بيزنەستى دامىتۋ ءۇشىن جەڭىلدەتىلگەن شارتتارمەن ءۇي جايلاردى الماتىداعى الەۋمەتتىك كاسىپكەرلەر الادى.
«الماتى» الەۋمەتتىك-كاسىپكەرلىك كورپوراسياسى («الماتى» اكك) الەۋمەتتىك ماڭىزى بار جوبالاردى ىسكە اسىراتىن 30 كاسىپكەرگە جەڭىلدىكتى شارتتارمەن تۇرعىن ەمەس ءۇي-جايلاردى جالعا بەردى.
مۇنداي جالعا الۋ قۇنى ققس ەسەبىمەن 0،1 اەك نەمەسە ءبىر شارشى مەتر ءۇشىن 440،3 تەڭگەنى قۇرايدى (2025 جىلعا ارنالعان اەك-كە سايكەس)، بۇل مەگاپوليستەگى جالعا الۋدىڭ نارىقتىق قۇنىنان ەداۋىر تومەن.
ءۇي-جايلار كورپوراسيا بالانسىندا قولايلى جىلجىمايتىن مۇلىك وبەكتىلەرىنىڭ پايدا بولۋىنا قاراي «الماتى» اكك سايتىندا وتكىزىلەتىن اشىق كونكۋرس نەگىزىندە ۇسىنىلادى. كونكۋرسقا الەۋمەتتىك باعدارلانعان جوبانى ىسكە اسىراتىن كەز كەلگەن كاسىپكەر قاتىسا الادى. باسىمدىق - ينكليۋزيا، دەنساۋلىق ساقتاۋ، ءبىلىم بەرۋ جانە كرەاتيۆتى يندۋستريا سالالارىنداعى باستامالاردى قولداۋ.
جەڭىمپازبەن جالداۋ شارتى ءوندىرىپ الۋ قۇقىعىنسىز ۇزارتۋ مۇمكىندىگىمەن ءۇش جىلعا دەيىنگى مەرزىمگە جاسالادى. بۇدان باسقا، «الماتى» اكك-دە ەكى ايلىق جەڭىلدىكتى كەزەڭ قاراستىرىلعان، ونىڭ بارىسىندا كاسىپكەردەن جالداۋ اقىسى الىنبايدى. نىساندار اعىمداعى كۇيدە بەرىلەدى، ال جالعا الۋشى جوندەۋ جۇمىستارىن جۇرگىزە الادى.
ءقازىر قولداۋ تاپقان جوبالاردىڭ قاتارىندا مۇگەدەكتەردى بەيىمدەۋ جانە وڭالتۋ ورتالىقتارى، ەرەكشە ءبىلىم بەرۋ قاجەتتىلىكتەرى بار بالالارعا ارنالعان لوگوپەديالىق، دەفەكتولوگيالىق، سەنسورلىق جانە نەيروپسيحولوگيالىق باعىتتاعى كۋرستار، سونداي-اق ايەلدەرگە، جاسوسپىرىمدەر مەن زەينەتكەرلەرگە ارنالعان شىعارماشىلىق شەبەرحانالار مەن ۇيىرمەلەر بار.
قالادا جۇمىس ورىندارىن قۇرۋ ماسەلەلەرىنە ەرەكشە نازار اۋدارىلادى. اتاپ ايتقاندا، حالىقتىڭ الەۋمەتتىك وسال توپتارى ساناتىنداعى ايەلدەردى جۇمىسقا ورنالاستىرا وتىرىپ، تىگىن ءوندىرىسى ۇيىمداستىرىلدى.
مەملەكەت پەن الەۋمەتتىك بيزنەستىڭ وسى ارىپتەستىك تەتىگى اياسىندا الماتىدا بارلىعى 221 جاڭا جۇمىس ورنى قۇرىلدى.