اقتوعاي اۋدانىنداعى قارابيە قورىمىن زەرتتەۋ بارىسىندا عالىمدار وڭ قولىندا قولا قىلىش ۇستاعان جاۋىنگەردىڭ بۇزىلماعان ءقابىرىن انىقتادى، - دەپ حابارلايدى Aqshamnews.kz.
جەرلەۋ ورنىنان ۇزىندىعى شامامەن 30 سانتيمەتر بولاتىن قوس ءجۇزدى، تۇتاس قۇيىلعان قولا سەمسەر تابىلعان. قارۋ دالا جىرتقىش قۇستارىنىڭ بەينەلەرىمەن بەزەندىرىلگەن. ساراپشىلاردىڭ پىكىرىنشە، مۇنداي پىشىندەگى ءارى كوركەم ورنەكتەلگەن اكيناك قازاقستان اۋماعىنان بۇرىن-سوڭدى تابىلعان ەمەس. بۇل - ەجەلگى شەبەرلەردىڭ مەتالل وڭدەۋ ءىسى مەن كوركەمدىك تالعامىنىڭ جوعارى دەڭگەيىن دالەلدەيتىن قۇندى جادىگەر.
ارحەولوگتەر قىلىشپەن قاتار بەس مەتالل جەبە ۇشىن جانە التىن سىرعا تاپقان. زەرتتەۋشىلەر التىن اشەكەيدى جاۋىنگەردىڭ قوعامداعى جوعارى مارتەبەسىنىڭ بەلگىسى دەپ سانايدى. زاتتاردىڭ كوركەمدىك ەرەكشەلىگى تالدى-2 قورىمىنداعى «التىن ادام» تابىستارىمەن ۇقساس.
مامانداردىڭ مالىمەتىنشە، ءقابىر ءبىزدىڭ داۋىرىمىزگە دەيىنگى VII–VI عاسىرلارعا جاتادى جانە ول ساق ەليتاسىنىڭ جاۋىنگەرىنە تيەسىلى بولۋى مۇمكىن. ەڭ ماڭىزدىسى - №1 قورعاننىڭ تولىعىمەن ساقتالعانى، بۇل ارحەولوگيالىق تاجىريبەدە وتە سيرەك كەزدەسەدى.
ءقازىر تابىلعان بۇيىمدار وبلىستىق تاريحي-ولكەتانۋ مۇراجايىنا تاپسىرىلماق. الداعى ۋاقىتتا عالىمدار مەتاللوگرافيالىق، راديوكومىرتەكتى جانە انتروپولوگيالىق زەرتتەۋلەر جۇرگىزۋدى جوسپارلاپ وتىر. زەرتتەۋ ناتيجەلەرى كەلەر جىلدىڭ قىسىندا جاريا ەتىلەدى دەپ كۇتىلۋدە.