بۇگىن اتىراۋدا ۇلتتىق قۇرىلتايدىڭ ءۇشىنشى وتىرىسى شەڭبەرىندە جۇمىس سەكسيالارىنىڭ ءماسليحاتتارى ءوتتى.
تۇسكە دەيىن ق ر پرەزيدەنتىنىڭ كومەكشىسى رۋسلان جەلدىبايدىڭ مودەراتورلىق ەتۋىمەن «ازاماتتىق قوعام» سەكسياسى، سونداي-اق مادەنيەت جانە اقپارات ءمينيسترى ايدا بالايەۆانىڭ مودەراتورلىعىمەن «مادەنيەت. ونەر. رۋحانيات» سەكسياسى جۇمىس ىستەدى.
ال تۇستەن كەيىن پرەمەر-مينيستردىڭ ورىنباسارى تامارا دۇيسەنوۆانىڭ جەتەكشىلىگىمەن «الەۋمەتتىك-ەكونوميكالىق جانە ايماقتىق دامۋ» سەكسياسىنىڭ، عىلىم جانە جوعارى ءبىلىم ءمينيسترى ساياسات نۇربەكتىڭ مودەراتورلىق جاساۋىمەن «ءبىلىم جانە عىلىم» سەكسياسىنىڭ وتىرىسى ءوتتى.
جالپى العاندا، ءتورت سەكسيانىڭ جۇمىسىندا ۇلتتىق قۇرىلتايدىڭ 70-كە جۋىق مۇشەسى ءسوز سويلەپ، 100-دەن اسا ۇسىنىس پەن باستاما كوتەرىلدى.
سەكسيالاردا ايتىلعان ۇسىنىستاردىڭ باسىم بولىگى قوعام بىرلىگىن ودان ءارى نىعايتۋعا، جالپىۇلتتىق قۇندىلىقتاردى دارىپتەۋگە، ەلدىڭ عىلىمي الەۋەتىن كوتەرۋگە، مادەنيەت سالاسىن قولداۋعا، جەرگىلىكتى ءوزىن-وزى باسقارۋ جۇيەسىن دامىتۋعا، كوشى-قون ماسەلەسىن رەتتەۋگە جانە قوعامداعى وزگە دە وزەكتى ماسەلەلەرگە قاتىستى جاسالدى.
ۇلتتىق قۇرىلتاي مۇشەلەرىنىڭ مۇنداي بەلسەندى قىزمەتى اتالعان ازاماتتىق ينستيتۋتتىڭ قوعام مەن مەملەكەت اراسىندا ءتيىمدى ديالوگ الاڭىنا اينالعانىن كورسەتەدى.