ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، كەز كەلگەن قىزمەتكەردىڭ قاشىقتان جۇمىس ىستەۋىنە بولادى، دەپ حابارلايدى aqshamnews.kz
قاشىقتان جۇمىس ىستەي الۋ مۇمكىندىگى قىزمەتكەردىڭ دە، جۇمىس بەرۋشىنىڭ دە باستاماسىمەن انىقتالادى. كودەكستە مۇنداي جۇمىستى اتقاراتىن قىزمەتكەرلەردىڭ ناقتى شەڭبەرى كورسەتىلمەگەندىكتەن، تاراپتاردىڭ كەلىسىمى بويىنشا كەز كەلگەن قىزمەتكەرگە ۇيىمداستىرۋعا بولادى. ادەتتە بۇل مۇمكىندىك:
جۇمىس پەن بالا كۇتىمىن بىرىكتىرەتىن ادامدارعا،
ۋاقىتشا ەڭبەككە جارامسىز بولعاندارعا،
شالعاي ەلدى مەكەندەردە تۇراتىن قىزمەتكەرلەرگە،
سونداي-اق باسقا دا ەرەكشە جاعدايداعى جۇمىسشىلارعا ۇسىنىلادى.
قاشىقتان جۇمىس ىستەيتىن قىزمەتكەرلەردىڭ جۇمىس ۋاقىتى ەڭبەك شارتى نەمەسە جۇمىس بەرۋشىنىڭ اكتىسىندە بەلگىلەنەدى، كۇندەلىكتى ۇزاقتىعى مەن باقىلاۋ ەرەكشەلىكتەرىنە شەكتەۋلەر ساقتالادى. سونىمەن قاتار ەڭبەك اقى قىزمەتكەردىڭ بىلىكتىلىگىنە، جۇمىستىڭ كۇردەلىلىگى مەن ساپاسىنا قاراي تولەنەدى.
مينيسترلىك اتاپ وتكەندەي، توتەنشە نەمەسە اسكەري جاعدايلار، كارانتين سياقتى شەكتەۋ شارالارى جاريالانعان كەزدە، سونداي-اق قىزمەتكەرلەردىڭ ءومىرى مەن دەنساۋلىعىنا ءقاۋىپ تونگەن جاعدايدا جۇمىس بەرۋشى قاشىقتان نەمەسە ارالاس جۇمىس رەجيمىن ۋاقىتشا ەنگىزۋگە قۇقىلى. بۇل رەتتە قىزمەتكەرلەردى ەڭبەك مىندەتتەرىن ورىنداۋ ءۇشىن قاجەتتى جابدىقتارمەن، اقپاراتتىق تەحنولوگيا قۇرالدارىمەن، بايلانىس قىزمەتتەرىمەن قامتاماسىز ەتۋ جانە شىعىنداردى وتەۋ جۇمىس بەرۋشىنىڭ جاۋاپكەرشىلىگىندە.
مينيسترلىك مالىمەتىنشە، قاشىقتان جۇمىس ءتارتىبى قازىرگى زامانداعى ەڭبەك نارىعىنىڭ يكەمدىلىگىن ارتتىرۋعا، ازاماتتاردىڭ جۇمىس پەن جەكە ءومىر اراسىنداعى بالانسىن ساقتاۋعا مۇمكىندىك بەرەدى.