ليتۆادان قازاقستانعا ادام ءولتىرىپ جاسىرىنىپ جۇرگەن كۇدىكتى ەكستراديسيالاندى، دەپ حابارلايدى aqshamnews.kz
بۇگىن قازاقستان رەسپۋبليكاسىنىڭ باس پروكۋراتۋراسى مەن ىشكى ىستەر مينيسترلىگىنىڭ قىزمەتكەرلەرى سىرتقى ىستەر مينيسترلىگىنىڭ قولداۋىمەن ليتۆا رەسپۋبليكاسىنان 17 جىل بويى كىسى ءولتىرۋ جانە اتىس قارۋىن زاڭسىز ساقتاۋ فاكتىلەرى بويىنشا ىزدەۋدە بولعان قازاقستان ازاماتىن ەكستراديسيالادى.
2007 جىلى كۇدىكتى سىبايلاسىمەن بىرگە زاڭسىز جولمەن بايۋ ماقساتىندا الماتى قالاسىنا كەلگەن.
ولاردىڭ قىلمىستىق ارەكەتى وزگە قىلمىستىق توپ وكىلدەرىمەن جانجالعا اكەلىپ، سونىڭ ناتيجەسىندە ولاردىڭ ءبىرىن ولتىرۋگە شەشىم قابىلداعان.
2008 جىلعى 19 مامىردا كۇدىكتىلەر وزدەرىنىڭ قىلمىستىق نيەتتەرىن جۇزەگە اسىرىپ، جابىرلەنۋشىنى ءوز ءۇيىنىڭ اۋلاسىندا توسىپ الىپ، وعان بىرنەشە رەت وق اتقان. سوڭعى وق باسىنان تيگەن، ياعني «باقىلاۋ» وق بولعان.
الىنعان جاراقاتتاردان جابىرلەنۋشى وقيعا ورنىندا قازا تاپقان.
قىلمىس جاساعاننان كەيىن كۇدىكتىلەردىڭ ءبىرى ۇستالىپ، كەيىن سوت ۇكىمىمەن سوتتالدى، ال ەكىنشىسى جاسىرىنىپ، وعان حالىقارالىق ىزدەۋ جاريالاندى.
جازادان جالتارۋ ماقساتىندا كۇدىكتى انكەتالىق دەرەكتەرىن وزگەرتىپ، ەۋروپا اۋماعىندا جاسىرىنعان.
2025 جىلعى تامىز ايىندا ليتۆا رەسپۋبليكاسىنىڭ شەكاراسىن كەسىپ ءوتۋ كەزىندە ۇستالدى.
كەيىننەن باس پروكۋراتۋرانىڭ سۇراۋى بويىنشا ول قازاقستانعا ەكستراديسيالاندى.
قازىرگى ۋاقىتتا كۇدىكتى تەرگەۋ يزولياتورىنا قاماۋعا الىندى.
ايىپتالىپ وتىرعان قىلمىستار ءۇشىن قازاقستان رەسپۋبليكاسىنىڭ زاڭناماسىنا سايكەس ون جىلدان جيىرما جىلعا دەيىنگى مەرزىمگە نەمەسە ءومىر بويىنا باس بوستاندىعىنان ايىرۋ، مۇلىكتى تاركىلەۋ تۇرىندەگى جازا كوزدەلگەن.