الماتىدا تازا دا جايلى ءومىر سۇرۋگە قولايلى قالا كەڭىستىگىن قالىپتاستىرۋ جۇمىستارى جۇيەلى تۇردە جالعاسىپ كەلەدى. سول يگى باستامالاردىڭ ءبىرى اتموسفەرالىق اۋانى قورعاۋعا ارنالعان جاڭا ەرەجەلەر جوباسىن ازىرلەۋ، ياعني «اتموسفەرالىق اۋانى قورعاۋ سالاسىنداعى ارنايى ەكولوگيالىق تالاپتاردى ەنگىزۋ تۋرالى» قۇجات. قۇجات بيىل تامىز ايىندا قوعامدىق تالقىلاۋدان ءوتتى.
جوبانىڭ باستى ماقساتى – مەگاپوليستەگى اۋانىڭ لاستانۋ دەڭگەيىن جۇيەلى تۇردە تومەندەتۋ. «رەنەسسانس پليۋس» كومپانياسىنىڭ دەرەگىنشە، زياندى شىعارىندىلاردىڭ شامامەن 60 پايىزى اۆتوكولىكتەن شىعادى. قالعان بولىگى جەكە تۇرعىن ۇيلەر ونەركاسىپ ورىندارى، مونشا مەن كاۋاپحانا، قوعامدىق تاماقتانۋ نىسانى مەن قۇرىلىس الاڭدارى سىندى ستاسيونارلىق لاستانۋ كوزدەرىنىڭ قىزمەتىمەن بايلانىستى.
بۇل ەرەجەلەر جوباسى قالانىڭ بولاشاق ەكولوگيالىق ساياساتىنىڭ بەرىك ىرگەتاسى. ونىڭ نەگىزىندە زياندى شىعارىندىنى ازايتۋعا، اۋا ساپاسىن جاقسارتۋعا باعىتتالعان ناقتى قادامدار مەن تەتىكتەر كەزەڭ-كەزەڭىمەن جۇزەگە اسپاق. ۇسىنىلعان شارالاردىڭ اراسىندا ءوندىرىس وشاقتارىن جاڭعىرتۋ، ەكولوگيالىق تازا وتىن تۇرلەرىنە كوشۋ سەكىلدى ماڭىزدى باعىتتار بار.
ەرەجەلەر جوباسىن قابىلداۋ مەن جۇزەگە اسىرۋ قالانىڭ ەكولوگيالىق جاعدايىن جاقسارتىپ، الماتىلىقتاردىڭ ءومىر سۇرۋگە بارىنشا قولايلى جاعداي تۋعىزۋعا جول اشادى.
سونىمەن قاتار، قالا تۇرعىندارى اۋا ساپاسى ەڭ الدىمەن كولىك سانى مەن ءار ازاماتتىڭ تابيعاتقا دەگەن كوزقاراسىنا بايلانىستى ەكەنىن ايتادى. «تازا اۋا ايماعى» جوباسى اياسىندا جۇرگىزىلگەن ساۋالناما بارىسىندا كەيبىر تۇرعىندار تازا اۋامەن تىنىستاۋ ءۇشىن تاۋعا شىعۋعا ءماجبۇر ەكەنىن جەتكىزگەن. ولاردىڭ پىكىرىنشە، ەكولوگيالىق احۋالدى جاقسارتۋ بىرلەسكەن كۇش-جىگەردىڭ ناتيجەسىندە عانا جۇزەگە اساتىن ورتاق ءىس. سەبەبى، بۇل الەمدىك ماسەلە.