الماتىداعى 26 اۆتونومدى كىتاپحانا ستانسياسى – وقىرمانعا قولجەتىمدىلىكتىڭ جاڭا قادامى
الماتى كىتاپحانالارىنىڭ 97% تولىق جاڭعىرتىلعان. 2025 جىلدىڭ جالپى كىتاپ قورى 1 372 423 دانا، ونىڭ 432 257ء-ى قازاق تىلىندە، 911 125ء-ى ورىس تىلىندە جانە 27 656-ى شەت تىلىندە، - دەپ حابارلايدى Aqshamnews.kz.
كىتاپحانالاردىڭ قوعامدىق ماڭىزى كۇننەن-كۇنگە ارتىپ كەلەدى: 2025 جىلى 11 ايداعى دەرەككە سايكەس، 2،8 ميلليوننان استام تۇرعىن كىتاپحانالارعا وقۋ، ءبىلىم الۋ جانە قارىم-قاتىناس الاڭى رەتىندە بارادى.
بۇگىنگى تاڭدا الماتى قالاسىندا 37 كىتاپحانا جۇمىس ىستەيدى، ولاردىڭ 28ء-ى – الماتى كىتاپحانالارىنىڭ بولىمشەلەرى، ال 9-ى – رەسپۋبليكالىق كىتاپحانا. سونىمەن قاتار ءاربىر جوعارى وقۋ ورنىندا كىتاپحانا بار.
قالا بويىنشا ءۇش كىتاپحانا تاۋلىك بويى (24/7 رەجيمىندە) جۇمىس ىستەيدى: Alatau Creative Hub ورتالىعى، مۇحتار اۋەزوۆ اتىنداعى كىتاپحانا جانە جامبىل اتىنداعى قالالىق جاسوسپىرىمدەر كىتاپحاناسى.
«قادامدىق قولجەتىمدى كىتاپحانا» قاعيداتى اياسىندا 26 اۆتونومدى وزىنە-وزى قىزمەت كورسەتۋ ستانسياسى ورناتىلعان. ولار ساۋدا ورتالىعى، كوۆوركينگ ورتالىعى مەن مەترو بەكەتى سىندى حالىق كوپ جۇرەتىن جەرلەردە ورنالاسقان. اي سايىن بۇل ستانسيالار شامامەن 300 جاڭا وقىرماندى تىركەيدى جانە 420-عا دەيىن كىتاپ بەرەدى. بيىل جىل سوڭىنا دەيىن قوسىمشا 6 ستانسيا ورناتۋ جوسپارلانعان.
كىتاپحانا رەسۋرسىن بارلىق تۇرعىنعا قولجەتىمدى جاساۋ ءۇشىن الماتىلىق مۇمكىندىگى شەكتەۋلى جاندارعا ارنالعان تەگىن ۇيگە كىتاپ جەتكىزۋ قىزمەتى جۇمىس ىستەيدى. بۇل الماتى قالاسى اكىمدىگىمەن جانە Yandex Qazaqstan كومپانياسىمەن بىرلەسىپ قولعا الىنعان.
سونداي-اق، ا. پ. چەحوۆ اتىنداعى ورتالىق قالالىق كىتاپحانا، جامبىل اتىنداعى قالالىق جاسوسپىرىمدەر كىتاپحاناسى، قازاقستاندىق جازۋشىلار كىتاپحاناسى، Alatau Creative Hub ورتالىعى، مۇحتار اۋەزوۆ اتىنداعى كىتاپحانا سىندى جەتى كىتاپحانا بولىمشەسىندە، سونداي-اق №14 جانە №45 كىتاپحانا بولىمشەسىندە كوزى ناشار كورەتىن جانە زاعيپ وقىرماندارعا ارنالعان ارنايى برايل باعدارلامالارىمەن جانە دىبىستىق ينتەرفەيستەرمەن جابدىقتالعان ارنايى بولىمدەر بار.
سيفرلاندىرۋ سالاسىندا اۋىز تولتىرىپ ايتار جەتىستىك بار. www.almatylibrary.kz رەسمي سايتى ىسكە قوسىلعان. پايدالانۋشىلارعا ەلەكتروندى وقۋ زالىنا، كىتاپحانالاردىڭ ۆيرتۋالدى 3D-تۋرىنا، ونلاين وقىرمان بيلەتىن راسىمدەۋگە جانە كىتاپ جەتكىزۋ قىزمەتىنە قول جەتكىزۋ مۇمكىندىگى ۇسىنىلعان. قازىرگى ۋاقىتتا پورتالعا 30 451 باسىلىم ەنگىزىلگەن، ونىڭ 13 127ء-ى وسى جىلى قوسىلدى، بۇل جالپى قوردىڭ 61%-ى (49 492 اتاۋ). قوردى تولىق ەلەكتروندى فورماتقا كوشىرۋ جۇمىستارى جالعاسىپ جاتىر.
سونىمەن قاتار №6 كىتاپحانا-بولىمشەسىنىڭ بازاسىندا سيرەك جانە قۇندى باسىلىمداردى قالپىنا كەلتىرۋ جانە ساقتاۋ جۇمىستارىن جۇرگىزەتىن رەستاۆراسيا زەرتحاناسى بار. قازىرگى تاڭدا 300-دەن استام كىتاپ قالپىنا كەلتىرىلدى، ونىڭ 32ء-سى سيرەك كەزدەسەتىن باسىلىمدار ساناتىنا جاتادى.
بۇگىندە الماتى كىتاپحانالارى زاماناۋي ينفراقۇرىلىمىمەن، ينكليۋزيۆتى جانە سيفرلىق شەشىمدەرىمەن قالا تۇرعىندارىنىڭ مادەني جانە ءبىلىم بەرۋ ءومىرىنىڭ اجىراماس بولىگىنە اينالدى. جاڭعىرتىلعان كەڭىستىك، قولجەتىمدى قىزمەت مەن يننوۆاسيالىق فورمات ارقىلى كىتاپحانالار تەك كىتاپ وقۋ ورنى عانا ەمەس، شىعارماشىلىق پەن ءوزارا بايلانىس ورتالىعىنا اينالىپ وتىر.