مەملەكەتتىك قۋىرشاق تەاترى بەردىبەك سوقپاقبايەۆتىڭ الەمگە تانىلعان «مەنىڭ اتىم – قوجا» شىعارماسىن تۇڭعىش رەت قۋىرشاق بەينەسىندە ساحنالاپ، كورەرمەن نازارىنا پرەمەراسىن ۇسىنادى.
قازاق بالالار ادەبيەتىنىڭ التىن قورىنان ويىپ ورىن العان كلاسسيكالىق تۋىندى – ۇلت رۋحانياتىنىڭ ماڭگىلىك قۇندىلىقتارىن دارىپتەيتىن شىعارمالاردىڭ ءبىرى. حالىقتىڭ سۇيىكتى كەيىپكەرىنە اينالعان قوجا بەينەسى ساحنا تورىندە قۋىرشاق ونەرىنىڭ تىلىمەن جاڭاشا سيپات الىپ، كىشكەنتاي كورەرمەننىڭ جۇرەگىنە جول تارتپاق.
قويىلىمنىڭ رەجيسسەرى – ەركەبۇلان قابدىل. ول ءوز ەڭبەگىندە شىعارمانىڭ باستى يدەياسى بالالىقتىڭ شىنايى الەمىن، وجەتتىگى مەن اڭعال تازالىعىن ساقتاي وتىرىپ، قازىرگى زامان بالاسىنا تۇسىنىكتى ءارى تارتىمدى تۇردە جەتكىزۋدى ماقسات ەتكەن.
ينسەنيروۆكا اۆتورى دامير امانتاي كورەرمەنگە ادەبيەت پەن تەاتردىڭ تۇيىسكەن تۇسىندا جاڭا كوركەمدىك شەشىم ۇسىنادى. ونىڭ دراماتۋرگيالىق نۇسقاسى قوجانىڭ ىشكى جان دۇنيەسىن، ارمان-قيالىن جانە ومىرگە دەگەن كوزقاراسىن قۋىرشاق تەاترىنىڭ پوەتيكاسىنا ۇيلەستىرىپ، شىعارمانىڭ رۋحىن تەرەڭ اشادى.
قويىلىمنىڭ بەينەلىك الەمىن قالىپتاستىرعان سۋرەتشى يۋليا چەرنوۆا بالالارعا تانىس اۋىل تىرشىلىگىن، مەكتەپ ءومىرىن جانە قوجانىڭ ەركىن مىنەزىن بەينەلەيتىن ساحنالىق كەڭىستىك پەن قۋىرشاق كەيىپكەرلەردى كوركەم شەشىممەن ۇسىندى.
مۋزىكالىق ارلەۋدى كومپوزيتور نۇرسۇلتان تورەالي ورىنداعان. ونىڭ اۋەندەرى وقيعا جەلىسىن سەزىممەن ءورىپ، قوجانىڭ كوڭىل كۇيىن اۋەز ارقىلى جەتكىزەدى. ال قويىلىمنىڭ بي قيمىلدارىن بالەتمەيستەر رينات بيليبايەۆ ساحنا ىرعاعىنا ۇيلەستىرىپ، كورىنىستەرگە سەرپىن مەن ويىندىق سيپات بەردى.
مەرەيلى 90-شى ماۋسىمداعى ونەر ورداسىنىڭ كەزەكتى پرەمەراسى – ادەبي مۇرانى زاماناۋي ساحنا ونەرى ارقىلى ناسيحاتتاۋدىڭ بىرەگەي ۇلگىسى. كورەرمەن قوجانىڭ كۇلكى مەن قايشىلىققا تولى بالالىق الەمىنە ەنىپ، ونىڭ وي-ساناسىنىڭ قالىپتاسۋ جولىنا كۋا بولادى.
قويىلىم تەك بالالارعا عانا ەمەس، اتا-انالار ءۇشىن دە اسەرلى بولماق، ويتكەنى ءاربىر ەرەسەك كورەرمەن ءوز بالالىق شاعىن، العاش جاساعان قاتەلىكتەر مەن ارمان-قيالدارىن قوجانىڭ بەينەسىنەن قايتا تابادى.
المات امانگەلدى، مەملەكەتتىك قۋىرشاق تەاترىنىڭ ديرەكتورى: «ءبىز ءۇشىن بەردىبەك سوقپاقبايەۆتىڭ شىعارماسىن قۋىرشاق تەاترى ساحناسىنا شىعارۋ – ۇلكەن جاۋاپكەرشىلىك. بۇل تۋىندى ءار بۋىننىڭ جۇرەگىنە جول تاپقان. ەندى سول رۋحاني مۇرانى قۋىرشاق ونەرى ارقىلى جاڭعىرتىپ، جاس كورەرمەنگە جەتكىزۋ – ءبىزدىڭ باستى ماقساتىمىز».
پرەمەرا كۇنى مەن ۋاقىتى: 13 قاراشا 2025 جىل، ساعات 14:00
وتەتىن ورنى: مەملەكەتتىك قۋىرشاق تەاترى (پۋشكين ك-سى، 63)
گۇلىم كوپباي قىزى