سولتۇستىك قازاقستان وبلىسىنداعى اۋىلداردىڭ بىرىندەگى جەكە ۇيدە ءورت شىقتى. ءورت سالدارىنان ەر ادام مەن كامەلەتكە تولماعان بالا قازا تاپتى، تجم ەكىنشى بالانى ىزدەپ جاتىر، - دەپ حابارلايدى aqshamnews.kz تجم-گە سىلتەمە جاساپ.
قايعىلى وقيعا 11 قاڭتاردا كەشكە م. جۇمابايەۆ اتىنداعى اۋداننىڭ مايبالىق اۋىلىندا بولدى. 101 پۋلتىنە حابار تۇسكەننەن كەيىن وقيعا ورنىنا ورتكە قارسى قىزمەت بولىمشەلەرى جىبەرىلدى. كەلگەن كەزدە ءۇيدىڭ تولىق وتقا ورانىپ، تۇگەلدەي قۇلاعانى انىقتالدى.
ءۇي يەسىنىڭ ايتۋىنشا، ىشىندە ونىڭ جۇبايى جانە كامەلەتكە تولماعان ەكى بالا بولعان. ءورتتى ءسوندىرۋ جانە ۇيىندىلەردى ارشۋ بارىسىندا قۇتقارۋشىلار ەر ادام مەن ءبىر بالانىڭ ءمايىتىن تاپتى. ەكىنشى بالانى ىزدەۋ جۇمىستارى جالعاسىپ جاتىر.
وقيعا ورنىندا دەپارتامەنت باسشىلىعى مەن تجد پسيحولوگتارى زارداپ شەككەن ايەلگە كومەك كورسەتىپ جاتىر.
ءورت 64 شارشى مەتر اۋماقتا تولىق ءسوندىرىلدى. ءورتتىڭ شىعۋ سەبەبى انىقتالادى.
ەسكە سالايىق، بۇعان دەيىن تالدىقورعاندا بەس قاباتتى تۇرعىن ۇيدە ءىرى ءورت شىققان ەدى. جەتىسۋ وبلىسىنىڭ تجد مالىمەتىنشە، ءورت سوندىرۋشىلەر 8 ادامدى قۇتقارعان، ولاردىڭ 7-ەۋى - بالالار.