ماجىلىستە ارحيۆ ءىسىن دامىتۋعا قاتىستى زاڭ جوباسى ەكىنشى وقىلىمدا قارالدى، دەپ حابارلايدى aqshamnews.kz
زاڭ جوباسى ارحيۆ جۇيەسىن نىعايتۋعا، سيفرلىق پروسەستەردى رەتتەۋگە، دەربەس دەرەكتەردى قورعاۋعا جانە تاريحي مۇرانى ساقتاۋعا باعىتتالعان.
جاڭا زاڭ جوباسىنىڭ نەگىزگى جاڭالىقتارى:
ۇلتتىق ارحيۆ قورىنىڭ قۇرامىن قالا قۇرىلىسى، جوبالىق-سمەتالىق جانە سىزبالىق قۇجاتتار ەسەبىنەن كەڭەيتۋ؛
قۇجاتتاردى تۇراقتى ساقتاۋعا قابىلداۋ جانە سيفرلىق ارحيۆكە وتكىزۋ ءتارتىبىن رەتتەۋ؛
بيۋدجەت ەسەبىنەن جاسالعان اۋديوۆيزۋالدى قۇجاتتاردىڭ مىندەتتى دانالارىن ارحيۆتەرگە تاپسىرۋ؛
سيفرلىق ارحيۆكە ارنالعان جاڭا باپ ەنگىزۋ.
دەپۋتات ەلنۇر بەيسەنبايەۆ مادەنيەت، ارحيۆ جانە كىتاپحانا قىزمەتكەرلەرىنىڭ جالاقىسىن ارتتىرۋ ماسەلەسىنە ەرەكشە توقتالدى.
AMANAT پارتياسىنىڭ سايلاۋالدى باعدارلاماسىنداعى باستى مىندەتتەردىڭ ءبىرى – مادەنيەت، ارحيۆ جانە كىتاپحانا قىزمەتكەرلەرىنىڭ ەڭبەكاقىسىن كوتەرۋ. وسىعان سايكەس زاڭ جوباسىندا جەرگىلىكتى اتقارۋشى ورگانداردىڭ ءرولىن كۇشەيتەتىن نورمالار قاراستىرىلعان. ەندى ولار اۋىلدىق جەرلەردەگى ارحيۆ ماماندارىنىڭ لاۋازىمدارىن وزدەرى ايقىنداپ، جالاقىعا قوسىمشا 25 پايىز ۇستەماقى بەلگىلەي الادى، – دەدى ول.
سونىمەن بىرگە قازاقستان تاريحىندا العاش رەت مەملەكەتتىك ارحيۆتەرگە “ۇلتتىق” مارتەبە بەرىلەدى. بۇل شەشىم پارلامەنت پەن ۇكىمەتتىڭ ەلدىڭ تاريحي جادى مەن مادەني مۇراسىن ساقتاۋ باعىتىنداعى بىرلەسكەن جۇمىسىنىڭ ناتيجەسى.
ەندى ۇلتتىق ارحيۆ قىزمەتكەرلەرىنە ەڭبەكاقىنى ەسەپتەۋ كەزىندە 1،75 ەسەلىك ۇستەمە كوەففيسيەنت قولدانىلاتىن بولادى. الداعى جىلى استانا مەن الماتى قالالارىنداعى ەكى ارحيۆ وسىنداي ۇلتتىق مارتەبەگە يە بولۋى جوسپارلانىپ وتىر.