اتا زاڭنىڭ قازاق تىلىندەگى ماتىنىمەن جۇمىس ىستەيتىن ارنايى توپ قۇرىلىپ، جۇيەلى ءارى ناتيجەلى جۇمىس اتقارىلدى. بۇل تۋرالى كونستيتۋسيالىق كوميسسيانىڭ سەگىزىنشى وتىرىسىندا قازگزۋ اق باسقارما ءتوراعاسى، پروفەسسور تالعات نارىكبايەۆ مالىمدەدى. ونىڭ ايتۋىنشا، تەرميندەر جۇيەلەنىپ، قازاق ءتىلى زاڭدىلىعىنا ساي جازىلعان.
«كوميسسيانىڭ العاشقى وتىرىسىندا كوتەرىلگەن تەرميندەردىڭ بىرىزدىلىگى ماسەلەسىنىڭ ەسكەرىلگەنىن اتاپ وتكىم كەلەدى. مىسالى، زاڭگەرلەر قولدانىستاعى كونستيتۋسيادا «قۇقىلى»، «حاقىلى»، «قۇقىعى بار»، «قۇقىعى جوق»، «حاقىسى بار» سياقتى تەرميندەر ءارتۇرلى كونتەكستە قولدانىلاتىنىن ءجيى سىنعا الاتىن. جاڭا ماتىندە وسى تەرميندەر ماعىناسىنا قاراي جۇيەلەنىپ، بىرىزگە تۇسكەن. سونداي-اق تەرمينولوگيا ماسەلەسىندە قازاق تىلىندەگى زاڭدىلىقتار پەن ەرەكشەلىكتەر ەسكەرىلگەن»، – دەيدى ول.
سونداي-اق، قازگزۋ اق باسقارما ءتوراعاسى اتا زاڭنىڭ جاڭا ءماتىنىن ارىپتەستەرىمەن بىرگە وقىپ شىققانىن، سونىڭ ىشىندە كالكا قۇرىلىمدار جۇيەلەنىپ، جاتىق جازىلعانىن جەتكىزدى.
«بۇرىنعى رەداكسيادا ءجيى كەزدەسەتىن «بولىپ تابىلادى»، «جۇزەگە اسىرادى» سياقتى كالكالىق قۇرىلىمدار جاڭا ماتىندە جوقتىڭ قاسى. قولدانىلعان تۇستاردىڭ وزىندە دە ولار ورىندى ءارى تىلدىك جاعىنان ۇيلەسىمدى بەرىلگەن»، – دەدى ءسوز سوڭىندا تالعات نارىكبايەۆ.