2026 جىلعى 5 قاڭتاردان باستاپ قازاقستاندا، ونىڭ ىشىندە الماتىدا دا اركىم ءوز كولىگىنە قالاعان ءنومىرىن تاڭداي الادى. وسى ۋاقىتتان بەرى 19 100 ءوتىنىش كەلىپ تۇسكەن، - دەپ حابارلايدى aqshamnews.kz ءتىلشىسى.
بۇل تۋرالى الماتى قالالىق پوليسيا دەپارتامەنتىنىڭ اكىمشىلىك پوليسيا باسقارماسىنىڭ باستىعى سەرىك شۋمايەۆ مالىمدەدى.
ەندى مەملەكەتتىك ءنومىر اۆتومات تۇردە عانا بەرىلمەي، ازاماتتار بار نۇسقانىڭ ىشىنەن وزدەرىنە ۇناعان ارىپتىك-ساندىق كومبيناسيانى تاڭداي الادى. سەرىك شۋمايەۆتىڭ ايتۋىنشا، بۇل جاڭا قىزمەت مەملەكەتتىك قىزمەتتى ۇسىنۋ ءتاسىلىن تۇبەگەيلى وزگەرتىپ، قولايلى جاعداي جاساپ، تاڭداۋ قۇقىعىن دامىتا تۇسۋگە باعىتتالعان.
تۇسكەن قاراجات قايدا باعىتتالادى؟
"مەملەكەتتىك نومىرلەردىڭ بىرنەشە ساناتى قاراستىرىلعان. ولاردىڭ قۇنى 10-نان 280 ايلىق ەسەپتىك كورسەتكىشكە (اەك) دەيىن بارادى. باعا اۆتوكولىك يەسى تاڭداعان ساندىق نەمەسە ارىپتىك كومبيناسياعا بايلانىستى. مەملەكەتتىك نومىرلەردى ساتىپ الۋدان تۇسكەن قاراجات قالا بيۋدجەتىنە تۇسەدى. ءقازىر بىردەي ءۇش ساننان تۇراتىن، باسىندا نەمەسە سوڭىندا نولدەرى بار نومىرلەرگە سۇرانىس ءوتى جوعارى"، – دەپ اتاپ ءوتتى سەرىك شۋمايەۆ.
ءقازىر ءنومىر تاڭداۋ ءۇشىن مامانداندىرىلعان حالىققا قىزمەت كورسەتۋ ورتالىقتارى ارقىلى ءوتىنىش بەرسەڭىز بولادى. الداعى ۋاقىتتا بۇل قىزمەت ونلاين فورماتتا – ەلەكترون ۇكىمەت پورتالى مەن ءموبيلدى قوسىمشالار ارقىلى دا قولجەتىمدى بولادى. بۇل حقكو-لارعا تۇسەتىن جۇكتەمەنى ازايتىپ، جۇمىستى بارىنشا ىڭعايلى ەتۋگە مۇمكىندىك بەرمەك.
قىزمەت كورسەتۋ ءراسىمى قانداي؟
قىزمەت كورسەتۋ ءراسىمى قاراپايىم ءارى تۇسىنىكتى: ازامات جۇيەدەگى قولجەتىمدى كومبيناسيالاردان كەرەك ءنومىردى تاڭدايدى، تەكسەرۋدەن وتەدى، قىزمەت اقىسىن تولەپ، ءوتىنىش بەرەدى سوسىن. بارلىعى باقىلانادى، اشىق وتەدى. ادەپسىز ءارى جاعىمسىز ماعىنا بەرەتىن نومىرلەردى جاساۋعا عانا جول بەرىلمەيدى.
"ارىپتىك جانە ساندىق كومبيناسيالار جالپى قابىلدانعان مورالدىق نورمالارعا ساي بولۋعا ءتيىس. ءبىز مۇنى الدىن الا ەسكەرتەمىز، ياعني بالاعات سوزدەر نەمەسە بىرەۋدىڭ ار-نامىسى مەن قادىر-قاسيەتىنە نۇقسان كەلتىرەتىن جازۋى بار نومىرلەر بولمايدى. بارلىعى ادەپتەن اسپاۋى كەرەك"، – دەيدى الماتى قالالىق پوليسيا دەپارتامەنتىنىڭ رەسمي وكىلى سالتانات ازىربەك.