بۇل پرەپاراتتىڭ ءبىر دوزاسى ءقازىر اقش-تا 70 مىڭ دوللارعا ساتىلۋدا.
وزبەكستان عىلىم اكادەمياسىنا قاراستى يادرولىق فيزيكا ينستيتۋتىنىڭ ديرەكتورى، تەحنيكا عىلىمدارىنىڭ دوكتورى، پروفەسسور يلحام سادىقوۆ وتاندىق عالىمداردىڭ تىڭ زەرتتەۋلەرى جونىندە ايتىپ بەردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
عالىمنىڭ ايتۋىنشا، قازىرگى تاڭدا ينستيتۋتتا 14 عىلىمي زەرتحانا مەن كافەدرالار جۇمىس ىستەيدى. سوڭعى جىلدارى ءبىرقاتار زەرتتەۋلەر جۇرگىزىلدى.
ەڭ جاقسى ناتيجەلەردىڭ ءبىرى – 2022 جىلدىڭ ماۋسىمىندا تىركەلىپ، وندىرىسكە ەنگىزىلگەن جاڭا راديوفارماسيەۆتيكالىق ۆەكتورلىق تەراپيا پرەپاراتى. ول - قاتەرلى ىسىكتى ەمدەۋدە وتە ءتيىمدى جاڭا ءدارى.
بۇل پرەپاراتتىڭ ءبىر دوزاسى ءقازىر اقش-تا 70 مىڭ دوللارعا، ەۋروپا ەلدەرىندە 25 مىڭ دوللارعا ساتىلۋدا. وزبەكستان يادرولىق فيزيكا ينستيتۋتى بۇل ءدارىنى رەسپۋبليكاداعى 3 ونكولوگيالىق ديسپانسەرگە 1،5 مىڭ دوللار باعامەن جەتكىزە باستادى.
2018 جىلدان بەرى بۇل پرەپارات بىرنەشە شەت مەملەكەتتە ءوندىرىلىپ، مەديسينادا قولدانىلىپ كەلەدى. ءارقايسىسى ءوز تەحنولوگياسىن قولدانادى. وزبەكستان يادرولىق فيزيكا ينستيتۋتى جاساعان جاڭا تەحنولوگيا نەگىزىندە بۇل ءدارىنىڭ ءوندىرىسى جولعا قويىلدى. قازىرگى ۋاقىتتا ينستيتۋتتىڭ «ليۋتەسيي-177» دەپ اتالاتىن يزوتوپى الەمدەگى باسقا وندىرۋشىلەردىڭ ونىمدەرىنە قاراعاندا 10 ەسە تازا جانە ساپالى راديويزوتوپ بولىپ تابىلادى.
قاراپايىم تىلمەن ايتقاندا، ينستيتۋت الەمدە بار پرەپاراتتى جەتىلدىرىپ، وتاندىق تەحنولوگيا نەگىزىندە ساپالى ءارى ارزان ءونىم شىعارا باستادى.
وزبەكستاندىق ءونىم اقش، گەرمانيا، رەسەي ونىمدەرىنەن 10 ەسە تازا جانە 15-50 ەسە ارزان.
پرەپاراتتىڭ قۇرامى «ليۋتەسيي-177» راديويزوتوپىنان جانە ارنايى پروستاتا قابىقشاسى بەكىتىلگەن «انتيگەن-617» اقۋىزىنان تۇرادى. بۇل اقۋىز ليۋتەسيي-177 راديويزوتوپىن قاتەرلى ىسىك مەتاستازدارى بولاتىن دەنە ايماقتارىنا جەتكىزەتىن قۇرال رەتىندە ارەكەت ەتەدى. «ليۋتەسيي-177» راديواكتيۆتى يزوتوپى قاتەرلى ىسىكتەرگە ەنىپ، ونى راديواكتيۆتى ساۋلەلەرىمەن كۇيدىرەدى. بۇل ساۋلەلەردىڭ قاشىقتىعى 1-2 ميلليمەتر بولعاندىقتان، ولار ىسىك ارقىلى ەنىپ، اينالاسىنداعى ساۋ تىندەرگە زياندى اسەر ەتپەيدى. بۇل ىسىكتەردى حيرۋرگياسىز ەمدەۋگە مۇمكىندىك بەرەدى.
فوتوسۋرەتتىڭ سول جاعىندا بۇكىل دەنەسىندە قاتەرلى ىسىك مەتاستازدارى بار 4 ناۋقاستىڭ جاعدايى كورسەتىلگەن. وڭ جاعىندا 2-3 اي بويى ليۋتەسيي-177 PSMA-617 پرەپاراتىمەن ەمدەلگەننەن كەيىنگى جاعداي.
قازىرگى تاڭدا بۇل دارى-دارمەك ىسىكتىڭ 4ء-شى ساتىسىن 97-99 پايىزعا ەمدەيدى. ريەۆوليۋسيالىق دارىلەردىڭ قاتارىنا كىرەتىن بۇل پرەپاراتتى الەم دارىگەرلەرى «فانتاستيكالىق ناتيجە» دەپ باعالاپ وتىر.
بۇل پرەپارات – ينستيتۋتتىڭ جەلىلىك كاسىپورنى بولىپ تابىلاتىن «راديوپرەپارات» مەملەكەتتىك كاسىپورنى مەن راديوحيميا عىلىمي زەرتحاناسىنىڭ عالىمدارى جۇرگىزگەن زەرتتەۋلەردىڭ جەمىسى.
كاسىپورىن ءقازىر اقش-تان 55 ەسە، ەۋروپا ەلدەرىنەن 15 ەسە، الەم بويىنشا ەڭ ارزان دەپ سانالاتىن يزرايلدەن 9-10 ەسە ارزان ءونىم شىعارادى.
ءقازىر بۇل ءوڭىمنىڭ بىرنەشە ءجۇز دوزاسىن رەسپۋبليكاداعى 3 ەمحاناعا جەتكىزۋگە بولادى. مالىمەتتەرگە سۇيەنسەك، ءبىر جىلدا وزبەكستاننان 10 مىڭعا جۋىق ادام ونكولوگيالىق سىرقاتىن ەمدەتۋ ءۇشىن شەتەلگە بارادى. ەندى ولاردىڭ بىرنەشە ەسە ارزان ەمدى ءوز ەلىندە الۋ مۇمكىندىگى بار.
بۇل قۇرالدىڭ شىققانىنا بىرنەشە كۇن بولعاندىقتان، ول ءقازىر تەك ىشكى نارىقتا عانا قولجەتىمدى. جالپى، بۇگىندە 60-تان استام راديوفارماسيەۆتيكالىق ءونىم شىعارىلۋدا، ولاردىڭ ءبىر بولىگى الەمدىك نارىقتا جوعارى باعاعا يە.
مىسالى، «يود-125» راديويزوتوپىنىڭ دۇنيەجۇزىلىك ءوندىرىسىنىڭ 80 پايىزى، «فوسفور-32»، «فوسفور-33» يزوتوپتارىنىڭ 60 پايىزى اتالمىش اتالمىش كاسىپورىندا وندىرىلەدى.
كاسىپورىندا وندىرىلگەن ءونىمنىڭ 95 پايىزى ەكسپورتقا شىعارىلادى. تەك 5 پايىزعا جۋىعى ىشكى نارىقتا ساتىلادى.