Almaty-akshamy.kz سايتىندا بۇگىن جارىق كورگەن جاڭالىقتارعا شولۋ – كۇن كەرۋەنى
توقايەۆ – پۋتين كەزدەسۋى
ەكى ەلدىڭ باسشىسى وڭىرلىك جانە جاھاندىق كۇن تارتىبىندەگى ماسەلەلەر جونىندە پىكىر الماستى.
«بۇل – ءبىزدىڭ جاڭا جىلداعى العاشقى كەزدەسۋىمىز، ۆلاديمير ۆلاديميروۆيچ. ءبىز ءبارىمىز رەسەيدە 17 ناۋرىزدا وتەتىن پرەزيدەنت سايلاۋىن كۇتىپ وتىرمىز. تۇپكىلىكتى ناتيجەنىڭ ويداعىداي بولارىنا كۇمانىمىز جوق. ويتكەنى رەسەي ءسىزدىڭ بەدەلدى باسشىلىعىڭىزبەن تاڭقالارلىق تابىسقا قول جەتكىزىپ كەلەدى. شىن مانىندە، ءسىز ءوز مالىمدەمەلەرىڭىزبەن، ىس-ارەكەتىڭىزبەن جاھاندىق كۇن ءتارتىبىن قالىپتاستىراسىز. بۇل ءبىزدىڭ ىنتىماقتاستىعىمىزعا جانە ءسىزدىڭ بىلتىر قاراشا ايىندا قازاقستانعا جاساعان مەملەكەتتىك ساپارىڭىز كەزىندە قول جەتكىزىلگەن ۋاعدالاستىقتاردىڭ ورىندالۋىنا وڭ ىقپالىن تيگىزەتىنى ءسوزسىز. مەنىڭ ويىمشا، قوس تاراپ، ەكى ەلدىڭ ۇكىمەتتەرى اتالعان ۋاعدالاستىقتاردى تابىستى جۇزەگە اسىرىپ جاتىر. ءقازىردىڭ وزىندە ناقتى ناتيجە بار»، دەدى قازاقستان پرەزيدەنتى.
الاقانمەن اقشا تولەۋگە بولادى
قازاقستاندىق ونەرتاپقىشتار ويلاپ تاپقان «Alaqan» تولەم جۇيەسى ادامنىڭ الاقانىنداعى بيومەتريالىق جۇيەنى سكانەرلەۋ ارقىلى جۇمىس ىستەيدى. تۇتىنۋشى AppStore نەمەسە PlayMarket ارقىلى «Alaqan» قوسىمشاسىن جۇكتەي الادى. قوسىمشاعا ءوزىنىڭ بانك كارتاسىن تىركەپ، ءتيىستى تەرمينالدا تولەم جاساۋ مۇمكىندىگىنە يە بولادى.
«بۇل – كوزگە كورىنبەيتىن بيومەتريا. جاساندى ينتەللەكت الاقانىڭىزداعى قان تامىرلارىن ايقىن كورەدى، سۋرەت نەمەسە كوشىرمە نۇسقالاردان تولەم المايدى»، - دەيدى «Alaqan tehnologies» ج ش س ديرەكتورى قانات سارەنبايەۆ.
پانتەوندا 4 ورىن قالدى
سول 4 ورىنعا كىم جاتاتىنىن شەشۋ ءۇشىن ۇلتتىق پانتەون تۋرالى ەرەجەنىڭ جاڭا رەداكسياسى جاريالاندى. ول بويىنشا پرەزيدەنتتەردىڭ وتباسى مۇشەلەرىن، مەملەكەتتىك حاتشىلاردى، كونستيتۋسيالىق كەڭەستىڭ ءتوراعالارىن، سونداي-اق "قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ" وردەندەرىنىڭ يەگەرلەرىن الىپ تاستاۋ ۇسىنىلادى.
تۇسىندىرمە جازبادا بۇل قازاقستاننىڭ تۇڭعىش پرەزيدەنتى تۋرالى زاڭنىڭ كۇشى جويىلعانىنا بايلانىستى جاسالىپ وتىرعانى ايتىلعان.
تاڭبالانعان جارناما
قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا ونلاين-جارنامانى تاڭبالاۋ قاعيدالارىن بەكىتۋ تۋرالى بۇيرىققا قول قويدى. تاڭبالاۋ ونى سايكەستەندىرۋ مۇمكىندىگىمەن ماتىندىك فورماتتا جۇزەگە اسىرىلۋى كەرەك. ەگەر ونلاين-جارناما دىبىستىق نەمەسە اۋديوكورنەكى نىساندا تاراتىلعان جانە ورنالاستىرىلعان بولسا، تاڭبالاۋ ونلاين-جارنامانىڭ الدىندا جۇزەگە اسىرىلۋعا ءتيىس. ياعني تاڭبالاۋدا ورنالاستىرىلعان ماتەريالدىڭ جارناما ەكەندىگى تۋرالى ماتىندىك نۇسقاما بولۋى شارت.
سۋ سالاسىنا ماماندانعان جوو قۇرىلۋى مۇمكىن
پرەزيدەنتتىڭ كەڭەسشىسى قانات بوزىمبايەۆ «Global Water» اتتى سۋ ۇنەمدەۋ تەحنولوگيالارىنا ارنالعان ءبىرىنشى حالىقارالىق فورۋمدا وسى تۋرالى ءمالىم ەتتى.
«بۇل ماسەلەدە حالىقارالىق تاجريبەنى ەسكەرۋ وتە ماڭىزدى. وكىنىشكە قاراي، بىزدەگى سۋ سالاسىن عىلىمي زەرتتەۋ جاعى شەتەلمەن سالىستىرعاندا ءبىرتالاي ارتتا قالعان. ءقازىر بىزگە بۇل سالادا ساپالى ماماندار بۇرىن بولماعان دەڭگەيدە قاجەت. ەلىمىزدەگى بازالىق جوعارى وقۋ ورىندارىنىڭ ءبىرىن تازا سۋ تاقىرىبىنا ماماندانعان ۋنيۆەرسيتەت ەتىپ قالپىنا كەلتىرۋ ماسەلەسى قارالىپ جاتىر»، - دەدى پرەزيدەنت كەڭەسشىسى.
اۋليەاتاعا باردىڭ با، ۇلۋ ەتىن جەدىڭ بە؟..
جامبىل وبلىسى ورتالىق ازيا بويىنشا ۇلۋ ەتىن وسىرەتىن العاش ءوڭىر اتانباق. يتالياندىق «Lumacheria Italiana» كومپانياسى جامبىل وبلىسىندا بيىلعى جىلى ونەركاسىپتىك ماقساتتا ۇلۋ ءوسىرۋدى قولعا الۋدى جوسپارلاپ وتىر. جالپى، كوسمەتولوگيادا ۇلۋلار شىعاراتىن قابىق پەن كىلەگەي شىرىش قولدانىلادى. ال، ۇلۋ ەتى – بۇل ەرەكشە ءونىم جانە ول الەم ەلدەرىندە ۇلكەن سۇرانىسقا يە. «Lumacheria Italiana» كومپانياسى ۇلۋلار وندىرىسىندە الەمدە كوش باستاپ تۇر.
قازاقستان قىزىلشانىڭ تارالۋىنان ءبىرىنشى ورىندا تۇر
قىزىلشانى ۆاكسينامەن توقتاتۋعا بولادى. ءبىراق بۇگىندە قازاقستاندا ۆاكسينامەن باسقارىلاتىن ينفەكسيالىق اۋرۋلاردى ەپيدەميولوگيالىق باقىلاۋ جاعىنان جۇيەلى كەمشىلىكتەر بار. ونى دەنساۋلىق ءمينيسترى دە مويىنداپ وتىر. وسى ورايدا ءالنازاروۆا ينفەكسيالىق اۋرۋلاردى بولجامداۋ جانە باقىلاۋ جۇيەسىن كۇشەيتۋ ءۇشىن ءبىرقاتار شارالاردى اتقارۋ قاجەت دەپ سانايدى.
رامازان كەلە جاتىر!
شاريعات جانە ءپاتۋا ءبولىمى بەكىتكەن كۇنتىزبەگە سايكەس، رامازان ايى 11 ناۋرىزدا باستالادى. ءقادىر ءتۇنى 5 ساۋىردەن 6 ساۋىرگە قاراعان تۇنگە ءتۇسىپ تۇر. ورازا ايت – 10 ءساۋىر. ال قۇربان ايتتىڭ ءبىرىنشى كۇنى 17 ماۋسىمعا كەلەدى.
ەيفەل نەگە جابىلدى؟
ەسكەرتكىشتىڭ باسشىلارىنا قارسى شىققان ەيفەل مۇناراسىنىڭ قىزمەتكەرلەرى بيلەت قۇنىنىڭ وسۋىنە سايكەس جالاقىنى دا كوتەرۋدى تالاپ ەتىپ وتىر.
ەيفەل مۇناراسى 19 اقپاننان باستاپ جابىلعان. تۋريستىك ورىن وسى اپتا بويى كەلۋشىلەردى قابىلداماۋى مۇمكىن. ازىرشە مۇناراعا كوتەرىلۋ مۇمكىن ەمەس. ەلەكتروندىق بيلەتتەرى بار ادامدار قوسىمشا اقپارات الۋ ءۇشىن ەلەكتروندىق پوشتالارىن تەكسەرۋلەرى كەرەك.
«داستۇردەن» وزعان «ءمىرجاقىپ»
«ءمىرجاقىپ. ويان، قازاق!» Ticketon Awards سىيلىعىنىڭ الدىن الا داۋىس بەرۋ ناتيجەسى بويىنشا «ءداستۇردى» باسىپ وزدى. قازاقتىڭ تاريحي دراماسى «ءمىرجاقىپ. ويان، قازاق!» داۋىس بەرۋدىڭ الدىن الا قورىتىندىسى بويىنشا ول «وتاندىق جىل ءفيلمى» نوميناسياسىندا 1424 داۋىس جينادى. ول 625 داۋىستىڭ جارتىسىنا جۋىق داۋىس جيناعان سەنساسيالىق قازاقستاندىق «ءداستۇر» قورقىنىشتى ءفيلمىن باسىپ وزدى.
دەرەكتەر قولدى بولعان با؟
"بجزق" اق GitHub سايتىنداعى قۇجاتتارعا بەلگىسىز تۇلعالار ورنالاستىرعان قازاقستاندىقتاردىڭ دەربەس دەرەكتەرىنىڭ بجزق دەرەكقورىنان شىعۋى تۋرالى جەلىدە تارالعان اقپاراتتىڭ شىندىققا سايكەس كەلمەيتىنى تۋرالى رەسمي مالىمدەمە جاسايدى. بجزق قاۋىپسىزدىك قىزمەتى GitHub سايتىندا ورنالاستىرىلعان دەرەكتەرگە ەگجەي-تەگجەيلى تالداۋ جۇرگىزدى. ناتيجەسىندە، جاريالانعان كاتالوگتا enpf.kz سايتىنىڭ سيپاتتاماسى عانا كورسەتىلگەنى انىقتالدى. بۇل سايت اشىق اقپارات كوزى بولىپ تابىلادى جانە وندا سالىمشىلار مەن الۋشىلاردىڭ دەربەس دەرەكتەرى جوق.
كيبەر-كەلەشەك
ەلىمىزدە 5-8 جاستاعى بالالاردىڭ 45%-ى ينتەرنەت قولدانادى.
«يۋنيسەف-تىڭ جاھاندىق ەسەبىندە الەمدەگى ءاربىر ءۇشىنشى ينتەرنەت قولدانۋشىسى بالا دەلىنگەن. وقۋ-اعارتۋ مينيسترلىگىمەن بىرلەسىپ بىلتىر قازاقستانداعى بالالاردىڭ ونلاين-قاۋىپسىزدىگى مەن تاجىريبەسى بويىنشا زەرتتەۋ جۇرگىزدىك. ناتيجەسىندە قازاقستاندا بالالار ينتەرنەتكە بۇرىن-سوڭدى بولماعان جىلدامدىقپەن جانە ەرتە جاستان قوسىلاتىنىن انىقتادىق. زەرتتەۋگە سايكەس، بالالاردىڭ 45%-ى ينتەرنەتكە 5-8 جاسىندا، ال بالالاردىڭ 5%-ى ودان دا ەرتە - 4 جانە ودان كىشى جاستا قوسىلادى»، - دەدى يۋنيسەف-تىڭ بالالىق شاقتى قورعاۋ باعدارلامالارىنىڭ جەتەكشىسى ايسۇلۋ بەكمۇسا.