قاراعاندى وبلىسىندا اكەسىنىڭ پاتەرىندە قاراسورا وسىرگەن تۇرعىن انىقتالدى، – دەپ حابارلايدى aqshamnews.kz ءتىلشىسى Polisia.kz-كە سىلتەمە جاساپ.
قاراعاندى وبلىسىندا پوليسەيلەر 70 جاستاعى زەينەتكەردىڭ پاتەرىنەن زاڭسىز ۇيىمداستىرىلعان قاراسورا ءوسىرۋ ورنىن اشكەرەلەدى. ءتىنتۋ بارىسىندا ءۇي جاعدايىندا ارنايى جابدىقتارمەن وسىرىلگەن قاراسورا بۇتالارى تابىلدى. الدىن الا مالىمەتتەرگە سايكەس، بۇل وسىمدىكتەر پاتەر يەسىنىڭ 33 جاستاعى ۇلىنا تيەسىلى.
ونىڭ ايتۋىنشا، ول كۇز مەزگىلىندە قاراسورا تۇقىمدارىن اكەلىپ، اكەسىنىڭ پاتەرىندە شاعىن جىلىجاي ۇيىمداستىرعان. ءتارتىپ ساقشىلارى قاراسورا وسىرىلگەن قۇمىرالاردى، وسىمدىكتەرگە قاجەت ميكروكليماتتى قامتاماسىز ەتەتىن قۇرال-جابدىقتاردى، سونداي-اق قاعازعا ورالعان كەپتىرىلگەن وسىمدىكتەردى زاتتاي دالەل رەتىندە تاركىلەدى. زەينەتكەردىڭ ۇلى تۇقىمداردىڭ وزىنە تيەسىلى ەكەنىن راستادى. ونىڭ مالىمدەۋىنشە، قاراسورانى جەكە پايدالانۋ ماقساتىندا وسىرگەن.
سونداي-اق، كۇدىكتى ەسىرتكى زاتتارىن ءبىرشاما ۋاقىت بويى تۇتىنىپ جۇرگەنىن مويىندادى. بۇل دەرەك بويىنشا قىلمىستىق ءىس قوزعالدى. ءقازىر كۇدىكتىنىڭ ەسىرتكى زاتتارىن مەديسينالىق ەمەس ماقساتتا تۇتىنۋ دەرەگىن انىقتاۋ ءۇشىن ءتيىستى ساراپتامالار تاعايىندالدى. ساراپتاما ناتيجەسىنە سايكەس، زاڭ اياسىندا ءتيىستى شەشىم قابىلدانادى.
تەرگەۋ امالدارى جالعاسىپ جاتىر.