وكپەنىڭ سوزىلمالى وبسترۋكتيۆتى اۋرۋى (ءوسوا) - تىنىس الۋ مۇشەلەرىنىڭ ەڭ كەڭ تارالعان اۋرۋى، سونىمەن قاتار جۇرەكتىڭ يشەميالىق اۋرۋى مەن ينسۋلتتەن كەيىنگى الەم بويىنشا ءولىمنىڭ ءۇشىنشى سەبەبى.
وسوا-مەن اۋىراتىن ناۋقاستاردىڭ شامامەن جارتىسىندا اۋرۋ ۋاقتىلى انىقتالماي، ولار باسقا دياگنوزدارمەن: سوزىلمالى برونحيت، دەمىكپە بويىنشا باقىلاۋدا بولادى.
«دەنساۋلىق ساقتاۋ مينيسترلىگىنىڭ باستاماسىمەن 2025 جىلدىڭ قازان ايىندا ەلدىڭ بارلىق وڭىرلەرىندە مەديسينالىق-سانيتاريالىق العاشقى كومەك دەڭگەيىندە ءوسوا-نى ەرتە دياگنوستيكالاۋ مەن ناۋقاستاردى باسقارۋ داعدىلارىن جەتىلدىرۋ، سونداي-اق سپيرومەتريا (اۋرۋدى انىقتاۋدىڭ نەگىزگى ءادىسى) وتكىزۋ جانە ناتيجەسىن ءتۇسىندىرۋ ساپاسىن ارتتىرۋ بويىنشا وقىتۋ سەمينارلارى ءوتتى. س.قايىربەكوۆا اتىنداعى دەنساۋلىق ساقتاۋدى دامىتۋ ۇلتتىق عىلىمي ورتالىعىنىڭ دەرەكتەرى بويىنشا، قازىرگى تاڭدا ءوسوا دياگنوزىمەن 70 مىڭنان استام ناۋقاس ديسپانسەرلىك ەسەپتە تۇر. ولاردىڭ 5–10%ء-ى اۋرۋدىڭ اسا اۋىر ساتىسىندا. جىل سايىن شامامەن 20 مىڭ جاڭا جاعداي تىركەلەدى. كوبىنەسە بۇل اۋرۋ جاسى ۇلكەن، ۇزاق جىلدار بويى تەمەكى شەگەتىن ەر ادامداردا، سونداي-اق شاڭ مەن تۇتىنگە كاسىبي اسەرى بار ادامداردا كەزدەسەدى. وسى جاستا ءجيى بايقالاتىن جۇرەك-قانتامىر اۋرۋلارى ءوسوا كلينيكالىق كورىنىسىن اۋىرلاتادى جانە اۋرۋ بولجامىنا اسەر ەتەدى»، — دەيدى پروفەسسور، م.ع.د.، كارديولوگيا جانە ىشكى اۋرۋلار عزي جەتەكشى پۋلمونولوگى ساۋلە قاسەنوۆا.
ءوسوا - بۇل تىنىس جولدارى مەن وكپە ءتىنىنىڭ ينگالياسيالىق زياندى بولشەكتەردىڭ اسەرىنەن داميتىن سوزىلمالى قابىنۋىنىڭ سالدارى.
اۋرۋدىڭ نەگىزگى بەلگىسى - ەنتىگۋ (دەمىگۋ)، ول ۋاقىت وتە كەلە كۇشەيە تۇسەدى.
اۋىر تۇرىندە ناۋقاس 100 مەتر جۇرگەندە نەمەسە ءتىپتى كيىنىپ-شەشىنگەن كەزدە ەنتىگەدى. بۇل ءومىر ساپاسىن تومەندەتىپ، ۇيقىنىڭ بۇزىلۋىنا اكەلەدى.
ءوسوا اسقىنۋى ەنتىگۋدىڭ كۇشەيۋىمەن، ءىرىڭدى قاقىرىق بولىنەتىن جوتەلدىڭ قوسىلۋىمەن بايقالادى. اسقىنۋ ءقاۋىپتى، سەبەبى ول جۇرەك-قانتامىر جۇيەسى اۋرۋلارىنىڭ ناشارلاۋىنا، جۇرەك تالماسىنا، ينسۋلتكە، جۇرەك قىزمەتى جەتكىلىكسىزدىگىنىڭ دەكومپەنساسياسىنا جانە اريتمياعا اكەلۋى مۇمكىن. ءوسوا ءاربىر اسقىنۋى اۋرۋدىڭ اعىمىن اۋىرلاتىپ، ءولىم ءقاۋپىن ارتتىرادى. ءوسوا مەن جۇرەك-قانتامىر اۋرۋلارىنىڭ قاتار بولۋى ءومىر ساپاسىن تومەندەتىپ، اۋرۋحاناعا جاتقىزۋ جيىلىگىن ارتتىرادى.
اسقىنۋلاردىڭ الدىن الۋ ءۇشىن نە ىستەۋ كەرەك؟ قاراپايىم قادامدار: بىرتىندەپ تەمەكىدەن باس تارتۋ، تۇماۋعا جانە پنيەۆموكوكك ينفەكسياسىنا قارسى ەگىلۋ، تىنىس الۋ جاتتىعۋلارىن جاساۋ، فيزيكالىق بەلسەندىلىكتى ارتتىرۋ جانە جاقسى كوڭىل كۇي ساقتاۋ.
پۋلمونولوگ دارىگەر ينگالياسيالىق ەم تاعايىندايدى، ول تىنىس الۋدى جەڭىلدەتىپ، ەنتىگۋدى ازايتادى. كۇن سايىن برونح كەڭەيتەتىن دارىلەردى قولدانۋ اۋرۋمەن كۇرەسۋگە كومەكتەسەدى.
اۋىرماڭىز!