الماتى قالاسى مەدەۋ اۋدانى پروكۋراتۋراسى «اباي اتىنداعى قازاق ۇلتتىق پەداگوگيكالىق ۋنيۆەرسيتەتى» كەاق رەكتورىنىڭ ءوتىنىشى نەگىزىندە وقۋ ورنىنىڭ مەملەكەتتىك مۇلكىن يەلىكتەن شىعارۋ زاڭدىلىعىنا تالداۋ جۇرگىزدى.
تالداۋ بارىسىندا الماتى قالاسى، قونايەۆ كوشەسى، 80ء-ۇي مەكەنجايىندا ورنالاسقان (208،8 ش.م. پاۆيلون جانە وعان تيەسىلى جەر تەلىمى) ۋنيۆەرسيتەتتىڭ قاجەتتىلىكتەرىنە ارنالعان جىلجىمايتىن مۇلىك نىسانىنىڭ اففيليرلەنگەن تۇلعالاردىڭ پايداسىنا زاڭسىز بەرىلگەنى انىقتالدى. قازىرگى ۋاقىتتا اتالعان نىساندا الكوگول ونىمدەرىن ساتاتىن تاۋلىك بويى جۇمىس ىستەيتىن مەكەمە ورنالاسقان. سونىمەن قاتار، بۇل عيمارات ۋنيۆەرسيتەتتىڭ №2 ستۋدەنتتەر جاتاقحاناسىنا تىكەلەي جاقىن جەردە ورنالاسقان.
انىقتالعانداي، 1995 جىلى ۋنيۆەرسيتەتتىڭ بۇرىنعى باسشىلىعى مەملەكەتتىك مۇلىكتى ۋاكىلەتتى مەملەكەتتىك ورگانداردىڭ قاتىسۋىنسىز، مۇلىكتى باعالاۋ، كونكۋرس نەمەسە اۋكسيون وتكىزبەستەن، تومەندەتىلگەن قۇنمەن جەكەمەنشىك كومپانياعا بەرگەن. كەيىننەن جەر تەلىمى دە جەر زاڭناماسىنىڭ تالاپتارىن بۇزا وتىرىپ مەملەكەتتىك مەنشىكتەن شىعارىلعان.
ودان كەيىنگى ساتىپ الۋ-ساتۋ مامىلەلەرى ءوزارا بايلانىستى جانە فورمالدى سيپاتتا بولعان. نىسان بىرنەشە رەت بۇرىنعى رەكتوردىڭ وتباسى مۇشەلەرىمەن بايلانىستى تۇلعالار اراسىندا قايتا ساتىلىپ، كەيىن سىيعا تارتۋ شارتتارى ارقىلى ونىڭ جاقىن تۋىستارىنىڭ يەلىگىنە وتكەن. وسىلايشا، ۋنيۆەرسيتەت مۇلكى ءىس جۇزىندە اففيليرلەنگەن تۇلعالاردىڭ پايداسىنا شىعارىلعان.
پروكۋراتۋرا سوت تارتىبىمەن باستاپقى زاڭسىز مامىلەلەردى جانە ولاردان تۋىنداعان كەيىنگى شارتتاردى جارامسىز دەپ تانۋ تۋرالى تالاپ-ارىز ەنگىزدى.
سوتتار اتالعان مۇلىكتى وتكىزۋ كەزىندە سول كەزەڭدە قولدانىستا بولعان مەملەكەتتىك مۇلىكتى جەكەشەلەندىرۋ تۋرالى زاڭناما، جەر زاڭناماسى جانە جىلجىمايتىن مۇلىككە قۇقىقتاردى مەملەكەتتىك تىركەۋ جونىندەگى ازاماتتىق زاڭناما تالاپتارىنىڭ بۇزىلعانىن انىقتادى.
مەدەۋ اۋداندىق سوتىنىڭ 2025 جىلعى 16 ساۋىردەگى شەشىمىمەن پروكۋراتۋرانىڭ تالاپ-ارىزى ءىشىنارا قاناعاتتاندىرىلدى. الماتى قالالىق سوتىنىڭ ازاماتتىق ىستەر جونىندەگى سوت القاسىنىڭ 2025 جىلعى 3 قىركۇيەكتەگى قاۋلىسىمەن تالاپ-ارىز تولىق كولەمدە قاناعاتتاندىرىلدى. كاسساسيالىق ساتى سوت اكتىلەرىن وزگەرىسسىز قالدىردى.
وسىلايشا، پروكۋرورلىق قاداعالاۋ اكتىسى بويىنشا مەملەكەتتىڭ مۇلىكتىك مۇددەلەرى قورعالىپ، ۋنيۆەرسيتەتتىڭ جىلجىمايتىن مۇلىككە قۇقىقتارى قالپىنا كەلتىرىلدى.
زاڭسىز يەلىكتەن شىعارىلعان مەملەكەتتىك مۇلىكتى انىقتاۋ جانە قايتارۋ جۇمىستارى جالعاسىپ جاتىر.