14 ناۋرىزدا بۋرابايدا وتكەن ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقايەۆ قوعامدا قىزۋ تالقىلانعان ماسەلەلەرگە قاتىستى پىكىر ايتتى. سونداي-اق، الەۋمەتتىك-ەكونوميكالىق، سالىق ساياساتى، يدەولوگيالىق سالالار بويىنشا ءبىرقاتار باستاما كوتەردى. ولاردىڭ باسىم بولىگىن ۇكىمەت جۇزەگە اسىرادى. سوندىقتان ماقالادا ماڭىزدى جيىننان كەيىن قولعا الىنعان جۇمىستارعا كوز جۇگىرتەمىز.
باستامالاردى ورىنداۋ جوسپارى قابىلداندى
1 ساۋىردە مەملەكەتتىك كەڭەسشى ەرلان قارين Telegram ارناسىندا پرەزيدەنتتىڭ ۇلتتىق قۇرىلتايدىڭ IV وتىرىسىندا كوتەرگەن باستامالارىن ورىنداۋ جوسپارى قابىلدانعانىن حابارلادى. 53 تارماقتان تۇراتىن قۇجاتتى پرەزيدەنت اكىمشىلىگى ۇكىمەتپەن بىرلەسە دايىنداعان. وندا كەلەسى باستامالار قامتىلعان:
- «قازاقستان بالالارى» ءبىرىڭعاي باعدارلاماسىن ازىرلەۋ؛
- ىشكى ساياسات تۇجىرىمداماسىن ازىرلەۋ جانە بەكىتۋ؛
- ناشاقورلىققا جانە ەسىرتكى بيزنەسىنە قارسى كۇرەستىڭ 2026–2028 جىلدارعا ارنالعان جاڭا كەشەندى جوسپارىن قابىلداۋ؛
- ۇلتتىق سيفرلىق ارحيۆ قۇرۋ؛
- بيزنەس وكىلدەرىن تارتا وتىرىپ، ايماقتاردا تەاترلار سالۋ جانە دامىتۋ، سونداي-اق ۇلتتىق تەاترلارعا قولداۋ كورسەتۋ؛
- شەتەلدە اباي ينستيتۋتىن اشۋ؛
- حالىقارالىق بيولوگيالىق ءارالۋاندىقتى قورعاۋ قورىن قۇرۋ؛
- «جايلى مەكتەپ» ۇلتتىق جوباسىن جۇزەگە اسىرۋدى جالعاستىرۋ، ءۇش جىلدا 1300 مەكتەپتى جاڭعىرتۋ؛
ەرەكشە قاجەتتىلىگى بار ادامدارعا ارنالعان زاماناۋي وڭالتۋ ورتالىقتارىن اشۋ، ءاربىر وبلىس ورتالىعىندا ەرەكشە قاجەتتىلىگى بار بالالاردى وڭالتۋ جانە دامىتۋ ورتالىقتارىن قۇرۋ؛
وڭىرلەردى دامىتۋ تۇجىرىمداماسىنا قاتىستى تىڭ تاسىلدەردى ەنگىزۋ؛
2025-2026 جىلدارى ءىرى ينفراقۇرىلىمدىق جوبالاردى جۇزەگە اسىرۋ، سونىڭ ىشىندە استانادان ارقالىق، تورعاي جانە ىرعىز ارقىلى ترانسكاسپيي حالىقارالىق كولىك دالىزىنە تۋرا شىعاتىن اۆتوكولىك جولىن سالۋ جانە جاڭعىرتۋ، ارقالىقتاعى اۋەجايدى قالپىنا كەلتىرۋ جانە جاڭا اەروۆوكزال كەشەنىن سالۋ؛
الداعى ءتورت جىل ىشىندە ەلىمىزدە جىل سايىن 200-گە جۋىق ينۆەستيسيالىق جوبانى ىسكە قوسۋ.
ۇكىمەت جۇمىستى بەلسەندى باستادى
پارلامەنت پرەزيدەنت باستامالارىن زاڭنامالىق تۇرعىدان قولداۋ كورسەتسە، ۇكىمەت اتقارۋشى ورگان رەتىندە ونى ورىنداۋمەن اينالىسادى. ءبىز «14 ناۋرىزدان بەرى ۇكىمەت نە اتقاردى؟» دەگەن سۇراققا جاۋاپ بەرۋ ءۇشىن ونىڭ رەسمي اقپاراتتىق رەسۋرستارىن شولىپ شىقتىق.
ەڭ الدىمەن، پرەمەر-مينيستر ولجاس بەكتەنوۆ پرەزيدەنتتىڭ بيلىككە كەلگەنىنە 6 جىل تولۋىنا وراي ارنايى ماقالا جازدى. ماقالا 17 ناۋرىزدا پرەمەر-مينيستردىڭ رەسمي سايتىندا جاريالاندى. وندا ەلىمىزدىڭ سوڭعى التى جىلداعى الەۋمەتتىك-ەكونوميكالىق جەتىستىكتەرى اتاپ وتىلگەن. سونىڭ ىشىندە 2024 جىلى ءجىو 288 ملرد، ال جان باسىنا شاققاندا 14 مىڭ اقش دوللارى بولعانى ايتىلادى. بۇل شىنىندا دا جەتىستىك.
ارينە، مۇنىمەن توقتاپ قالۋعا بولمايدى. سەبەبى، ەلىمىز «ورتاشا ءوسىم تورىنان» شىعۋى ءتيىس. پرەزيدەنت ءوز جولداۋلارىندا، ۇكىمەتتىڭ كەڭەيتىلگەن وتىرىستارىندا، ۇلتتىق قۇرىلتاي جيىندارىندا وسى باعىتتا باستامالار كوتەرىپ كەلەدى.
قىسقا ۋاقىتتىڭ ىشىندە ۇكىمەت باسشىلىعى مەن مۇشەلەرى ۇلتتىق قۇرىلتايدىڭ سوڭعى وتىرىسىنداعى باستامالاردى جۇزەگە اسىرۋ ءۇشىن بىرنەشە جيىن وتكىزدى. اتاپ وتەر بولساق، ولجاس بەكتەنوۆتىڭ باسشىلىعىمەن:
17 ناۋرىزدا ۇكىمەت وتىرىسى ءوتتى. وندا پرەمەر-مينيستردىڭ ورىنباسارى سەرىك جۇمانعارين، ەكس-ەنەرگەتيكا ءمينيسترى الماسادام ساتقالييەۆ، سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ، مادەنيەت جانە اقپارات ءمينيسترى ايدا بالايەۆا، تۋريزم جانە سپورت ءمينيسترى ەربول مىرزابوسىنوۆ، ەكولوگيا جانە تابيعي رەسۋرستار ءمينيسترى ەرلان نىسانبايەۆ سەكىلدى ۇكىمەت مۇشەلەرى بايانداما جاسادى. بايانداما جاساعان مينيسترلەردىڭ قۇرامىنان-اق ماڭىزدى قورىتىندى جاساۋعا بولادى. ۇلتتىق قۇرىلتايداعى باستامالاردى جۇزەگە اسىرۋعا باستى جاۋاپتى سەرىك جۇمانعارين ەكەنىن بايقايمىز؛
27 ناۋرىزدا پرەمەر-مينيستر پاۆلودار وبلىسىنا جۇمىس ساپارىمەن باردى. وندا ونەركاسىپتى دامىتۋ بويىنشا ماسەلەلەر قارالدى. پرەزيدەنت قۇرىلتايدا بۇعان اسا ءمان بەرگەن؛
1 ساۋىردە وتكەن ۇكىمەت وتىرىسىندا مەملەكەتتىك قىزمەت كورسەتۋ سالاسىن دامىتۋ مەن سيفرلاندىرۋ ماسەلەسى قارالدى. جيىندا سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ، حقكو جۇمىسى جانە حالىققا قىزمەت كورسەتۋ ءتارتىبى تۋرالى «ازاماتتارعا ارنالعان ۇكىمەت» مەملەكەتتىك كورپوراسياسى» كەاق باسقارما ءتوراعاسى ارمان كەنجەعالييەۆ، «ەلەكتروندى ۇكىمەتتە» الەۋمەتتىك ماڭىزى بار جوبالاردى ىسكە اسىرۋ بارىسى تۋرالى BTS Digital باس ديرەكتورى نۇرتاي ءابىلعالييەۆ، بانك جۇيەلەرىندە مەملەكەتتىك قىزمەت كورسەتۋ ءتارتىبى تۋرالى – Kaspi.kz باسقارما ءتوراعاسى ميحايل لومتادزە مەن Freedom Holding Corp. باس اتقارۋشى ديرەكتورى تيمۋر تۋرلوۆ بايانداما جاسادى. پرەزيدەنت سيفرلاندىرۋ مەن جي سالاسىن دامىتۋ ماسەلەلەرىن جەكە ءوزى باقىلاۋدا ۇستايتىنىن مالىمدەگەن بولاتىن. سوندىقتان سيفرلاندىرۋ سالاسىن تالقىلاۋعا ۇكىمەت مۇشەلەرى عانا ەمەس، جەكە سەكتور وكىلدەرى دە قاتىسقان؛
7 ساۋىردە ولجاس بەكتەنوۆ وتاندىق اۋىل شارۋاشىلىعى تاۋارىن وندىرۋشىلەرمەن كەزدەسۋ وتكىزگەن. وندا اگروونەركاسىپ كەشەنىن دامىتۋ ماسەلەلەرى، كوكتەمگى دالا جۇمىستارىنىڭ بارىسى، شارۋالاردى قولداۋ شارالارى، سونداي-اق قوسىمشا پىسىقتاۋدى قاجەت ەتەتىن ءوزارا ءىس-قيمىل باعىتتارى تالقىلانعان. مەملەكەت باسشىسى جولداۋلارىندا جانە بيىلعى قۇرىلتاي وتىرىسىندا اۋىل شارۋاشىلىعىنا ءمان بەردى. 2024 جىلى قابىلدانعان ەكونوميكانى ليبەراليزاسيالاۋ قۇجاتىندا دا اشك نەگىزگى ءوسىم درايۆەرلەرىنىڭ ءبىرى رەتىندە كورسەتىلگەن.
وسى جانە وزگە دە جيىنداردى تالداي كەلە مىناداي قورىتىندى جاساۋعا بولادى: جالپى بيلىك سيفرلاندىرۋعا جانە ديالوگقا باسىمدىق بەرۋدە. ديالوگ كوبىنە سالالىق ماماندارمەن جاسالۋدا.