شىمكەنت قالاسىندا جولاۋشىسى بار ليفت اپاتتىق جاعدايدا تومەنگە قۇلديلاپ، قاۋىپسىزدىك جۇيەسىنىڭ ارقاسىندا ارەڭ توقتاعان، دەپ حابارلايدى Aqshamnews.kz ءتىلشىسى.
Otyrar ارناسىنىڭ اقپارىنشا، وقيعا قونايەۆ داڭعىلىندا ورنالاسقان ەليتالى تۇرعىن ءۇي كەشەنىندە تىركەلدى. الدىن الا مالىمەت بويىنشا، 16 قاباتتى ۇيدەگى ليفت بەلگىسىز سەبەپتەرمەن 12-قاباتتان تومەن قاراي جوعارى جىلدامدىقپەن قوزعالا باستاعان. اپاتتىق قاۋىپسىزدىك جۇيەسى ىسكە قوسىلىپ، كابينا جەتىنشى قابات دەڭگەيىندە توقتاعان.
ليفت ىشىندە بولعان ايەل قۇتقارۋشىلاردىڭ كومەگىمەن ەۆاكۋاسيالانىپ، جەدەل مەديسينالىق جاردەم بريگاداسىنا تاپسىرىلدى. دارىگەرلەر ونىڭ تابان سۇيەكتەرى مەن ومىرتقاسىنان جاراقات العانىن انىقتادى. قازىرگى تاڭدا ناۋقاستىڭ جاعدايى ورتاشا اۋىر دەپ باعالانىپ، مەديسينالىق باقىلاۋدا.
وقيعا تۋرالى حابارلاما «112» قىزمەتىنىڭ پۋلتىنە تۇسكەن بويدا جەدەل-قۇتقارۋ جاساعى وقيعا ورنىنا جىبەرىلگەن. ماماندار ليفت شاحتاسىندا قاۋىپسىزدىك تالاپتارىنا ساي جۇمىستار اتقارىلعانىن، الايدا كوتەرگىش قۇرىلعىنىڭ تەحنيكالىق جاي-كۇيى مۇقيات تەكسەرىلەتىنىن مالىمدەدى.
الەۋمەتتىك جەلىلەردە تۇرعىندار اتالعان تۇرعىن ءۇي كەشەنىندەگى ليفت جابدىعى بۇعان دەيىن دە بىرنەشە رەت ىستەن شىققانىن ايتىپ، تەحنيكالىق قىزمەت كورسەتۋ ساپاسىنا قاتىستى سىن بىلدىرۋدە. بۇل دەرەكتەر قازىرگى ۋاقىتتا ءتيىستى ورگاندار تاراپىنان تەكسەرىلىپ جاتىر.
اتالعان جاعداي بويىنشا قاۋىپسىزدىك تالاپتارىنا ساي كەلمەيتىن جۇمىستاردى ورىنداۋ دەرەگىمەن قىلمىستىق ءىس قوزعالىپ، وقيعانىڭ ناقتى سەبەپتەرى انىقتالۋدا.