پرەزيدەنت «بايتەرەك» ۇلتتىق باسقارۋشى حولدينگى» اق باسقارما ءتوراعاسى رۋستام ءقاراعويشيندى قابىلدادى، دەپ حابارلايدى almaty-akshamy.kz
مەملەكەت باسشىسىنا حولدينگتىڭ بىلتىرعى اتقارعان جۇمىستارىنىڭ ناتيجەلەرى مەن بيىلعى قىزمەتىنىڭ ستراتەگيالىق باعىتتارىن ىسكە اسىرۋ جوسپارى جونىندە ەسەپ بەرىلدى
رۋستام ءقاراعويشيننىڭ ايتۋىنشا، «بايتەرەكتىڭ» بيزنەستى قولداۋ ىسىنە قوسقان جالپى ۇلەسى شامامەن 2،5 تريلليون تەڭگەنى قۇرايدى. كومپانيا ەكونوميكانىڭ ورنىقتى ءارى ساپالى دامۋىن قامتاماسىز ەتۋ ءۇشىن اۋىل شارۋاشىلىعى، وڭدەۋ ونەركاسىبى، ينفراقۇرىلىم، كولىك جانە لوگيستيكا، سونداي-اق تۇرعىن ءۇي قۇرىلىسى سياقتى پەرسپەكتيۆتى سالالارعا باسىمدىق بەرىپ، ولاردى كەشەندى تۇردە قارجىلاندىرۋعا كۇش سالۋعا نيەتتى.
سونىمەن قاتار پرەزيدەنتكە كومپانيانىڭ باسەكەگە قابىلەتتى كاسىپكەرلەردى قولداۋعا باعىتتالعان جوسپارى تۋرالى باياندالدى. باستى ماقسات – قازاقستاننىڭ بارلىق وڭىرىندە شاعىن، ورتا جانە ءىرى بيزنەس جوبالارىن قارجىلاندىرۋ كولەمىن ۇلعايتۋ. شاعىن جانە ورتا بيزنەس باعىتى بويىنشا شاعىن جانە مونوقالالارداعى، سونداي-اق اۋىلدارداعى كاسىپكەرلەرگە بەلسەندى قولداۋ كورسەتىلەدى.
مەملەكەت باسشىسى اتالعان باعىتتارداعى جۇمىستى جانداندىرۋ ماڭىزدى ەكەنىن اتاپ ءوتىپ، جۇكتەلگەن مىندەتتەردىڭ جوسپارلى ورىندالۋى ەلىمىزدىڭ ەكونوميكاسىن نىعايتۋعا جانە ازاماتتاردىڭ ءال-اۋقاتىن ارتتىرۋعا ايتارلىقتاي مۇمكىندىك بەرەتىنىن ايتتى.