الماتىدا «قازاقستان تەمىر جولى» ۇك» اق-نىڭ ەنشىلەس كومپانياسى – «كەدەنترانسسەرۆيس» اق بازاسىندا جاڭادان سالىنعان ZHETYSU لوگيستيكالىق تەرمينالى اشىلدى. اۋقىمدى ينفراقۇرىلىمدىق جوبا قىتايلىق Xi'an Free Trade Port Construction and Operation Co.، Ltd. (قحر) كومپانياسىمەن حالىقارالىق ارىپتەستىك اياسىندا جۇزەگە اسقان.
سالتاناتتى جيىنعا الماتى قالاسىنىڭ اكىمى دارحان ساتىبالدىمەن قاتار، «سامۇرىق-قازىنا» اق باسقارما ءتوراعاسى نۇرلان جاقىپوۆ، الماتىداعى قحر باس كونسۋلى سزيان ۆەي، شەنسي پروۆينسياسىنىڭ گۋبەرناتورى چجاو گان قاتىستى. سونداي-اق سيان قالاسىنىڭ قكپ حاتشىسى فان حۋنۆەي تەلەكوپىر فورماتىندا تىلەۋلەستىگىن ءبىلدىردى.
تەرمينال لوگيستيكالىق شىعىنداردىڭ تومەندەۋىن قامتاماسىز ەتەدى، كولىك بايلانىسىن كۇشەيتەدى جانە حالىقارالىق جۇك تاسىمالىنىڭ تيىمدىلىگىن ارتتىرادى. كەشەننىڭ جوبالىق قۋاتى – جىلىنا 115000 TEU.
ءوز سوزىندە الماتى اكىمى دارحان ساتىبالدى: «الماتى – ەكى ەلدىڭ قارجى، ىسكەرلىك جانە ساۋدا ورتالىعى، سونداي-اق ەۋروپا مەن ازيا اراسىنداعى نەگىزگى بايلانىستىرۋشى جۇيە. سوندىقتان، بۇل تەرمينالدىڭ اشىلۋى كەزەكتى جوبا عانا ەمەس. ول ترانزيتتىك مارشرۋتتاردىڭ مۇمكىندىكتەرىن كەڭەيتىپ، جاڭا جۇمىس ورىندارىن اشۋعا سەپ بولادى. سونىمەن بىرگە، قالا ەكونوميكاسىنا ايتارلىقتاي ىقپال ەتەدى»، - دەپ اتاپ ءوتتى.
رەسمي ءىس-شارا قارساڭىندا اتالعان تەرمينالعا سيان قالاسىنداعى (قحر) قازاقستان-قىتاي جۇك تەرمينالىنان جونەلتىلگەن العاشقى كونتەينەرلىك پويىز كەلدى. ال ستراتەگيالىق ارىپتەستىك پەن ەكولوگيالىق جاۋاپكەرشىلىكتىڭ بەلگىسى رەتىندە ەكى ەلدىڭ وكىلدەرى جاڭا تەرمينال اۋماعىنا اعاش وتىرعىزدى.
ZHETYSU تەرمينالى – تاسىمال دالىزدەرىنىڭ نەگىزگى نۇكتەسىندە ورنالاسقان. ول جۇك اعىندارىن شوعىرلاندىرۋدىڭ ستراتەگيالىق ورتالىعىنا ءارى قازاقستاننىڭ ەڭ ءىرى يمپورتتىق لوگيستيكالىق حابىنا اينالادى دەپ كۇتىلەدى. جاڭا تەرمينال جۇڭگو حالىق رەسپۋبليكاسىنان كەلەتىن جۇكتى وڭدەۋگە، شوعىرلاندىرۋعا جانە بولۋگە باعىتتالعان. تيىسىنشە، الماتىنىڭ ءوڭىردىڭ ءىرى لوگيستيكالىق تورابى رەتىندەگى ترانزيتتىك ءرولىن نىعايتادى.
انىقتاما:
تەرمينالدىڭ جالپى الاڭى 9،8 گەكتار. كونتەينەر الاڭى 9200 شارشى مەتر جانە 1 101 TEU دەيىن ءبىر رەتتىك ساقتاۋعا مۇمكىندىگى بار. قويما ءۇي - جايلارىنىڭ اۋماعى 23 400 شارشى مەترگە جەتەدى، كوممەرسيالىق اۆتوكولىكتەرگە ارنالعان تۇراق ايماعى-8 900 شارشى مەتر.