ەنەرگەتيكا ءمينيسترى ەرلان اقكەنجەنوۆ ۇكىمەت وتىرىسىندا ەلىمىزدىڭ وتىن-ەنەرگەتيكا كەشەنىن (وەك) سيفرلاندىرۋ بارىسى تۋرالى باياندادى.
ول قازىرگى ۋاقىتتا «وتىن-ەنەرگەتيكا كەشەنىن ءبىرىڭعاي مەملەكەتتىك باسقارۋ جۇيەسى» (EnergyTech) اتتى سالالىق پلاتفورماسىن جۇزەگە اسىرۋ بويىنشا جۇمىستار جۇرۋدە ەكەنىن اتاپ ءوتتى.
«EnergyTech پلاتفورماسى وتىن-ەنەرگەتيكا كەشەنىنىڭ بارلىق سالاسىن ءبىر پلاتفورما بازاسىنا بىرىكتىرەدى. ول ەنەرگەتيكا سەكتورى، كەن پايدالانۋ جانە قايتا وڭدەۋدەن باستاپ كومىر ونەركاسىبىنە دەيىنگى وەك-تىڭ 10 نەگىزگى باعىتى بويىنشا باسقارۋ پروسەستەرىن كەشەندى ۇيلەستىرۋدى قامتاماسىز ەتەدى. جۇيەنى تولىق كولەمدە جاساپ شىعارىپ، ونەركاسىپتىك دەڭگەيدە قولدانىسقا ەنگىزۋ 2026–2027 جىلدارعا جوسپارلانۋدا»، دەپ ناقتىلادى ەرلان اقكەنجەنوۆ.
مينيستر بيىل 7 سيفرلىق سەرۆيس پايدالانۋعا بەرىلگەنىن، ونىڭ ىشىندە 2 سەرۆيس ەنەرگەتيكا سەكتورىندا جۇزەگە اسىرىلعانىن ايتتى. ولار:
كۇزگى-قىسقى كەزەڭگە دايىندىق پەن ونىڭ ءوتۋ بارىسىن مونيتورينگتەۋگە ارنالعان سيفرلىق سەرۆيس؛
شەكتى ءتاريفتى بەكىتۋگە ارنالعان سيفرلىق سەرۆيس.