جاڭا كونستيتۋسيانىڭ جوباسى كاسىبي زاڭگەرلەردىڭ، ءارتۇرلى سالا ساراپشىلارىنىڭ جانە ازاماتتىق قوعام وكىلدەرىنىڭ ۇزاق ءارى جۇيەلى جۇمىسى ناتيجەسىندە ازىرلەندى. بۇل تۋرالى كونستيتۋسيالىق رەفورما جونىندەگى كوميسسيانىڭ سەگىزىنشى وتىرىسىندا ءماجىلىس دەپۋتاتى، «Respublika» پارتياسىنىڭ جەتەكشىسى ايداربەك قوجانازاروۆ مالىمدەدى.
ايداربەك قوجانازاروۆ، رەفورمانى تالقىلاۋ التى ايدان استام ۋاقىت بويى جۇرگىزىلگەنىنە توقتالدى. وسى كەزەڭ ىشىندە جۇزدەگەن، مىڭداعان ازامات ءوز ۇسىنىستارىن جولدادى. كوميسسيا مۇشەلەرى عانا ەمەس، جۇرتشىلىق تا بۇل قۇجاتتى قازىرگى زامان تالاپتارىنا تولىق جاۋاپ بەرەتىن، تەرەڭ ويلاستىرىلعان جانە ەلدىڭ ۇزاق مەرزىمدى دامۋ باعدارىن ايقىندايتىن ماڭىزدى قۇجات رەتىندە باعالاپ وتىر. سوعان وراي ول جاڭا كونستيتۋسيانىڭ جوباسىن رەفەرەندۋمعا شىعارۋدى ۇسىندى.
«كونستيتۋسيالىق كوميسسيانىڭ مۇشەسى رەتىندە جەكەلەگەن باپتاردىڭ رەداكسياسى پىسىقتالعاننان كەيىن جاڭا كونستيتۋسيا جوباسىن جالپىحالىقتىق داۋىس بەرۋگە – رەفەرەندۋمعا شىعارۋدى ۇسىنامىن»، – دەدى دەپۋتات.
سونداي-اق، ول ۇلتتىق ۆاليۋتا مارتەبەسىن اتا زاڭدا بەكىتۋ تۋرالى دا مالىمدەدى. بۇل ەل ازاماتتارى تاراپىنان تۇسكەن ۇسىنىستىڭ ءبىرى. ۇلتتىق ۆاليۋتانىڭ بولۋى – مەملەكەتتىڭ ەكونوميكالىق تاۋەلسىزدىگى مەن ەگەمەندىگىن ايقىندايتىن نەگىزگى كورسەتكىشتىڭ ءبىرى سانالادى.
«ۇلتتىق ۆاليۋتانىڭ مارتەبەسىن كونستيتۋسيا دەڭگەيىندە بەكىتۋ – تەڭگەنىڭ ينستيتۋسيونالدىق ماڭىزىن ناقتىلاپ، قارجى-ۆاليۋتا اينالىمى سالاسىنداعى مەملەكەتتىك ساياساتتىڭ ساباقتاستىعىن قامتاماسىز ەتەدى. سونىمەن قاتار، ۇلتتىق ۆاليۋتامىزدى كونستيتۋسيادا بەكىتۋ ارقىلى بولاشاقتا ءارتۇرلى الىپقاشپا پىكىرلەر مەن الىپساتارلىق اڭگىمەلەردىڭ الدىن الار ەدىك»، – دەپ ناقتىلاپ ءوتتى دەپۋتات.
ايداربەك قوجانازاروۆتىڭ ايتۋىنشا، ءقازىر تەڭگە مارتەبەسى زاڭمەن رەتتەلگەن. «قازاقستان رەسپۋبليكاسىنىڭ ۇلتتىق بانكى تۋرالى» زاڭعا سايكەس ۇلتتىق ۆاليۋتا – تەڭگە. الايدا الەمدىك قارجى جۇيەسى وزگەرىپ جاتقان جاعدايدا بۇل ماسەلەنى كونستيتۋسيا دەڭگەيىندە ناقتىلاۋ اسا ماڭىزدى.
«بۇل – حالىقارالىق تاجىريبەدە بار دۇنيە. ماسەلەن، ءازىربايجان رەسپۋبليكاسى كونستيتۋسياسىنا سايكەس، ءازىربايجان رەسپۋبليكاسىنىڭ اقشا بىرلىگى رەتىندە مانات بەلگىلەنگەن. سول سياقتى، ارمەنيا كونستيتۋسياسىندا ۇلتتىق ۆاليۋتانىڭ ارميان درامى ەكەنى تىكەلەي جازىلعان. ال قىرعىزستان كونستيتۋسياسىندا ۇلتتىق اقشا بىرلىگى سوم دەپ ناقتى كورسەتىلگەن. سوندىقتان كونستيتۋسيادا «قازاقستاننىڭ ۇلتتىق ۆاليۋتاسى – تەڭگە» دەپ ناقتى بەكىتۋ وتە ورىندى دەپ سانايمىن. وسىعان بايلانىستى اتالعان تۇزەتۋدى كونستيتۋسيا جوباسىنا ەنگىزۋدى كوميسسيا قاراۋىنا ۇسىنامىن»، – دەپ تۇيىندەدى ءسوزىن ءماجىلىس دەپۋتاتى.