كۇندەلىكتى كۇيزەلىس، مازاسىز ويلار مەن ىشكى قىسىمنان ارىلۋ ءۇشىن ارنايى مامانعا جۇگىنۋ مىندەتتى ەمەس.
پسيحوتەراپيەۆت ساللي بەيكەر بۇل جاعدايمەن ءوز بەتىڭىزشە كۇرەسۋگە كومەكتەسەتىن ءۇش كەزەڭنەن تۇراتىن قاراپايىم ءادىستى ۇسىنادى. نەبارى 15 مينۋت ۋاقىتىڭىزدى الاتىن ءتاسىل جايلى Aqshamnews.kz ءتىلشىسى تولعىراق جازادى.
بەيكەردىڭ ايتۋىنشا، مازاسىز ويلار ادامنىڭ باسىنان شىقپاي قويادى. وعان سەبەپ - ادام ءوزىن مازالاعان ويعا ۇنەمى ورالىپ، سونىڭ شىرماۋىنان شىعا الماۋىندا. ال بۇعان قارسى تۇرۋ ءۇشىن وي مەن دەنەنى باسقارۋدى ۇيرەنۋ قاجەت.
1-قادام: مازالاعان ويدى انىقتاۋ
ەڭ الدىمەن، مازاسىزدىقتى تۋدىرعان ناقتى ويدى انىقتاپ كورىڭىز. سول كەزدە دەنەڭىزدىڭ قاي تۇسىندا قانداي سەزىم بار ەكەنىن باقىلاڭىز.
«وزىڭىزدەن سۇراڭىز: بۇل مازاسىزدىقتى مەن قاي جەرىمنەن سەزىپ تۇرمىن؟ باسىم با، جۇرەگىم بە، ءىشىم بە، يىعىم با، الدە باسقا ءبىر بولىك پە؟» – دەيدى بەيكەر.
بۇل قادام ويىڭىزدى سىرتقا شىعارىپ، ونىڭ ناقتى نە ەكەنىن تانۋعا كومەكتەسەدى.
2-قادام: نازاردى باسقا جاققا اۋدارۋ
كەلەسى كەزەڭدە ميعا تىنىعۋعا مۇمكىندىك بەرۋ ءۇشىن نازاردى جەڭىل، بەيتاراپ نىسانعا بۇرۋ كەرەك. بۇل ءۇشىن مىنا ءادىستى ورىنداۋ كەرەك:
- كوز دەڭگەيىندە ورنالاسقان ەكى نۇكتە تاڭداڭىز (مىسالى، قابىرعاداعى ەكى بۇرىش)؛
- الدىمەن بىرەۋىنە 1 مينۋت قاراڭىز؛
- كەيىن ەكىنشىسىنە قاراڭىز؛
- سوڭىندا ەكى نۇكتەنىڭ اراسىنداعى بوس كەڭىستىككە نازار اۋدارىڭىز.
«بۇل جاتتىعۋ مي جۇمىسىن تىنىشتاندىرادى. الدىمەن ءسىز مازاسىز ويدى تولىق سەزدىڭىز، ەندى فوكۋستى قاراپايىم نارسەگە اۋىستىرا وتىرىپ، دەنەڭىز بەن ساناڭىزدى قايتا باعىتتايسىز»، - دەيدى مامان.
3-قادام: سول ويعا قايتا ورالىڭىز
سوڭعى قادامدا باستاپقىدا مازالاعان ويعا قايتا ورالىڭىز. ءبىراق ەندى ءسىزدىڭ وعان دەگەن رەاكسياڭىز باسقاشا بولادى - مي تىنىشتالعاننان كەيىن، ول سىزگە باسىنداعىداي اۋىر اسەر ەتپەيدى.
بۇل ءادىس كىمگە كومەكتەسەدى؟
بۇل تەحنيكا اسىرەسە مىناداي جاعدايلاردا پايدالى:
- تۇندە مازاسىز ويلاردان ۇيىقتاي الماي جاتقاندا؛
- كەنەتتەن ۋايىم نەمەسە قورقىنىش بيلەي باستاعاندا؛
- پانيكالىق شابۋىلدىڭ الدى سەزىلگەن كەزدە؛
- ۇيقىسىزدىق، كۇيزەلىس، شارشاۋ ءجيى مازالاسا.
پسيحولوگتار كۇنىنە 10–15 مينۋتتى وزىڭىزبەن نەمەسە جاقىندارىڭىزبەن شىنايى اڭگىمە قۇرۋدى ۇسىنادى. بۇل - ىشكى تۇراقتىلىق پەن سەنىمدىلىكتى قالىپتاستىرۋدىڭ ەڭ قاراپايىم جولى.
قىسقاشا ايتقاندا، بۇل جاتتىعۋ - مي مەن دەنەنى قاتار تىنىشتاندىرىپ، مازاسىز ويدان ارىلۋعا كومەكتەسەتىن جەڭىل ءارى قولجەتىمدى ءتاسىل. كۇن سايىن قايتالاپ وتىرساڭىز، ناتيجەسى دە ايقىنىراق بايقالادى.