تالدىقورعاندا پوليسەيلەر تۇندە ءجاسوسپىرىم جۇرگىزگەن كولىكتى قۋىپ ءجۇرىپ توقتاتتى، دەپ حابارلايدى Aqshamnews.kz ءتىلشىسى Polisia.kz-كە سىلتەمە جاساپ.
16 قاراشاعا قاراعان ءتۇنى، شامامەن 03:00-دە پاترۋلدىك پوليسيا قىزمەتكەرلەرى قابانباي باتىر كوشەسىندە جىلدامدىقتى شامادان تىس اسىرىپ، ءقاۋىپتى مانيەۆر جاساعان Mitsubishi Pajero كولىگىن توقتاتپاق بولدى. الايدا جۇرگىزۋشى ءتارتىپ ساقشىلارىنىڭ توقتاۋ تۋرالى زاڭدى تالابىن ەلەمەي، جىلدامدىقتى ارتتىرىپ، قاشۋعا تىرىسقان.
پاترۋلدىك ەكيپاج دەرەۋ قۋعىندى باستاپ، اقپاراتتى باسقا ناريادتارعا جولداعان. بىرنەشە مينۋتقا سوزىلعان قۋدالاۋ ناتيجەسىندە كولىك كوپقاباتتى ءۇيدىڭ اۋلاسىندا بۇعاتتالىپ توقتاتىلدى.
تەكسەرۋ كەزىندە كولىكتى 2009 جىلى تۋعان، جۇرگىزۋشى كۋالىگى جوق ءجاسوسپىرىم باسقارعانى انىقتالدى. ول ۇستالىپ، پوليسيا بولىمىنە جەتكىزىلدى. وقيعا تۋرالى ونىڭ اتا-اناسىنا حابارلاندى. كولىك ارنايى ايىپتۇراعىنا قويىلدى.
جاسوسپىرىمگە قاتىستى:
-
پوليسەيدىڭ زاڭدى تالابىنا باعىنباۋ،
-
جۇرگىزۋشى كۋالىگىنسىز كولىك جۇرگىزۋ
فاكتىلەرى بويىنشا ماتەريالدار سوتقا جىبەرىلدى.
سونىمەن بىرگە، اتا-اناسىنا قاتىستى:
-
بالانىڭ تۇندە ەرەسەكتەردىڭ قاراۋىنسىز جۇرمەۋىن قامتاماسىز ەتپەۋ،
-
تاربيەلەۋ جونىندەگى مىندەتتەرىن تيىسىنشە ورىنداماۋ
بويىنشا اكىمشىلىك حاتتامالار تولتىرىلدى.
پوليسيا ءجاسوسپىرىمنىڭ قاسىندا تاعى ءۇش كامەلەتكە تولماعان دوسى بولعانىن انىقتادى. ولاردىڭ اتا-انالارىنا دا بالالاردىڭ تۇنگى ۋاقىتتا قاراۋسىز جۇرگەنى ءۇشىن اكىمشىلىك پروتوكولدار راسىمدەلدى.
وقيعا بويىنشا تەرگەۋ شارالارى جالعاسىپ جاتىر.