5 اقپاندا الماتى قالاسىنىڭ الاتاۋ اۋدانىنداعى وقۋشىلاردىڭ يننوۆاسيالىق شىعارماشىلىق ورتالىعىندا دۇنيەجۇزىلىك سايلاۋ كۇنىنە ارنالعان ءىس-شارالار اياسىندا الماتى قالاسىنىڭ اۋماقتىق سايلاۋ كوميسسياسى ۇيىمداستىرعان «مەكتەپتەگى ءوزىن-وزى باسقارۋدىڭ ۇزدىك سايلاۋ جۇيەسى» III قالالىق بايقاۋىنىڭ فينالدىق كەزەڭى ءوتتى.
بايقاۋ مەكتەپ وقۋشىلارىنىڭ قۇقىقتىق ساۋاتىن ارتتىرۋعا، ازاماتتىق جاۋاپكەرشىلىگىن دامىتۋعا، سونداي-اق جاستاردىڭ دەموكراتيالىق ۇدەرىستەر مەن سايلاۋعا قاتىسۋ مادەنيەتىنە قىزىعۋشىلىعىن قالىپتاستىرۋعا باعىتتالعان. سونىمەن قاتار، مەكتەپتەگى ءوزىن-وزى باسقارۋ جۇيەسىن دامىتۋعا جانە وقۋشىلاردى سايلاۋ جۇيەسىنىڭ نەگىزگى قاعيداتتارىمەن تاجىريبە جۇزىندە تانىستىرۋعا ەرەكشە كوڭىل بولىنەدى.
بايقاۋ ەكى كەزەڭ بويىنشا وتكىزىلدى. 2026 جىلعى 12–30 قاڭتار ارالىعىندا قاشىقتان بايلانىس فورماتىندا اۋداندىق كەزەڭ ءوتىپ، وندا قالا مەكتەپتەرى ءوز مەكتەپتەرىندەگى ءوزىن-وزى باسقارۋدىڭ سايلاۋ جۇيەسى مودەلدەرىن بەينەروليكتەر ارقىلى تانىستىردى. بايقاۋعا قاتىسۋعا بارلىعى 124 ءوتىنىم ءتۇسىپ، 115 مەكتەپ كونكۋرستىق جۇمىستارىن ۇسىندى، ال جالپى بايقاۋعا 106 مەكتەپ قاتىستى. اۋداندىق كەزەڭدەرگە مەكتەپتەگى ءوزىن-وزى باسقارۋ ۇيىمدارىنىڭ شامامەن 480 وكىلى تارتىلدى.
قالالىق فينالدىق كەزەڭدە اۋداندىق تۋرلاردا جەڭىمپاز اتانعان سەگىز كوماندا ءوز مەكتەپتەرىندەگى سايلاۋ وتكىزۋ تاجىريبەسى مەن وقۋشىلار پارلامەنتىنىڭ جۇمىس جۇيەسىن تانىستىردى. قاتىسۋشىلار مەكتەپتەگى سايلاۋ ۇيىمداستىرۋدىڭ ءتيىمدى تاسىلدەرىن، وقۋشىلاردى ءوزىن-وزى باسقارۋ ۇدەرىستەرىنە تارتۋ جولدارىن جانە ءوز باستامالارىنىڭ ناتيجەلەرىن كورسەتتى.
قاتىسۋشىلاردىڭ جۇمىستارىن كەلەسى قۇرامداعى قازىلار القاسى باعالادى:
• قالىقوۆا ايگۇل وراز قىزى – الماتى قالاسىنىڭ اۋماقتىق سايلاۋ كوميسسياسىنىڭ ءتوراعاسى؛
• ەرجان قالىمباي ۇلى – «Alatau Aqparat» مەدياحولدينگىنىڭ باس ديرەكتورى؛
• ىدرىسوۆا اينۇر مارات قىزى – قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ الماتى قالاسى بويىنشا فيليالىنىڭ ديرەكتورى؛
• سەرىكوۆا سالتانات باحتيار قىزى – الماتى قالاسى ءماسليحاتىنىڭ دەپۋتاتى، قوعامدىق دامۋ، مادەنيەت، سپورت، ءدىن جانە جاستار ءىسى جونىندەگى كوميسسيا مۇشەسى؛
• كارىمعاجى گۇلنۇر نۇرلان قىزى – «الماتى دارىنى» دارىندى بالالار مەن تالانتتى جاستاردى انىقتاۋ جانە قولداۋ ورتالىعىنىڭ ديرەكتورى؛
• قاباشيەۆ اسقات راحيمجان ۇلى – الماتى قالاسى قوعامدىق كەڭەسىنىڭ مۇشەسى، «اق جول» قازاقستان دەموكراتيالىق پارتياسى الماتى قالالىق فيليالى ءتوراعاسىنىڭ ورىنباسارى.
بايقاۋ قورىتىندىسى بويىنشا جۇلدەلى ورىندار تومەندەگىدەي ءبولىندى:
I ورىن – بوستاندىق اۋدانىنىڭ «وراز جاندوسوۆ اتىنداعى №105 گيمنازيا» كمم كومانداسى؛
II ورىن – المالى اۋدانىنىڭ «№134 ليسەيى» كمم؛
III ورىن – الاتاۋ اۋدانىنىڭ «№201 مەكتەپ-گيمنازياسى» كمم.
جەڭىمپازدار مەن قاتىسۋشىلار ديپلوممەن، ەستەلىك سىيلىقپەن جانە العىس حاتپەن ماراپاتتالدى. سونىمەن قاتار، جاستار اراسىندا ەلەكتورالدى مادەنيەتتى دامىتۋعا قوسقان ۇلەسى ءۇشىن كوماندالاردىڭ ۇيلەستىرۋشىلەرى مەن اۋداندىق اۋماقتىق سايلاۋ كوميسسيالارى دا ماراپاتتالدى.
سالتاناتتى ماراپاتتاۋ راسىمىنەن سوڭ قاتىسۋشىلار، ۇيىمداستىرۋشىلار مەن قازىلار القاسىنىڭ مۇشەلەرى ەستەلىك سۋرەتكە ءتۇستى.