قازاقستاندىق اكتريسا ارۋجان جازىلبەكوۆا 39 جاسىندا العاش رەت انا اتاندى، - دەپ حابارلايدى Aqshamnews.kz ءتىلشىسى. بۇل تۋرالى اكتريسا الەۋمەتتىك جەلىدە ءبولىستى.
39 جاستاعى اكتريسا قۋانىشتى جاڭالىعىن جۇبايى ەرجان الدابەرگەنوۆپەن بىرگە Instagram پاراقشاسىندا جاريالادى. ەرلى-زايىپتىلار ارۋجاننىڭ جۇكتىلىگىنىڭ سوڭعى كەزەڭىندە تۇسىرىلگەن اسەرلى ۆيدەونى ءبولىسىپ، قىزىنىڭ دۇنيەگە كەلگەن كۇنىن دە جاريا ەتتى.
«ءبىز ۇزاق ۋاقىت سەنى قاشان كورەتىنىمىزدى كۇتىپ جۇردىك. سەن اكەڭنىڭ ەڭ باقىتتى سانىن تاڭدادىڭ - 11.11.25. وسى كۇنى ءبىزدىڭ ساراتايىمىز دۇنيەگە كەلدى. ءبىز ەڭ باقىتتى اتا-انامىز»، - دەپ جازدى جۇبايلار.
جەلى قولدانۋشىلارى مەن ارىپتەستەرى جاس اتا-انالاردى قۇتتىقتاپ، جىلى تىلەكتەرىن جاۋدىردى:
«قۇتتى بولسىن!»، «سابيگە مىقتى دەنساۋلىق»، «قۋانىشتارىڭىز كوپ بولسىن» دەگەن پىكىرلەر ۆيدەو استىندا سان مىڭداپ جينالىپ جاتىر.
ارۋجان مەن ەرجاننىڭ قارىم-قاتىناسى جايلى نە بەلگىلى؟
ارۋجان مەن ەرجاننىڭ قارىم-قاتىناسى بىرنەشە جىل بۇرىن جاريا بولدى. ولاردىڭ العاشقى ورتاق سۋرەتتەرى 2021 جىلى Instagram-دا پايدا بولعان. 2022 جىلى ەرجان الدابەرگەنوۆ اكتريساعا كولساي كولىنىڭ جاعاسىندا ۇسىنىس جاساعان بولاتىن.
ەرجان الدابەرگەنوۆ - "بارىس" حوككەي كلۋبىنىڭ بۇرىنعى باس مەنەدجەرى، قازىرگى ۋاقىتتا رەجيسسەر كانات بەيسەكەيەۆ جۇرگىزەتىن Zamandas پودكاستىنىڭ اۆتورلارىنىڭ ءبىرى.
اكتريسانىڭ شىعارماشىلىق جولى
ارۋجان جازىلبەكوۆا - 1986 جىلى الماتىدا دۇنيەگە كەلگەن. بالالىق شاعىندا سپورتتىق بيمەن جانە ات سپورتىنان ساباق العان. كەيىن كيمەپ-تە حالىقارالىق جۋرناليستيكا ماماندىعىن وقىعان.
ونىڭ مانسابى مودەلدىك يندۋستريادان باستالدى: 2003 جىلى Ford Models Super Model of the World بايقاۋىنىڭ ىرىكتەۋ كەزەڭىندە جەڭىسكە جەتىپ، نيۋ-يوركتەگى الەمدىك فينالدا توپ-10 قاتارىنا ەنگەن. كەيىن پاريجدە جۇمىس ىستەدى، ەۋروپا پوديۋمدارىندا ونەر كورسەتتى.
كينوداعى دەبيۋتى 2010 جىلى توقتار قارساقبايەۆتىڭ «ماحاببات تەربەلىسى» فيلمىندەگى باستى رولدەن باستالعان. ودان كەيىن «اسەل، درۋزيا ي پودرۋگي»، «سەردسە موە، استانا»، «وگرابلەنيە پو-كازاحسكي»، كانن فەستيۆالىنىڭ Short Film Corner باعدارلاماسىنا ەنگەن «ۆولنىە پتيسى» سىندى جوبالاردا وينادى. سوڭعى جىلدارى «رەكەتير-2»، «اناعا اپارار جول»، «ۇيگە اپارار جول» فيلمدەرىندەگى رولدەرىمەن تانىلدى.