومالاتىپ، بىرنەشە رەت توقتاپ، اينالاسىنا قاراپ وتىرعان. كەيىن ونى قوقىس جاشىكتەرىنىڭ جانىنا جاسىرىپ، تاڭەرتەڭ قايتا كەلىپ الىپ كەتكەن. ونىڭ قوزعالىسى بىرنەشە بەينەباقىلاۋ كامەراسىنا جازىلعان.
ءۇي يەلەرى ۇرلىق فاكتىسىن بىرنەشە كۇننەن كەيىن، شەتەلدەگى ۇزاق دەمالىستان ورالعان سوڭ انىقتاعان. ولار سەيفتىڭ جوعالعانىن بايقاپ، پوليسياعا جۇگىنگەن. الدىن الا مالىمەت بويىنشا، كەلتىرىلگەن شىعىن كولەمى شامامەن 10 ميلليون تەڭگە.
قاراعاندى وبلىستىق پوليسيا دەپارتامەنتىنىڭ حابارلاۋىنشا، جەدەل-ىزدەستىرۋ شارالارى بارىسىندا كۇدىكتى قولعا تۇسكەن. ول تۇركىستان وبلىسىنان قاراعاندىعا كەلگەن 30 جاستاعى ەر ادام. تەكسەرۋ كەزىندە ونىڭ جالدامالى پاتەرىنەن ۇرلانعان سەيف تابىلعان.
«سەيف زاتتاي دالەل رەتىندە تاركىلەندى. كۇدىكتى كىناسىن مويىندادى. قازىرگى ۋاقىتتا سوتقا دەيىنگى تەرگەۋ جۇرگىزىلىپ، ونىڭ باسقا دا وسىعان ۇقساس قىلمىستارعا قاتىسى بار-جوعى تەكسەرىلۋدە»، – دەپ مالىمدەدى پوليسيا.
ايتا كەتەيىك، بۇعان دەيىن قاراعاندىدا قالتا ۇرلىعىنا قاتىستى تاعى ءبىر بەينەجازبا الەۋمەتتىك جەلىدە تاراعان بولاتىن. اتالعان دەرەك بويىنشا دا كۇدىكتى ۇستالعان.