ەركىن راقىشيەۆتىڭ تاعى ءبىر تۋىندىسى جارىق كوردى.
جاڭا ءفيلمدى تۇسىرۋگە 30 مىڭ اقش دوللارى جۇمسالدى.
«سەزار» كينوتەاترىندا رەجيسسەر ەركىن راقىشيەۆتىڭ «باقىتىڭدى ايالا» ءفيلمىنىڭ تۇساۋكەسەرى ءوتتى، دەپ حابارلايدى اlmaty-akshamy.kz.
فيلم مەيىرىمدىلىك پەن قايىرىمدىلىقتى، ادامگەرشىلىكتى ناسيحاتتايدى.
«بۇل ءفيلمدى تۇسىرۋگە 30 مىڭ اقش دوللارىن جۇمسادىق. بىر-بىرىنە جانى اشىمايتىن زاماندا وسىنداي فيلمدەر بولۋى قاجەت. سوندا قوعامدا جاناشىر ادامدار كوبەيەدى. مەنىڭ وسى ۋاقىتقا دەيىن تۇسىرگەن فيلمدەرىمنىڭ بارلىعى قوعامداعى جايتتاردى ايقىندايدى. اكتەرلارىمىزدا كاسىبي ماماندار ەمەس، ءوزىم لايىقتى دەپ تاپقاندار. قاراجات جاعىنان كوپتەگەن قيىندىقتار كوردىك. ەشقانداي مەملەكەتتىڭ نە بولماسا جەكە تۇلعالاردى قاراجاتىنا تۇسىرىلمەدى. ادامداردىڭ جۇرەگىنە جىلۋ سىيلايتىن ءفيلمدى ەلىمىزدىڭ بارلىق كينوتەاترلارىنان تاماشالاي الاسىزدار»، – دەيدى رەجيسسەر ەركىن راقىشيەۆ.
فيلمدە قۇرىلىستا ىستەپ جۇرگەن جۇمىسشىلار اراسىندا «داعدارىستان قالاي شىعامىز، قىمباتشىلىق پەن كەدەيشىلىكتەن قالاي قۇتىلامىز؟» دەگەن پىكىرتالاس بولادى. سول كەزدە ءبىر كىسى ءال-فارابي بابامىزدىڭ "مەملەكەتتىڭ دامىپ، وركەندەۋى ءۇشىن، حالىق الدىمەن مەيىرىمدى، قايىرىمدى بولىپ ءوسۋى كەرەك" دەگەنىن ايتادى. مۇنى ەستىگەن قۋات كوۆيد اۋرۋحاناسىنا ەرىكتى بولىپ جۇمىسقا كىرەدى. بىردە "جەدەل جاردەم" اۋرۋحاناعا دەم الا الماي جاتقان اۋىر ناۋقاس قىزدى الىپ كەلەدى. تىنىس الۋ اپپاراتى ىستەمەي قالىپ، قۋات ءوزىنىڭ ءومىرىن قاۋىپكە تىگىپ، جاساندى دەم بەرۋ ارقىلى قىزدى امان الىپ قالادى. ارادا ءبىراز ۋاقىت وتكەندە، ەكەۋى كەزدەيسوق كەزدەسىپ قالىپ، بىر-بىرىنە عاشىق بولادى. قۋات قىزدى تانىعانمەن، ونى ارۋجانعا ايتپايدى. ارۋجان ءوزىن قۇتقارعان جىگىتتىڭ قۋات ەكەنىن بىلمەيدى.
«فيلمدە مەن مەيىرىمدى، جاقسىلىققا جانى قۇشتار جاستىڭ ءبىرى بولامىن. بۇل فيلمدە ويلانار دۇنيەلەر وتە كوپ. كوركەم تۋىندى ءبىر جىلدىڭ ىشىندە ءتۇسىرىرىلدى. ەستە قالار ەرەكشە ساتتەر وتە كوپ. الماتى قالاسىنىڭ ءاڭ ءساندى ءارى كورىكتى جەرلەرىندە تۇسىردىك. ماعان بارلىعى ۇنادى. اكتەرلارمەن دوس بولىپ كەتتىك. بارلىعىنا راحمەتىمدى ايتامىن»، – دەيدى ءفيلمنىڭ باستى كەيىپكەرى اباي ءماجيتوۆ.