مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جاساندى ينتەللەكت جانە سيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى، - دەپ حابارلايدى اqshamnews.kz ءتىلشىسى اقورداعا سىلتەمە جاساپ.
زاڭعا ەنگىزىلگەن تۇزەتۋلەردىڭ ءبىرىنشى بلوگى زاڭنامالىق اكتىلەردى «جاساندى ينتەللەكت تۋرالى» زاڭمەن سايكەستەندىرۋگە باعىتتالعان.
تۇزەتۋلەردىڭ ەكىنشى بلوگى زاڭنامانى وزگە ماسەلەلەر بويىنشا جەتىلدىرۋدى كوزدەيدى.
زاڭ قامتاماسىز ەتىلمەگەن سيفرلىق اكتيۆتەردىڭ قازاقستان رەسپۋبليكاسىنىڭ اۋماعىنداعى اينالىمىن رەتتەيدى. بۇعان دەيىن قامتاماسىز ەتىلمەگەن سيفرلىك اكتيۆتەردىڭ اينالىمى تەك «استانا» حالىقارالىق قارجى ورتالىعىنىڭ (احقو) اۋماعىندا عانا رۇقسات ەتىلگەن ەدى.
ازاماتتاردىڭ جەكە دەرەكتەرىن قورعاۋ امالدارىن كۇشەيتۋ ماقساتىندا جەكە دەرەكتەردى وڭدەۋگە كەلىسىم بەرۋ مەرزىمىنە قاتىستى تالاپ ەنگىزىلدى. ەندى بۇل مەرزىم جەكە دەرەكتەردى جيناۋ جانە وڭدەۋ ماقساتىنا جەتۋ ءۇشىن قاجەتتى مەرزىمنەن اسپاۋعا ءتيىس. سۋبەكت نەمەسە ونىڭ زاڭدى وكىلى يەسىن، وپەراتوردى، ءۇشىنشى تاراپتى ەسكەرتىپ، جەكە دەرەكتەردى جيناۋعا، وڭدەۋگە بەرگەن كەلىسىمىن قايتارىپ الۋعا قۇقىلى.
ىشكى بولشەك ساۋدا سۋبەكتىلەرى ءۇشىن يدەنتيفيكاسيالىق قۇرالداردى وقيتىن باقىلاۋ-كاسسا ماشينالارىن پايدالانۋ ارقىلى وپەراسيالاردى ەسەپكە الۋ جونىندە تالاپ قويا وتىرىپ، تاۋارلاردى تاڭبالاۋ مەحانيزمى جەتىلدىرىلدى.
ءبىرقاتار تۇزەتۋلەر ناتيجەسىندە اقپاراتتىق قاۋىپسىزدىكتى قامتاماسىز ەتۋ تالاپتارى كۇشەيتىلدى.
زاڭنىڭ ءماتىنى باسپاسوزدە جاريالانادى.