قورعانىس مينيسترلىگى، ۇقك، ءىىم، تجم، مەملەكەتتىك كۇزەت قىزمەتى، اسكەري پروكۋراتۋرا جانە باسقا دا مەكەمەلەردىڭ قىزمەتكەرلەرى مەن اسكەري قىزمەتشىلەر وسى باعدارلاماعا قاتىسا الادى، دەپ حابارلايدى aqshamnews.kz
وتباسى بانك 2025 جىلدىڭ 17 قاراشاسىنان باستاپ تۇرعىن ءۇي تولەمدەرىن الۋشىلاردان نەسيە وتىنىمدەرىن قابىلداۋدى باستايدى.
بانك بولىمشەلەرىنە ءوز بەتىڭىزشە بارۋدىڭ قاجەتى جوق. نەسيە بەرۋ ۆەدومستۆولار (مينيسترلىكتەر مەن قىزمەتتەر) جاسايتىن تىزىمدەر بويىنشا جۇرگىزىلەدى. بانك مەكەمەلەرگە ارنايى حاتتار جىبەردى. تىزىمدەر دايىن بولعاننان كەيىن عانا تۇرعىن ءۇي تولەمىن الۋشىلار بانككە بارادى. وندا مەنەدجەر قىزمەتكەردىڭ ءاتى-جونى تىزىمدە بار-جوعىن تەكسەرىپ، سودان كەيىن نەسيە ءوتىنىمىن قابىلدايدى.
جاڭا تۇرعىن ءۇي ساتىپ العىسى كەلگەندەر “ناۋرىز اسكەري” جاڭا باعدارلاماسىنا قاتىسا الادى. بۇل باعدارلاما بويىنشا نەسيە مولشەرلەمەسى – 9%*. ءتىپتى باستاپقى جارناسىز دا قاتىسۋعا بولادى. ەگەر باستاپقى جارنا 0%-دان 20%-عا دەيىن بولسا، وندا نەسيە سوماسىنىڭ ەڭ جوعارى مولشەرى الماتى مەن استانا قالالارى ءۇشىن – 36 ميلليون تەڭگە، ال باسقا وڭىرلەر ءۇشىن – 30 ميلليون تەڭگە بولادى.
ەگەر باستاپقى جارنا 20%-دان 50%-عا دەيىن بولسا، بانك ەڭ جوعارى نەسيە سوماسىن 80 ميلليون تەڭگەگە دەيىن ۇلعايتۋدى جوسپارلاپ وتىر. تۇرعىن ءۇيدى تەك جاعا ۇيدەن الۋعا بولادى، - دەلىنگەن بانك حابارلاماسىندا.
“ناۋرىز اسكەري” – بۇل “ناۋرىز” باعدارلاماسىنىڭ تاعى ءبىر باعىتى. باعدارلامانى جۇزەگە اسىرۋعا قاجەتتى قاراجات الەۋمەتتىك وبليگاسيالار شىعارۋ ارقىلى، ياعني نارىقتىق جاعدايلاردا تارتىلادى. سوندىقتان باعدارلاما قاتىسۋشىلارى ءۇشىن نەسيە مولشەرلەمەسىن مەملەكەت سۋبسيديالايدى. بۇل شارا ازاماتتارعا نەسيەنى قولجەتىمدى پايىزبەن الۋعا مۇمكىندىك بەرەدى.
“ناۋرىز اسكەري” باعىتى بويىنشا جاڭا تۇرعىن ءۇيدى Baspana Market (otbasybank.kz) پورتالىندا تاڭداپ، برونداپ جانە ساتىپ الۋعا بولادى.
ەگەر تۇرعىن ءۇي تولەمىن الۋشىلار دايىن (ەكىنشىلىك) تۇرعىن ءۇي ساتىپ العىسى كەلسە، ولار “اسكەري باسپانا” باعدارلاماسىن پايدالانا الادى. بۇل باعدارلاما بويىنشا نەسيە مولشەرلەمەسى – 18%. باستاپقى جارنا 20%-دان 50%-عا دەيىن بولۋى كەرەك. قاتىسۋشى ەڭ كوبى 50 ميلليون تەڭگەگە دەيىن نەسيە الا الادى.
باعدارلاماعا قاتىسۋشى وزىنە ۇناعان تۇرعىن ءۇيدى ءوزى تاڭدايدى.
وتباسى بانكىنىڭ تۇرعىن ءۇي تولەمىن الۋشىلاردى قولداۋ ناتيجەلەرى: وتباسى بانك تۇرعىن ءۇي تولەمدەرىن الاتىن 44 103 ادامنىڭ باسپانالى بولۋىنا كومەكتەستى. بۇل ماقساتقا جالپى 870،5 ميلليارد تەڭگە ءبولىندى. ونىڭ ىشىندە اسكەري باعدارلامالار اياسىندا 18 مىڭ نەسيە، جالپى سوماسى 428 ميلليارد تەڭگەگە بەرىلدى.